2021-12-14 15:38:20
إزاى أحل مشكلة المذاكره والسرحان وقلة التركيز ولما أذاكر حاجه أفضل فاكرها وقت طويل؟ ...
بإذن الله هنحل المشكله دى ببساطه وإنت بنفسك بعد فتره هتلاحظ فرق شاسع
١_ قبل ما تذاكر أى ماده لازم تتخلص من الفون بأى شكل، لو عليه مثلا حصص أو هتحتاج تنقل من عليه حاجه إنقلها الأول أو إبدأ بالماده دى خلصها وبعدها إبعدوا عنك مسافه أكبر ما يمكن وطبعا تعمله صامت علشان ميشتتش تركيزك .
٢_ قبل ما تبدأ مذاكره احرص دايما تكون على وضوء وياسلام بقا لو صليت ركعتين بنيه إن ربنا يرزقك الفهم ويسهلك المذاكره ويبارك في وقتك هتفرق معاك جامد وهتلاقي بركه في وقتك لا يمكن تتخيلها ،بعد كدا تدخل على المذاكره بوضوءك تمسك المصحف وتقرأ لو نص صفحه بس من المصحف ياسيدى آيه واحده والله هتفرق معاك جامد وبعدها استغفر ٥مرات فأكثر لإن أول اسباب عدم التركيز والنسيان بتكون الذنوب فإنت تتخلص من أى حاجه تقف في طريق تركيزك .
٣_ندخل بقا على المذاكره ،النظام هيظبطلك الدنيا وهيخليك تخلص أكبر كم في أقل وقت ،يعني مثلا هتجيب ورقه وتكتب فيها عندك مذاكره كام ماده تحت بعض وجنب كل ماده تحدد وقت تخلص فيه الماده دي يكون وقت مناسب جدا تخلص فيه وتكتب جنب كل ماده درجة صعوبتها يعني سهل ،صعب ،صعب جدا وهكذا ،تبدأ بأسهل ماده فيهم هتعطيك طاقه إنك تكمل وفي نفس الوقت هتخلص بسرعه وهيبقي الوقت كبير قدامك ،بعد كدا أصعب ماده علشان تلحق تركيزك وهو في الأول بعدين سهل بعدين صعب ،يعني ماده سهله بين مادتين صعبين علشان طاقتك ما تقلش وتكمل للآخر .
٤_ الماده اللى تحس انها هتاخد وقت كبير جدا وممكن تيجي على كل المواد خليها في الآخر بس بشرط يكون المواد التانيه بسيطه وهتخلص بسرعه علشان مياخدوش تركيزك كله وتيجي على المهم وتتعب ،هتيجي قبلها وتصلي ركعتين أو تستغفر أو تصلي على الرسول صلى الله عليه وسلم أو تساعد أهلك ،إعمل اي خير بنيه إن ربنا يفتحها عليك وتخلصها بسرعه وبإذن الله هتخلصها في وقت قياسي .
٥_بعد ما تخلص كل ماده تدعي الدعاء دا "اللهم إنى استودعت ما ذاكرت عندك وانت خير من يرد الودائع" وخلي بالك لما تيجي تراجعها تاني هتقول "اللهم إنى أسئلك ما استودعته عندك فرده الىّ ردا يليق بكرمك يا أكرم الأكرمين"
٦_في امتحان او اي وقت خايف فيه وحاسس انك هتنسي أو متوتر دايما يكون معاك الدعاء دا "اللهم إنى فوضت أمرى إليك وأنت خير وكيل فدبرلى أمرى فإنى لا أحسن التدبير" واتفرق على المعجزات اللى هتشوفها .
٧_ حاول دايما لما تيجى تذاكر تبعد عن مكان النوم وتستقيم في جلستك كدا وتستحضر كل ذره تركيز عندك ،لو حسيت نفسك بتسرح كتير استغفر وقول"اللهم إنى أعوذ بك من الشيطان ونفثه وهمزه ولمزه"
٨_ وأخيرا يا صديقي علاقتك بربنا ثم علاقتك بربنا مفيش حاجه هتتيسر معاك الا لما تصلح علاقتك مع ربنا ،صلاتك اهم حاجه ،تجنب انك تزعل أهلك وخصوصاً الوالده لإن روحك في ايدها ومش هتوصل لحاجه من غير رضاها فضلا عن أن رضاهم مرضاه لله ،فحسن علاقتك معاهم وخليهم دايما يدعولك
٩_ساعد غيرك علي قدر الإمكان ،بمعنى لو حاسس انك مش قادر تذاكر ساعد حد أنه يذاكر وفيده بمعلومه تعرفها تأثر معاه ساعتها هتلاقي أضعاف اللى قدمته في تسهيل المذاكره عندك والتوفيق فيها .
١٠_ أغلبنا بيخاف من الحسد وبيبقي عنده خوف انه يتكلم قدام حد أو حد يعرف عنه انه بيذاكر طبيعي الحسد مذكور فى القران بس لو عايز تحس بأمان وتتخلص منه ومن اي حاجه تضرك عليك بسوره البقره يوميا وهتقولي صعب هقولك والله مافي حاجه صعبه جرب بس وانت هتتعود وهتبقي حاجه اساسيه في يومك وطبعا الأذكار مفيش كلام حصّن نفسك من كل حاجه .
أتمنى تكون استفدت وصدقني الكلام دا لو نفذته هيفرق معاك جامد وهتلاقي فرق كبير جدا ومفيش حاجه صعبه احنا اللى بنوهم نفسنا بكدا ،جرب وشوف بنفسك ،وطبعا متنساش تبعت البوست لأى حد عندك خصوصا الثانويه العامه لإنهم فى أمس الحاجة للكلام دا ومش محتاج أفكرك إن أى حد هيعرف الكلام دا بسببك في ميزان حسناتك ،فالدال على الخير كفاعله .
_https://t.me/youdecide0
#رحلة_صعود
#هنحلم_هنوصل_هنكون
83 views12:38
ر
