بغض النظر عن حقيقة الواقعة.. التي حدثت بين زوجة وزوجها وقتلها | قناة بصمة إبداع ا. رشا السعيد محمود
بغض النظر عن حقيقة الواقعة.. التي حدثت بين زوجة وزوجها وقتلها له.. أحب أفكركوا إن دي أعظم انتصارات الشيطان حرفيا..
قتل + يُتم لأطفال + ضياع مستقبل شابة في أول حياتها+ نهاية أسرة مسلمة+ تعمد إحزان الناس في العيد (من الشيطان طبعا) + فقد الزوجة لأسرتها وزوجها في لحظة..!
فقط لحظة! تم فيها اتباع خطوات الشيطان بجدارة..
وقلنا قبل كده إن الشيطان في المناسبات السعيدة للمسلمين (بيُحرّش) بينهم... يعني بالبلدي.. بيتسعديهم على بعض.. وبيحط فيهم شراسة.. ضد بعض.. وبيجري في عروقهم أكتر.. إن لم يتحصنوا بحصون الله تعالى.. من أذكار مأثورة عن النبي صلى الله عليه وسلم صلوات على الوقت رقى شرعية نوافل صدقات مجاهدة نفس ومحاسبتها صلة الرحم قراءة القرآن الكريم استغفار صلاة على النبي صلى الله عليه وسلم الحاجات دي بتدي حماية للناس.. ولو وقعوا في الغلط.. بيعرفوا يتداركوا نفسهم بسرعة.. بإذن الله..
لكن غير كده.. سهل قوي قوي يوقعهم في مصيبة.. ومحدش معصوم..
ولما تدخلي المطبخ هقترح عليكي اقتراح.. وانتي بتمسكي أي أداة حادة.. سمي بالله واستعيذي من شرها..
وشيلي الأدوات الحادة بعييييد عن الإيد لو تقدري خليها في درج أو في ركن المطبخ ولما تغسليها استعيذي بردوا من شرها واسألي الله خيرها..
أبسطها.. حماية ليكي ولولادك من إن حد يتعور وهو بيستخدمها..
ونتذكر يا جماعة.. نسد مداخل الشيطان علينا وعلى عيالنا وأهالينا.. من عمل أي حرام.. أو غيبة أو نميمة.. إلخ إحنا غلابة أوي.. ومن غير عصمة الله.. محدش معصوم..
ونفتكر قصة سيدنا موسى عليه السلام.. لما قتل من غير قصد..
وندم جدا على اللي عمله.. بس هو كان فاهم مصدر ده كله إنه من عمل الشيطان..
قال تعالى :
(وَدَخَلَ الْمَدِينَةَ عَلَىٰ حِينِ غَفْلَةٍ مِّنْ أَهْلِهَا..) كتير من الجرايم بتحصل بشكل غير متوقع
(.. فَوَجَدَ فِيهَا رَجُلَيْنِ يَقْتَتِلَانِ هَٰذَا مِن شِيعَتِهِ وَهَٰذَا مِنْ عَدُوِّهِ.. ۖ) نية سيدنا موسى كانت طيبة، وكانت انتصار للحق..
(.. فَاسْتَغَاثَهُ الَّذِي مِن شِيعَتِهِ عَلَى الَّذِي مِنْ عَدُوِّهِ فَوَكَزَهُ مُوسَىٰ فَقَضَىٰ عَلَيْهِ.. ) هي لحظة واحدة بس اللي حولت الانتصار للحق إلى جريمة يهرب بسببها سيدنا موسى من مصر لسنين طويلة..
(.. قَالَ هَٰذَا مِنْ عَمَلِ الشَّيْطَانِ ۖ إِنَّهُ عَدُوٌّ مُّضِلٌّ مُّبِينٌ) يظهر هنا بوضوح إدراك سيدنا موسى للموقف وإن فعلا في لحظات معينة زي الغضب،، الشيطان بيكون ليه عمل حقيقي ملموس بيبان أثره بعدها.. حتى لو مش شايفينه.. بس هو فعلا بيتدخل بقوته الشريرة لإفساد المواقف أكتر وأكتر.. عشان ما يكونش في فرصة بعد المواقف دي إن حياة الناس ترجع زي الأول..
فنخلي بالنا بالله عليكم.. ولا نتمادى في أي خلاف.. وندفع بالتي هي أحسن.. ونطلب من ربنا يعيننا على أنفسنا.. ونتحصن بالله..
ربنا يحفظنا جميعا من عمل الشيطان إنه عدو مضل مبين.. منقول
