2022-06-18 00:35:04
الأنبا رافائيل يحذر:
الطوفـان جاي جاي وهيغرق الدنيا كلها ومحدش هيقدر يقف قدامه!
كل حاجة فى الكنيسة ليها هدف خلاصي، وبدون ما هو فى الكنيسة هيبقى زي بالظبط واحد بره الفلك.. هيغرق!!
وعلى فكره الطوفان جاي جاي!
أعتبرونى مثل نوح وأعتبرونى مازحا وبقول كلام خرافة لغاية ما يجي الطوفان يغرق الناس!
الطوفــااان بتاع التعليم الغريب جاااي جااااي!!
وهيغرق الدنيا كلها!! .. إلا اللي هيحتموا فى فلك الإيمان المستقيم، تدخل جوه الفلك بتاع الإيمان المستقيم ما تديش ودنك لأى حد بيقول فتاوى جديدة!!
إحنا مش حقل تجارب! مش كل اللي قراله كلمتين يلعب فى دماغى، احنا ماشين ورا كنيسة.. ده فلك لما أكون جواه هيجى طوفان من الأفكار الغريبة يغرق الأخرين ومايغرقنيش.
طوفان بالمنظر العنيف ده محدش هيقدر يقف قدامه، محدش هيقدر عليه، لا مجمع ولا بابا ولا كنيسة ولا قوانين.. هو طوفان جاي.. أعمل ايه؟!!
أنجو بنفسى.. أدخل جوه الفلك وأحتمى
وبعدين الشطارة بقى أجيب معايا ناس تانيين.
نوح ما دخلش الفلك لوحده أخد أولاده وزوجاتهم وأخد مراته وأخد معاه كل الحيوانات الموجودة فى الارض وأنقذها من الغرق!
خد معاك على أد ما تقدر، خد معاك مراتك.. خدى معاكى جوزك.. خد معاك ولادك.. خد معاك المخدومين بتوع كنيستك، بتوع فصلك.. خد معاك أصدقائك.. خد اللى يقرب منك عرفه الإيمان المستقيم عشان يدخل معانا فى الفلك!
الطوفان جاي لامحالة لأن ده اسمه تدبير الأزمنة.. وطريقة انتشاره عن طريق النت.. لأن المعلومات هوا بتنتشر فى one click للدنيا كلها، والناس كلها بتنبهر بالحاجة الجديدة، والأفكار الجديدة كلها فيها بريق وفيها لغات..
وعندنا فى مصر حاجه اسمها عقدة الخواجة طالما حاجه قالها واحد باليونانى ولا بالإنجليزي يبقى هي الصح واحنا كلنا جهلة.. ده اللى هيخلى الطوفان يأكل ناس كتير، شباب كتير بيحبوا المعرفة هيروحوا على الحته دى لأنه هيتعرض عليهم المعرفة بطريقة مغرية بانبهار فيضيعوا فى الطوفان! .. اللي هينجو هو اللي هيحتمى فى فلك الإيمان المسلم مرة للقديسين!
عقلك فى رأسك تعرف خلاصك!!
يعني أيه؟!.. أدرس، شوف التاريخ بتاع العقيدة الدنيا مشيت أزاي.. صحيح كل واحد بيقول فلك النجاة هو كنيستي.. مش كده؟! أدرس، متسبش نفسك للأهواء.. شوف التاريخ بتاع العقيدة من أيام الرسل مشيت ازاى؟ أمتى حصل انحراف؟ أمتى حصل خروج؟ مين عمل أيه؟
دايما أي عقيدة فى الكنيسة هنسأل تلات أسئلة :
مين، وأمتى، وفين؟؟
واحد هيقولى أنتوا أخترعتوا الصيامات، أقوله مين أخترعها، وأمتى، وفين؟؟
هل فى مصر ولا فى روما ولا فى أنطاكية ولا فى القسطنطينيه؟ مين؟
هات لى شخص بس يكون بدأ الصيامات عشان نقول ده فلان!!
وامتى، في أنهى قرن الأول ولا التانى ولا العاشر؟؟
إذا ما وجدناش إجابة للثلاث أسئلة دي يبقي من أيام الرسل والمسيح نفسه
+ مين وأمتي وفين؟؟
مين أول واحد أخترع الكهنوت؟ وأمتى فى أنهي قرن؟ وفي أنهي مكان فى أفريقيا ولا فى أسيا ولا أوروبا
لما حد يقولى انتوا اخترعتوا الرهبنة
أقوله: أه، دي معاك حق الأنبا أنطونيوس، فى القرن الرابع فى صعيد مصر
بيقولوا أنتو اللي أخترعتوا أن الخبز يبقى جسد، أقوله مين أول واحد قال غير المسيح؟، هات فى أنهى قرن؟ وفى أى بلد؟
أنا عندى العكس بقى عندى أول واحد قال أن ده مش جسد، عارفين من هو وفين وامتى، أول واحد قال مفيش كهنوت عارفين مين هو وأمتى وفين!!
العقيدة دي موجودة فى مصر بس ولا فى أوروبا وفى أمريكا؟!.. فمين اللي أبتداها؟مين اللي أبتدى كلمة مذبح؟
يعني اللي بيقولك ده مش مذبح ده مائدة
مين أول واحد سماها مائدة وأمتى وفين؟
هنلاقي اسمها مذبح من أيام العهد القديم، وفي سفر أشعياء، وبولس الرسول قالها: لنا مذبحّ.
فأي حد يتهمنا بأى حاجة أو يخترع أي حاجة فنقوله مين قالها؟
أما حد يعلم بعقيدة وفكرة جديدة نقوله مين قالها؟ وأمتى؟ وفين؟ لو حضرتك اللي بتقولها أنا مش ملزم وخصوصا لو فيه حد بيقول عكس اللى انت بتقوله من قبل كده!
ما تخليش حد يضحك عليك.. وتعرف فين فلك النجاة فعلًا عشان ما يتعملش أفلاك وهمية تغرق الناس فى العطب والهلاك!
نيافة الأنبا رافائيل
#الرسالة_المسيحية
219 views21:35
م
