عمار هليل الواسطي

2022-08-07 17:10:36 سجل اسمك للزيارة بالإنابة بواسطة تطبيق العتبة العباسية المقدسة من خلال الرابط التالي https://link.alkafeel.net/V9Hh باز کردن / نظر دهید

2022-07-30 01:16:14 باز کردن / نظر دهید

2022-07-05 21:46:16 النعي الكامل لأيام محرم الحرام ( العشرة الأولى والثانية والثالثة) ..

من ١ محرم الحرام إلى ١٠ محرم الحرام


لشهر الدمع ريت اهلال لاهل
أنوح وما بــقــت وليان لاهل
ريت الجفن غير ادماه لا هل
على مصاب الضهدني وگطع بيه


بخدمتك أرتجي عمري يظل لي
وفيّك ساعة المحشر يظل لي
حشا أبعد عنك وغيرك يظل لي
حياتي الخدمتك منذوره هيه


العليله تصيح يهل الطيب لاوين
تره اجفوف الدهر بالكدر لاوين
لا دمع اليردكم بعد لا وين
خذتكم من اديه الغاضريه


يهد حيلي الهجر والصبر يبني
وخيالي لكربله يحسيــن يبني
آنه أم البنين وصحت يبني
تعال شأخرك يبني عليه


يمسلم دمع فگدك دمــه مرسال
ومنو الياخذ لبو السجاد مرسال
منك والگلــــب بالنوح مره سال
شجاهه الخانتك يبن الزچيـــه


أنصـــــارك نظل للموت وياك
يبو اليمه ويعون الظفر وياك
زجرنه الحــاربك إيّـــاك وياك
تره حدود المخيم بس منيه


جيش الوحّدك عباس بالطف
هلا ومرحبا الحومه تصيح بالطف
على اعداه وخزرهه وموش بالطف
وبعد كل خزره من عينك منيه


على جسام أنا الكل ضلع حنيت
ولشــوفـــــتــه يرد اردود حنيت
من دمه الچفوفــــه بنوح حنيت
وتلاگن سوه عرس ومنيه


بعد شيفيد أهل دمعي على الراح
وأفرك راحـتـــي بهمي على الراح
علي راح ونزل همي على الروح
وگلب الوالده تكسره الرزيه


يعبد الله المهد بجفاك خالي
يوليدي ويروح الروح خالي
أشم بثيابك وأنتحب خالي
أموت ولا الي عيشه هنيه


وحشه الليله دنيانه يهلنه
وجفن النوح بالعبره يهلنه
بعيده هواي شوفتكم يهلنه
يمن ظليتوا صرعه اعله الوطيه



من ١١ محرم الحرام إلى نهاية محرم الحرام


البقه امن الضعن ياهو البعد يسراه
الهزل هاذي ويتامـــى وحرم يسراه
سبي للشام مد الدمع يسراه
على الصار وحصل بالهاشميه


مدري شچم گلب ينحب عليلاي
ونهاري أظلم هضم خيّم عليلاي
بقيت اليوم بـــس اني و عليلاي
شتگدر تشگف من سياط أميه


مشه ومره تعم حسره يعمّه
العليل الدفــــن أحبابه يعمّه
گلهه وكاد ضي شوفه يعمّه
دفنت أحباب گلبي بهالمسيه


بخرابه شلون ضعن الشرف يلتم
وبعد هيهـــــات جرح الروح يلتم
صحت عبـــــاس ها يالگمر يلتام
تعال وشوف جور اعداك بيه


ناحت والحرم بالضيم يحسين
بعد ما شح عليهه الذي يحسين
يخويه يا شريك الروح يحسين
تعال تريدك ابنيتك رقيه


حسافه الوكت دار بجور من دار
وسكنه بالخرايــــب بأس من دار
الذهب صافي أبونه علي من در
وتشتمنه بقت ظلّام أميه



أويلي كربله شــدارت علينه
واحنه المن فضل ربنا علينه
نصيح بفزع إحضر يا علينه
سبونه المالهم غيره وحميه



خادم الإمام الحسين عليه السلام
عمار هليل الواسطي
ضمن منهاج محرم الحرام ١٤٤٤ هجرية باز کردن / نظر دهید

2022-07-05 20:13:10 باز کردن / نظر دهید

2022-07-05 01:15:07 ليلة ١١ محرم الحرام { ليلة الوحشة }
هوسات ليلة الشموع

زينب الليله وحيده بكربله
لا حسين ولا كفيل العايله
نار تسعر بالخيم... طاح شيال العلم
زينب الليله وحيده بكربله


وينكم صاحت الليله يا هلي
مرة يا زهـــــراء مرة يا علي
آني زينبكم تره ... باليتامه امحيّره
وينكم صاحت الليله يا هلي


بس عليلي اوياي شيظل بالگلب
وآني خواني ذبيحه اعله الترب
باچر النوب السبي ...زينب وجدي النبي
بس عليلي اوياي شيظل بالگلب


آخ يا عباس لو تدري اشجره
شتموني وراح أروح اميسره
تكفلت هاي الحرم ... گلبي ياخويه انهضم
آخ يا عباس لو تدري اشجره


هذا ليل اهدعش من يتحمّله
زينـــب الليـــــله غريبه بكربله
تصيح راحوا كل هلي ...تندب احضر يا علي
هذا ليل اهدعش من يتحمّله


والله وحشه اليوم صارت كربله
بت علي بكــل الضعـــــن متكفله
تجمع أيتام وحرم ... بالفلا مو بالخيم
والله وحشه اليوم صارت كربله




خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-05 01:02:19 ليلة ١٠ محرم الحرام { ليلة الوداع }
قصيدة ( باچر تروح )

هالليله يحسين اوياك ... باچر اشيحمل فرگاك
تحاچيني يا ماي العين
هالليله بس باچر وين ... باچر اشيحمل فرگاك
................................................................................................

يبن أمي هالليله بدمع نتوادع ومن يدري
باچر يخويه بكربله شيصير يا ضي عمري
أصبر واشوفك يا شهم توصيني خويه بخدري
تدريني أظل امحيره صبرك تشد بي صبري

ريت الصبح لا مرني ... ينگطع باچر ظني
يا خويه تحصلّي منين
هالليله بس باچر وين ... باچر اشيحمل فرگاك
................................................................................................

مكفوله جيت الكربله براعي الفضل يدروني
هاي اخت عباس الگمر وامدللـه ايسموني
وعيونه تربي المحملي سهرانه لجل عيوني
شيصير بيه لو شفت مكطوعه منه ظنوني

باچر تغمض عينه ... ويتكطعن چفينه
محلاهه ذيچ الچفين
هالليله بس باچر وين ... باچر اشيحمل فرگاك
................................................................................................

بين الخيم يا مهجتي شفتك وگلبي تفطر
تتفگد الليله الأهل وللمعركه تتحضر
طالت يخويه صفنتي بس بالصبر أتصبر
لحظة الشفتك يا شهم گاعد تحاچي الأكبر

يحچيلك وتحچيله... والليله آخر ليله
والموت ينطر روحين
هالليله بس باچر وين ... باچر اشيحمل فرگاك
................................................................................................

أصعب بعد يا سلوتي شفت الرباب بعيني
تناغي الطفلهه بالمهد چن هاجسي يحاچيني
باچر النبله بمنحره بينه تحول وبيني
شيصبر أمه عالبعد العبد الله فدوه سنيني

هذا الرضيع شذنبه... والعطش فطّر گلبه
وبيا بخت يگصي البين
هالليله بس باچر وين ... باچر اشيحمل فرگاك
................................................................................................

عادت الأم اعله الولد هيه التنشف دموعه
رمله لعد جاسم إجت تعلگ لعرسه شموعه
ما تدري باچر حنته دمه وتظل مفجوعه
ونتهه باچر عالابن مخفيه ما مسموعه

گعدت الليله يمه ... اتقبّله واتشمّه
ليل وجمع هالگلبين
هالليله بس باچر وين ... باچر اشيحمل فرگاك
................................................................................................

يا خويه هالليله بقت يمي وأشوفك حاضر
خل تشبع عيوني بعد ويصبر دليلي الشاجر
باچر مثل هذا الوكت المن الروح تباصر
أحاه يفراگ الأخو أحاه يفجعة باچر

وياك گلبي الليله ... باچر منو يشد حيله
يمي وأشوفك يحسين
هالليله بس باچر وين ... باچر اشيحمل فرگاك
................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-05 00:43:54 ليلة ٩ محرم الحرام { علي الاكبر عليه السلام }
قصيدة ( تمنيتك)

أمك يالأكبر ناديتك ... سالم ترجعلي تمنيتك
وينك يبني
شاهد حزني ... سالم ترجعلي تمنيتك
..........................................................................................................

يا زهرة حياتي وبهجت آمالي
يلبيك العمر يوليدي يحلالي
طبع الأم گلبهه ما يظل خالي
يظل ينبض حنان وهذا أنا حالي

ملهوفه الصوتك يالأكبر لاچن معذوره وما أگدر
همي وونّي
شاهد حزني ... سالم ترجعلي تمنيتك
..........................................................................................................

تمر يبني بخيالي ذكريات الهَمْ
چنك بالمهد ولصوتي تتبسم
مثل ما إنته تحلم يالولد أحلم
أشوفك تكبر گبالي يالموزّم

ياشبه الهادي بأوصافه عمرك ضايع عمري خلافه
وآنه شظنّي
شاهد حزني ... سالم ترجعلي تمنيتك
..........................................................................................................

يوم الي نزلنه بكربله يبني
حسيت القدر بالنوح ناطرني
هاجس للحزن بالروح عذبني
تروح وما تجي وتعوفني بحزني

گالولي اعله الغبره موذر ..ما يرجع يا ليلى الأكبر
شرادوا مني
شاهد حزني ... سالم ترجعلي تمنيتك
..........................................................................................................

يا من بالگلب والروح خليتك
على حر الجمر بالخيمه تانيتك
ترجعلي وذر والحضني ظميتك
ومن نحرك ييمه هواي شميتك

متوذر يبني وشيلمك... آه يالفاجع دلّال أمك
روحي اشتجني
شاهد حزني ... سالم ترجعلي تمنيتك
..........................................................................................................

انه لكربله ذاخرتك اليومك
يا بدر العمر وجروحك نجومك
ما لومك رحت للحومه ما لومك
الشهاده طلبتك جي تعرف اعلومك

يالغالي بفگدك أتألم ..وبروحي أنصبلك هالمأتم
راحل عني
شاهد حزني ... سالم ترجعلي تمنيتك
..........................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-05 00:29:37 ليلة ٨ محرم الحرام { القاسم عليه السلام }
قصيدة ( صوت الحزن )

بصوت الحزن رمله تصيح ..يا فرحة الما دامت
بـيــن الدمـــع والآلام
يطفه الشمع يا جسام .. يا فرحة الما دامت
................................................................................................

بيا حاله بقت رمله بالطف من گصاهه البين
تصيح بنوح وبعبره لي وين الصبر لي وين
يبني الطف گطع ظني يرجعلي ضواك منين
نار اخيمنه لو نارك أحيرن بين هالنارين

شيخمد بگلبي النار ... نار الحزن لهّابه
يبني وتضيع الاحلام
يطفه الشمع يا جسام .. يا فرحة الما دامت
................................................................................................

تگله يبني يالعريس ترد لحضاني ظنيتك
سالم ترجع لأمك يالغالي تمنيتك
ما أدري الأجل ينطر اعله جمر الحزن تانيتك
لو بيدي يضي عيني وسط الگلب ظميتك

ما يبره جرحي بفرگاك... جرح الزمان بروحي
حصتي السهر لا ما نام
يطفه الشمع يا جسام .. يا فرحة الما دامت
................................................................................................

تذكرت الربه تگله وهاجت بعدك أحزاني
عنك هالدهر لي وين بعدني ووين خلاني
انته اعله الترب دامي واني بگلبي نيراني
مهضومه يبعد الروح طف كربله شراواني

لو ترجع وعمري تريد ... لسنينك إخذ سنيني
دارت ييمه الأيام
يطفه الشمع يا جسام .. يا فرحة الما دامت
................................................................................................

أنا وكلما يمرني الليل ما ينگظي بحسباتي
كل حسبه أحن واشتاگ ولاتنحسب شوغاتي
لو عاتبت دهري اليوم شتنفع يبني كلماتي
ولا تنفع دموع العين مهما تسيل دمعاتي

يبني الصبر فاق حدود ... أدري الصبر ميرجعك
وجروحي لا ما تلتام
يطفه الشمع يا جسام .. يا فرحة الما دامت
................................................................................................

سهرت لراحتك يبني بعد يالغالي شتمنّه
تگله ما شفت عرسك ولا بهالعرس أتهنه
حيث بكربله المصرع گطع يا ظنوتي الظنه
عرسك يمه مأتم صار دمك عوّض الحنّه

بدمك يغالي حنوك... واني حنيت اضلوعي
دهري شبعد عنده شضام
يطفه الشمع يا جسام .. يا فرحة الما دامت
................................................................................................

ذاخرتك يروح الروح للعاشر يضي عيني
المنيه رادتك بالطف حالت بينك وبيني
زينب عمّتك يبني تصبرني وتواسيني
فجعت الروح بمصابك يبني الهجر ياذيني

أحاه يدورات البين ... لو بالمصايب دارت
كل لحظه يالغالي بعام
يطفه الشمع يا جسام .. يا فرحة الما دامت
................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-04 23:16:30 ليلة ٧ محرم الحرام { قمر العشيرة العباس ع }
قصيدة ( أنتظرك ترجع )

يا عباس بفيض المدمع ..أنتظرك يالكافل ترجع
بگلبي العطشان... يا خويه
طــف الأحــزان... يا خويه
........................................................................................................

يا خويه ومكفوله بعزمك يا عباس وروحي وياك
وانه اعله المحمل وعيوني تنظر وتصد العيناك
يالكافل ضعني لهلموطن محميه بزودك واحماك
والواك يفيي اعله العيله ويرف بالأمجاد الواك

منتظره تقدم برهانك ... منبع للغيره بوجدانك
وأدري العنوان ... يا خويه
طــف الأحــزان... يا خويه
........................................................................................................

للطف من حطينه اخيمنه وانعقدت يالغالي آمال
بعيونك شاهدت الفرگه هذا الحاصل واقع حال
ويا يوم العاشر وأحزانه موعد عندي ويا الآجال
چم لچمه تناطرني بفگدك يتأمل دمعي الهمال

من أتأمل يمي وبعدك ...وتريد الأيام تبعدك
هيبة إخوان ... يا خويه
طــف الأحــزان... يا خويه
........................................................................................................

عطشانه عيالي وحشمتك أدريك بوعدك وفاي
سلمتك جودك يا خويه بيمينك واطلبت الماي
عد عينچ گتلي ومتقصر يالكافل يا مي عيناي
تودعني وعبرات بصدري آنه وكلمن ظل اوياي

ياروح الروح بيا دمعه.. أشرح من تضيگ الوسعه
يابو الفرسان ... يا خويه
طــف الأحــزان... يا خويه
........................................................................................................

شتحمل شصبر شتأمل بغيابك يا ماي العين
لو شفت الموعد يتأخر أتوجه يا خويه الوين؟
ياعباس ظنوني احتارت من شفت تعنالي حسين
يا زينب گطعيهه آمالچ راح الكافل شتنطرين

گلي الكافل صابوا عينه .. يا زينب گطعوا چفينه
هيّج نيران ... يا خويه
طــف الأحــزان... يا خويه
........................................................................................................

ياريت ولا صارت خويه ولا حشمتك يا عباس
ولا شوفك بالحومه اموذر مهشوم بعامود الراس
روحي بهالحاله شتتصور تتكدر من الأنفاس
يا روح الروح وبغيابك تتشمت ظلت هالناس

من بعدك ياهو اليكفلني . مايخلص يالكافل وني
هجمت عدوان ... يا خويه
طــف الأحــزان... يا خويه
........................................................................................................

لوعايش وتشوف بعينك من هجمت گوم العدوان
اشتعلت بالنيران اخيمنه وينك يا هيبة عدنان
يا خويه فراگك دولبني ما يخمد جمر الأحزان
حرمه وبس السجاد الظل لا وليان ولا خوان

للخالق فوضت أحزاني.. أيتامي وضيعة ولياني
هذا القربان ... يا خويه
طــف الأحــزان... يا خويه
........................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-04 22:35:15 ليلة ٦ محرم الحرام { الأنصار عليهم السلام }
قصيدة ( أَميرُنا حُسين )

أميرُنا حُسين ... نفديــكَ بالدِماءْ
فموتُنا حياة ... في أرض ِ كربلاءْ
...........................................................................................................

كلنا أنصــــارك كتبنالك عهدنا
اليوم لا ينفعنه مال ولا ولدنا
كلمه وانطيناك ما نخلف وعدنا
فدوه كلنا نروحلك يالغالي عدنا

مُحرّمُ الإباءْ ... سيُشهِدُ الفداءْ
فموتُنا حياة ... في أرض ِ كربلاءْ
...........................................................................................................

يا ضوانه شما يجن ليل بظلامه
هالـعـهــد نافــذ الى يوم القيامه
اوياك بس اوياك عشناهه بكرامه
دنيه مگظيه ومواقفنه علامه

مواقفُ الخلودْ ... يَخُطُها الوَفاءْ
فموتُنا حياة ... في أرض ِ كربلاءْ
...........................................................................................................

هاي ثورة موقف وثورة ضمائر
ما نعوفك يا حسين بيوم عاشر
غالي عدنه وبسمك الغالي نفاخر
شوف بالميدان تصريح البواتر

سُيوفُنا هُناكْ ... سترفعُ النِداءْ
فموتُنا حياة ... في أرض ِ كربلاءْ
...........................................................................................................

ما نگول أسماء كلنه بأسم واحد
وبگلب واحد فزعنـــه الله شاهد
جنودك بيوم الوغى وبس انته قائد
عهد بالدم ينكتب لمن نعاهد

ومرحباً نقولْ ... يا عاشرَ الإباءْ
فموتُنا حياة ... في أرض ِ كربلاءْ
...........................................................................................................

حاضرين اوياك من أجل القضيه
والمنيه بشرف لجلك تسوه هيه
وين أكو أحلى امن الشهاده يا منيه
صحنه حي اعله المجد بالغاضريه

طريقُنا معاكْ ... في الأرض والسماءْ
فموتُنا حياة ... في أرض ِ كربلاءْ
...........................................................................................................

حسين ما يمنعنه بس الموت عنك
بينه أبد ميخيب يا مولانا ظنك
للمعارك فن منو الما عرف فنك
كل دروس المرجله اعرفناهه منك

كأنّك الولي ... للنهروانُ جاءْ
فموتُنا حياة ... في أرض ِ كربلاءْ
...........................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید