2022-07-29 21:33:31
ال 7 شهور اللي فاتوا دول كوم.. والشهر الجاي ده كوم تاني خالص!
أهلاً بيك في الفقرة الأولى من سلسلة "أسرار التخطيط" وحلقة بعنوان :
(ازاي اعمل باليت جورنال + خطة شهر اغسطس)
متطلبات الفقرة :
دفتر (ويفضل لو مفيهوش سطور)
استيكي نوتس
اقلام الوان وفلوماستر
جلو (لزق)
مسطرة وقلم رصاص واستيكة
اللي مش عنده الادوات دي يستثمر 50 جنيه وينزل اي مكتبة ويشتريهم الموضوع يستاهل
أولاً: طريقة عمل الباليت جورنال
او بمعنى بسيط "دفتر التخطيط"
١- صفحة الاهداف السنوية
٢- صفحة الكتب
٣- صفحة الكورسات
٤- صفحة الصحة
٥- صفحة الاستثمار المالي
٦- صفحة الحاجات اللي بتعوز تشتريها
٧- صفحة الامنيات اللي نفسك تحققها بس مش دلوقتي.
٨- صفحة اساسيات علاقتك مع ربنا
٩- صفحة الفلترة الشخصية (درجة قرب الناس منك بطريقتي الشخصية)
١٠- صفحة الاسعافات الأولية (بتحط فيها حوالي ١٠ افكار تنقذك لما تدخل ف موود وحش)
وعشان اسهل عليك عملتلك تصاميم سهلة جدا تقدر تنقل منها
ثانيا : خطوة تمهيدية محتاجة ورقة وقلم
(اسأل نفسك ٣ أسئلة وهتعرف منهم أهدافك انت ونوعية الكتب والكورسات اللي هتاخدها)
السؤال الأول:
نفسي لما الدراسة تبدأ أكون حققت إيه؟
(شوف بقا الكتب والكورسات والمهارات والمواهب والسلاسل وكل حاجة نفسك تعملها ومكنتش بتعرف ف الدراسة)
السؤال التاني:
إيه المشاكل اللي ف شخصيتي وحياتي محتاج أصلحها؟
(النوم مثلا - الجسم الصحي - فلترة علاقات مؤذية - بتسوف كتير او متشائم - شوف مشاكلك واكتبها بجرأة).
السؤال التالت:
انا الوقتي مطلوب مني ايه اعمله؟
(شغل بيت بقا - شغل خاص - تدريب - تطوع - تطوير - رعاية اسرتك - شوف انت واجباتك ايه)
ثالثا: خطة شهر أغسطس
ملحوظة!
الخطة دي مجرد مثال عشوائي انت تقدر تحط اي خطة بنفسك المهم تكون متوازنة بين الخمس جوانب
الجانب الروحاني
- هدرس سلسلة السيرة النبوية مع احمد عامر علي يوتيوب.
- هصلي كل يوم ركعتين الضحى وركعين قيام ليل.
- هتصدق بالمبلغ الفلاني.
- هحفظ جزء الذاريات.
الجانب الشخصي
١- قراءة 4كتب كل كتاب اسبوع (القتل للمبتدئين - تنظيم الوقت لابراهيم الفقي - الماجريات لابراهيم السكران - دليل العظمة روبن شارما)
٢- اخلص كورس كيفية اتخاذ القلق صديق محفز من على منصة فرصة + المحاور ال ٦ للنجاح من منصة ادراك.
٣- هخلص كورس الخط العربي وكل اسبوع اكتب جملة بقلم الخطاط وانشرها على النت.
الجانب المهني (للي بيشتغل او بيتدرب)
- هتعلم مبدأ الكايزن الياباني واطور من نفسي ف شغلي كل يوم بنسبة 1℅ .
- همنع استخدام السوشيال ميديا أثناء ما انا بشتغل.
- هعمل CV او برتفوليو احط فيه خبراتي واعمالي.
- هظبط اكونت لينكد ان وانزل عليه كل يوم بوست.
الجانب الصحي
- هشترك في الچيم.. او احمل تطبيق او اشترك ف خطة سارة بوبفيت للصيف.
- هتعلم وصفات فطار صحية واشتري ازازة ماية تشجعني على الشرب.
- هجيب حبل واتعلم الطريقة الصحيحة لنط الحبل.
- هقلل السكر في المشروبات.
- بدل العشا هاكل زبادي وعليها بذور الشيا.
الجانب الاجتماعي
- كل يوم هكلم حد من صحابي بعمق وصدق.
- الاسبوع الاول يوم الجمعة هروح ازور تيتا.
- الاسبوع التاني هروح ازور خالو.
الاسبوع التالت: هكلم صحابي او اخواتي فيديو كول.
- الاسبوع الرابع هخرج مع حد من صحابي ف مطعم او كافيه.
جميل اوي مش كده
لا مش جميل
انت كده رسمت اهداف وبس
لو اكتفيت بمجرد كتابة الاهداف يبقى مبروك والله ما هتكمل يومين علي بعض.
اومال تعمل ايه علشان تحقق بجد الاهداف الشهرية بتاعتك بنسبة تعدي 90℅
١- قسم الخطة الشهرية لخطط اسبوعية
مثلا مثلا :
تعالي بعد ما كتبت اهدافك ف صفحة جديدة واكتب :
خطة الاسبوع الاول:
-انهاء ٦ حلقات من سلسلة السيرة.
- انهاء كتاب القتل للمبتدئين.
- انهاء نصف كورس القلق.
وهكذا باقي الاهداف قسمها علي 4
٢- قسم الخطة الاسبوعية دي على ٦ ايام مش ٧ .
وهنتكلم بالتفصيل عن النقطة دي ف فقرة لوحدها بإذن الله
هشرحهالك بسرعة الوقتي :
(ببساطة لو في كتاب ١٤٠ صفحة متقسموش علي ٧ وتقول كل يوم ٢٠ )
قسمه علي ٦ ايام كل يوم ٢٥
سيب دايما يوم الجمعة فاضي لترويق البيت والقرب من ربنا ومراجعة الاسبوع المنصرم والتخطيط للاسبوع الجاي)
٣- اعمل to do list يوميا.
هسيبلك ف اول كومنت تفاصيل الخطة الاسبوعية وال to do من السلسلة اللي فاتت لو مكنتش متابعني
٤- راجع نفسك كل اسبوع لو في حاجة معملتهاش عاقب نفسك واعملها يوم الجمعة.
٥- حط مكافأة اخر الاسبوع عشان كل يوم تتشجع تكمل ومتقفش.. لو انجزت 90℅ وطالع خد مكافأتك
طب ولو اقل من كده؟
زي ما قولنا عاقب نفسك واقعد خلص اللي وراك.
وبكده احنا خلصنا.
شد العزيمة وجهز نفسك لشهر كله انتاجية بإذن الله
اشوفك الجمعة الجاية ان شاء الله الساعة 4:30 مع حلقة جديدة من أسرار التخطيط.
سلاااااام
99 views༺ ༻, 18:33
إ
