کندین هر نعمتدن یئنه وار پایی،
قایانین کَکوتو، داغین قار پایی،
اوزانیب یاتدیغیم چمن چارپایی!
نه یاخشی گؤروشدوک، نه یاخشی یئنه!
خیالیم بولود تک بوردان اؤتندیر،
سوروش ساچینداکی بو دن، ندن دیر؟!
یانماییب، قلبیمی یاندیران تندیر!
نه یاخشی گؤروشدوک، نه یاخشی یئنه!
هر یان جنّت اولار، قشنگ باخسالار.
باغبان جان یاندیرسا، قشنگ باغ سالار.
آی قشنگ حیَطلر، قشنگ باغچالار!
نه یاخشی گؤروشدوک، نه یاخشی یئنه!
بوردا یهَرلهییب میندیییم بوز داش.
کؤورَلمه اورهییم! تاب گتیر، تابلاش!
عؤمرومون لذّتی، آ کؤهنه دام-داش!
نه یاخشی گؤروشدوک، نه یاخشی یئنه!
وورغوندور بو یالا-یاماجا «انور»
مئیل ائدر یارپیزا، اوماجا «انور»
آی قوزو اوتاران بالاجا «انور!»
نه یاخشی گؤروشدوک، نه یاخشی یئنه...!
#انور_رضا
@turkce_sheir
