كتبت استوري على الواتس آب محتواها إن الوحدة مش دايمًا هينة، وإ | 🤍 وَتري || Watary 🤍
كتبت استوري على الواتس آب محتواها إن الوحدة مش دايمًا هينة، وإن في حاجات لا تخضع لقوانين الوحدة، زي إنك تناقش حد إن الحياة صعبة، وإن الرحلة الفردية مميتة. شوية ولقيت مسدج من زميلي؛ _نقدر نسهر النهاردة، ونشيل صعوبة الليلة سوا؟ اترددت أقول إي وبعد دقيقتين قولتله _يلا نشيل الصعوبة سوا.
وكان تقريبًا كل يوم يوم يبدأ كلامه بنفس المسدج، وكي لا أخفي سُرًا؛ الصعوبات كانت بتتمحي لحد ما تدريجيًا اختفت، والأيام بقت أهدى وأخف. كنت حاسة إني خفيفة، ومش لوحدي.
بعد فترة معينة اختفى لأمر معين، مر بيه، دماغي قالتلي: معذور، هو مش مضطر يسمعني كل يوم ويشيل من عليا، أكيد متكلمش عشان الشيلة تقلت. اتكرر الأمر ليومين وبعدها دخلت بعتله: _نقدر نسهر النهاردة، ونشيل صعوبة الليلة سوا؟ عمل سين ومردش، زعلت وقفلت الموبايل مكلمتش حد. ونزلت الجامعة تاني يوم وأنا في مود مش لطيف، ولما شوفته قدامي تجاهلته. خلصت محاضراتي وقعدت في الكافتيريا لقيته جه قعد قدامي. _الأيام صعبة أوي، تيجي نشيلها سوا العمر كله.؟
ابتسمت وهزيت رأسي بالإيجاب. وافتكرت مقولة فؤاد حداد: نمشي الطريق اتنين، الفرحانين اتنين نِقسم لبعض الرغيف، نضحك سوا الاتنين حِمل الليالي خفيف لمّا يشيلوه اتنين.
