2022-07-28 20:04:10
من أمتى وأحنا بنواجه حد؟
إحنا اتعوّدنا ننام عشان ننسى أننا زعلانين وبنصحى من النوم نزعل تاني مش حوار.
-أنتِ فين!
-ماشية في الشارع ببص للناس، بنسى إني زعلانة في روحهم الحلوة، التلقائية، والضحكة ال مش بيصنعوها عشان يمشوا مصلحتهم.
-يا جبروتك نازلة توري انكسارك للناس!
- وانا مش ضعيفة عشان أخاف من الناس.
تفتكري هما مبسوطين؟ كل واحد منهم شايل شيلة قاطمة ضهره ومع ذلك بيتعامل عادي، سايبها على ربنا.
وبعدين ف اى لما اعيط! دة قمة الضعف عندك؟
الحياة مش بتقف على حد. لو بتقف كانت وقفت على كل حاجة اتمنناها وراحت مننا، على كل شخص عزيز علينا وفقدناه.
أصعب غلطة ممكن يغلطها الشخص العاقل الناضج أنه يقارن بين شخص والعالم!
مشيت في الشارع أبص في وشوش الناس، كنت بدور على ال يديني الثقة، يحسسني أني مش تقيلة.
احنا طالبين الأمان واعتقد دى مش حاجة مستحيلة.
حسيت نفسي تعبت فدخلت كافيه.
يظهر أني لوحدي هنا.
كل واحد قاعد مع ال بيحبه.
لقيت ولد وبنت قاعدين سوا و بيتناقشوا بصوت عالي.
البنت مستحملتش الزُعاق ف جريت!
-قوم اطفي النار قبل م تخرب كل حاجة!
-عنيدة ومش بتسمع غير صوتها.
-قولها حاضر وراضيها علطول وبعدها لو قولتلها اعملى اى هتعمله..
-انتى شايفة كدة!
-مش شايفة غير كدة يلا مستني اي.
مشي بسرعة فابتسمت
بصيت جمبي لقيت اتنين اصحاب في عمر الستين -تقريبًا-
وقاعدين بيلعبوا طاولة.
ركزت معاهم وجه في بالي سؤال؛ هل هييجى اليوم ال هوصل فيه الستين وانا مسنودة على صاحب مش بيميل!
هو احنا ممكن نلاقي حد بيستحمل التاني سنة اصلا عشان يكملوا مع بعض عُمر كامل؟
خدني الفضول فقومت من على التربيزة وسألتهم أنتوا أصحاب من امتى؟ واحد فيهم رد عليّا.
-احنا من كُتر ما الوقت عدى وأحنا سوا مابقيناش نعد؟
اتصورت معاهم صورة ومشيت وانا مستغربة ياه للدرجة دي!
هو لسة في ناس كدة!
شوفت بنتين أصحاب بيعملوا مفاجأة لصاحبتهم التالتة كانوا طابعين صورتها وكاتبين عليها "ما تزعليش يا ملك بكرة تروق وتحلى وضحكتك أحلى".
اعتقد دول أكتر ناس عارفين أنها لا هتروق ولا هتحلى بس قدروا يحسسوها أنهم سند ليها وزعلها صعب عليهم زي ما صعب عليها.
وفي نهاية المطاف بنتأكد أننا محتاجين ناس تحبنا بجد مش ناس تمثل علينا الحُب.
احنا مش معقدين ولا نكديين ومش هقول اننا مميزين.
عارفين إن في ناس كتير أحسن مننا بس أكيد في حاجة حلوة جوانا تستاهل تتحب.
أحنا هنا مجرد ضيوف فمش عايزين نمشي من الدنيا من غير أثر فبنحاول نزرعه على قد ما نقدر.
احنا حلوين بكل ما فينا من عيوب ودى الحقيقة ال مش هتتغير للاسف.
#آيه_مصري
1.1K viewsAya Masry, 17:04
