2022-08-01 15:33:28
اساسية محرم ١٤٤٤ هـ
خليتني اقره
يحسين لو مامجلسك ما سوه ذره
شكرا حبيبي لهل الثقة وخليتني اقره
شايل ذنب مثل السهم وانته احسبتني من الخدم
وخليتني اقره
•~•~•~•~•~•~•~•~•~•~•~•~•~•~•~•~•~•~•~
ذيج السنه المرت جنت خادم واجيلك
بس ياحسين شكم ضرف مر وشتكيلك
مقصر وياك ولو عمر ما رد جميلك
هاي السنه وبكل سنه وداعت عليلك
گـليلات مالتي الك والكثره انته
وشكم ذنب بيه لجن انته غفرته
اطهرني بس نار الخيم وانته احسبتني من الخدم
وخليتني اقره
•~•~•~•~•~•~•~•~•~•~•~•~•~•~•~•~•~•~•
عايش عله الله ومجلسك ودموعي لجلك
شمـا ابـجي الك ماقـدمـت وبـيه بعدلك
تجـازيـني وشما قـدمت سبحان عدلك
لو مو ملك كون وعلي لا ما ابدلك
لا ما اعوفك يالنفس يالروحي بيه
حتلوا مقابيل العمر يابو رقيه
من دونك اني من العدم وانته احسبتني من الخدم
وخليتني اقره
•~•~•~•~•~•~•~•~•~•~•~•~•~•~•~•~•~•~•
بـالمـنبر اقـبل لـو عـلـگ مشدود منك
بس كون اضل بمجلسك وبحسن ضنك
ماطول راضي انته علي ما جوز عنك
يالكلشي بيه يحن الك ياكلشي جنك
الله خلقني لخدمتك ولكربلائك
يعني اني جندي لحضرتك وارثي دمائك
شمحلاها الك يبن الكرم وانته احسبتني من الخدم
وخليتني اقره
•~•~•~•~•~•~•~•~•~•~•~•~•~•~•~•~•~•~•
للخدمه اضل عازم الك ناذر حياتـي
يحسين ذمه برگبتي ولحد مماتي
وكلما تجي بالي بعطش تنشف لهاتي
وتفز دموعي واذكرك ماكف يغاتي
بلا غيم ينزلك دمع سر بعيونـي
طاريك يمر وحده وتنگع جفونـي
طاريك بقلبي انرسم وانته احسبتني من الخدم
وخليتني اقره
•~•~•~•~•~•~•~•~•~•~•~•~•~•~•~•~•~•~•
لمجلس عزائك من اطب شايل مصابك
وجايبلك ادموعي حزن ادري بعذابك
اتمنى كاع وانسحك واذكر ثيابك
لو اصير شمعه واحترك واكف ابابك
من دون بابك ياذهب محد عرفني
وجا هسه روج المو سهل عنك جرفني
جا امري من بعده انحسم وانته احسبتني من الخدم
وخليتني اقره
•~•~•~•~•~•~•~•~•~•~•~•~•~•~•~•~•~•~•
ماسوه من دونك ولا كلشي بطـفوفك
بعالم الذر شفتك ضوه وشلون اعوفك
كعبه غرامي انته اصبح ويوميه اطوفك
لو يمي كل لحصه انحني والثم جفوفك
هنيالي يحسين والك صاحب عقيده
ومفـتهم انت السيد واحنه عبيده
انته بعرش قلبي الاهم وانته احسبتني من الخدم
وخليتني اقره
•~•~•~•~•~•~•~•~•~•~•~•~•~•~•~•~•~•~•
زين العابدين الشمري
88 views12:33
ا
