2019-02-19 16:50:37
لو دايما بتحسى بالتقصير وعدم الانجاز و (#جلد_الذات)
ف دكتور نفسى عمل اختبار
طلب من مجموعة متطوعين انهم يخضعوا لاختبار مدروس
الاختبار كالتالى:
قسم المتطوعين لمجموعتبن
جاب ترابيزة عليها طبقين
طبق فيه قطع كوكيز
وطبق ف لفت
وطلب من المجموعة الاولى تاكل كوكيز
وطلب من المجموعة التانية تاكل اللفت
وكلهم متجمعين ع نفس الترابيزة
طبعا المجموعة اللى بياكلوا اللفت كانوا ماسكين نفسهم بالعافية وبياكلوا اللفت غصب عنهم وعيونهم مانزلتش من ع الكوكيز وطول الوقت بيحقدوا على اللى بياكلوا الكوكيز.
اما مجموعة الكوكيز المحظوظين كانوا فى قمة سعادتهم
ومستمتعين جداااا بالاختبار .
الدكتور اوهمهم ان الاختبار خلص كدة
وقالهم هنبدأ اختبار تانى مالوش علاقة بالاول.
الاختبار التانى كان عبارة عن لغز حسابى
الدكتور طلب من المتطوعين انهم يحاولوا يحلوا اللغز
المفاجأة ان اللغز اصلا مالوش حل ، بس كان عايز يعرف مدى صبر المجموعتين وقدرتهم ع المحاولة
ودة طبعا من غير مايقولهم ان اللغز مالوش حل
المفاجأة التانية ان مجموعة اللفت استسلموا بعد 5 دقايق
اما مجموعة الكوكيز فضلوا يحاولوا لمدة 30 دقيقة.
التفسير اللى خرج بيه الدكتور
ان مجموعة اللفت استنفذوا كل طاقتهم وهم بيحاولوا يمسكوا نفسهم ، حصلهم حالة من ((الارهاق النفسى)) خلتهم زهقانين انهم يحاولوا يحلوا اللغز.
ع عكس طبعا المجموعة التانية اللى كانوا رايقين وهاديين وبيحاولوا فى اللغز بمزاج وببال رايق.
نطلع من دة كله ب إيه ؟؟؟؟؟؟
انتى لو ركزتى هتلاقى نفسك طول اليوم بتاكلى لفت
طول اليوم بتتعرضى للارهاق النفسى
مسئوليات ،،، وطلبات ،، وزن الولاد ومسئوليتهم ومشاكلهم ،، ومشاكل الشغل ،، وماسكة نفسك ،، بتحاولى ماتتعصبيش ،، كلمة رخمة من زميلتك ،، ،، موقف استفزك ،،عدم تقدير من المقربين ليكى ،، معاملة لا تليق بيكى ،، خبر وحش ع النت ،، حال البلد ،، الاسعار ،، ومشكلة هنا وسوء تفاهم هناك ،، وكلامك يتفهم غلط
،، وتتصدمي ف ناس وتاخدي موقف من ناس حاجات كتيرر
هى الحياة كدة اكترها لفت
وبعد دا كله بتيجى اخر اليوم تقولى هو انا مابعرفش انجز حاجة فى حياتى ليه ؟؟؟؟؟؟!وتفضلي تجلدى نفسك
طبعا الله يكون فى عونك من اللى بتشوفيه.
طيب ايه مفيش حل ؟؟؟؟؟
(( قبل الحل،، لازم تقتنعى انك مش مقصرة،، انتى فعلا مرهقة ،، ومتحمله مسئوليه كبيره وعليكي ضغط من كل اتجاه سواء الاولاد وزوجك وشغلك واذا كان ف دراسه او او ....ماتجلديش نفسك تانى ابدااااااااااااااااا ))
•••الحل حاجتين
اول حاجة
هتحاولى ماتتأثريش بالحاجات دى
ماتدخليهاش جوة قلبك
طنشى الحاجات الصغيرة اللي ممكن تعدي عادي .
ف فرق انك تطنشى بجد وانك تعملى نفسك مطنشة
لانك لو عملتى نفسك مطنشة كدة انتى بترهقى نفسك زيادة
التطنيش مهارة يمكن اكتسابها ولازم تتدربي نفسك عليها وتبقي اسلوب حياه بالنسبالك
محتاجة بس قرار وشوية محاولات
طنش ،، تعش ،، تنتعش
الحياة اصلا مش مستاهلة والله ما مستهاله.
دة بالنسبة للحاجات الصغيرة هنطنشها
طيب بالنسبة المشاكل الكبيرة اللى ماتنفعش نطنشها؟؟
الحل ف الاية دى
وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ”
مع ركعتين فى جوف الليل والدعاء وانك تعملي كل اللي عليكي وبعدها تسلمي امرك لله هو عارف وقادر ع كل شئ وخلصت.
ربنا أكبر من المشكلة
والزعل وضغط الاعصاب مابيحلش مشاكل......
•تاني حاجة
لو مقدرتيش تعملى الخطوة اللى فاتت ع اكمل وجه
و ف حاجة مش مريحة دخلت قلبك فعلا ،، وسببت ارهاق
تخلصى من الارهاق فورا
وماتخليش ف فرصة انه يحصل تراكمات.
ازاى اتخلص من الارهاق؟؟
اعملى لنفسك switch off
افصلى
اقعدى فى هدووووووء
اسمعى قرآن
صلي ركعتين
اسمعي موسيقي بتحبيها او اغنيه
اقراي كتاب لكاتب بتفضليه
اعملى جلسة استرخاء ( شوفيها ع اليوتيوب)
تنفسي بعمق
خدي شاور دافي وغرقي نفسك برفوم وريحه حلوة
كولي شيكولاته لو بتحبيها او اعملي لنفسك اكله حلوة
اشربى قهوة
اكتبي ،،، عبري عن كل اللي جواكي ف حروف وولعي ف الورقه بعد متخلصي والله هترتاحي
اعملى اي حاجة بتحبيها متفكريش كتير ومتعذبيش نفسك كتير الحياه اقصر من كل الدوامه والعك اللي بنتوهه جواه دا #كووولي_كوكيز
#
3.6K viewsMoon, 13:50
و
