2022-02-23 04:27:31
٢٢/٢/٢٠٢٢.
تاني ليلة مبنتكلمش فيها، شدينا مع بعض في خناقة وحسيت إن المرادي هنخسر بعض فعلاً.
معرفش ايه السبب، احنا عِندنا مع بعض وكل طرف فينا رفض يلين قدام التاني، اتعصبنا وزعقنا قصاد بعض لحد ما الفجوة بينا كبرت..
اتنفضت على صوت مسچ منه :
-" ازيك!"
قلقت، بطني اتنغصت، حسيت إنه هيطلب نبعد وان خلاص دي نهاية علاقتنا، أنا كل اللي إتخانقوا معايا بعدوا ..
أنا بعترف اني عندية وعصبية، بس كل فعل أو كلمة بيطلعوا مني بيكونوا من غُلبي مش أكتر..
رديت عليه وجسمي بيرتجف جامد:
- عايز تبعد عني، صح !
المسچ اتشافت في وقتها، بطني بدأت توجعني ونبضاتي زادت ، بدأ تايبينج وأنا خوفي بيزيد..
مش عاوزة أخسره، هو الوحيد اللي فهمني واحتواني،
هو الوحيد اللي قِبلني..
فضلت باصة على إسمه وكل نبضة قلبي بينبضها حاساها مِسمّعة في البيت كله، سمعت صوت المسچ أخيراً ، أخدت نفس عميق وفتحتها :
- الخلاف لو اتعمل .. ف هو اتعمل علشان يقرب ما بينا، علشان يخلينا نفهم بعض .. مش علشان يبعدنا.
عمري ما هعرف أبعد، مش هلاقي أحن منك، مش هلاقي حد أطمن معاه زي ما بكون مطمن معاكِ، مش هلاقي حد بيكتبلي حلو زيك ..
شوفت المسچ وبدأت أعيط، أول مرة من وقت كبير أحس بالحب والأمان اللي حاساهم معاه، كنت مخبية علاقتنا عن الكل علشان خوفت منكملش .. بس هو مخيبش أملي، مسكت الموبايل ومش شايفة من كتر دموعي علشان أتفاجئ بمسچ تانية منه:
- تتجوزيني!
مقدرتش أستوعب طلبه حتى علشان أرد بسرعة:
-مش وقت هزار بايخ على فكرة!
- ومين قال إنه هزار ؟
- أسبوع بالكتير وهكون قدامك أنا والحاجة وعلبة قطيفة حلوة كده زيك ..
خلافتنا دي هنلمها في بيت واحد.
وقفت أتنطط مكاني وأنا بعيط زي المجانين بالظبط،
لأول مرة في حياتي أختار صح، لأول مرة يومي وحياتي يكونوا مميزين بالشكل ده.
-النهاية.
#حياه_حسن.
34 views. ., 01:27