♡ .. موضوع مهم .. كل طلعة اطلعها اضل صافنة ع الاشياء الي اشو | 𓆩 آلَعٌبأءهہ آلزيـنبيـهہ رمـز آلعفهہ 𓆪
♡ .. موضوع مهم .. كل طلعة اطلعها اضل صافنة ع الاشياء الي اشوفها بالمجتمع واكول لو ضالة بالبيت احسلي .. اتفاجئ من بنية وبأعظم المصائب تخلي مكياج او لبس غير مستور او اصلا مامحجبة او عيونهة زايغة ( تتلفت منا ومنا ) .. مثل مانكول ..
ملاحظة : هاي الاشياء المفروض ماتصير بكل وقت مو بس بمحرم لاتعاملون محرم كَموسوم انو هاي هية انة ابجي والطم بمحرم ومااسمع اغاني وتالي ورة محرم انسة الامام الحُسين وانسة كلشي وارجع لذنوبي " كونوا حُسينيين صادقين في كل وقت " .
اكول ياربي هاي الاشياء كلهة جاي تصير بمجتمعنة وهاي الافعال والذنوب الي نسويهة كلهة ونريد الامام المهدي عجل الله فرجه يظهر …؟! ماتحسوون جاي نجاهر بالمعصية وكأنوا ماكو ورانة مووت .. انتي البنية مافكرتي وشغلتي عقلج شوي وكلتي فلنفرض انة بهذا اللبس وهذا المكياج وسويت حادث ومتت .. شلون راح اقابل رب العالمين وشراح أكلة من يسألني ؟! لو وين انطي وجهي من عتاب سيدات الخدر مولاتي فاطمة الزهراء ومولاتي زينب ( عليهُن السلام ) .. انتبهي ترة السالفة مو لعب فكري بآخرتج وترة شكد ماتكونين ملتزمة ومتدينة راح تكون الج قسمة حلووة من رب العالمين تليق بألاتزامج وتدينج و ع فكرة الشاب مايحب البنية الي تعرض روحهة صح بعض الشباب يلعبون ويسوون بس نهايتهم ياخذون بنية متدينة تحافظ ع بيتة بغيابة وتصونة مو بنية يستحي يطلع وياهة ويخاف يطلع من البيت خاف كلشي يصير .. البنية كلما تصون نفسهة وتحترم نفسهة راح تلكة اليحترمهة واليصونهة .. ماكول انة مثالية وماعندي اخطاء لا بالعكس خطأت هواي وتعلمت من خطأي .. العبرة مو انو انتي ماتخطأين لا العبرة انتي تخطأين وتصححين الخطأ مو تضلين مُصرّة عليه .. !
♡ - هسة تجيني وحدة تكلي ترة الحزن بالقلب مو باللبس ..! وياج انة بس اذا انتي الامام ماحزنتي عليه ظاهريا وماظهرت عليج معالم الحزن تردين تحزنين من الداخل .. ترة هاي واكفة ..! واكو فئة ثانية عبالهم عاشوراء بس لبس الاسود ويرحون يخدمون ويلطمون ! .. والتصرفات ؟! انتي بالشارع كاضيتهة بس تضحكين .. ! .. هو هيج الامام كلج لبسي علي اسود وطلعي سوي المحرمات وارتكبي ذنوب ع ابو يابة انتي حزنانة وبعد وبعد هسة تجيلنة المشاية ونسمع كلشي ونشوف الماشايفينة بين الطرفين وين الحزن وين الالتزام وين ووين ووين ...!
المهم من شفت هذا المنظر وهوواي مناظر جاي اشوفهة كلت لأمي احنة نستاهل الامام الحُسين يضحي علمودنة لو نستاهل السيدة زينب ونساء اهل البيت ينسبن حتة امثال فلانة وفلانة تمشي وتعرض روحهة ، وترة هاي الشغلات راح تخلي مستوى المجتمع يهبط الى درجة مانتوقعها ..!
- خلي اكلج شغلة انتي فاهمة قضية الامام الحُسين غلط ومافاهمة رسالة السيدة زينب .. راجعي نفسج .. ! + ع فكرة ترة نظرة بعض الشباب ماترحم .. بس لو تعرفين نظرة الشاب الج .. جان صار عندج حياء حتة من اخوج او من المحارم .. ! ترة انة اشوف حتة النظرة الاولى للشاب الج ( النظرة الاولى الي تكون بالشارع ) هم ماترحم .. والحياء عند الطرفين بالفطرة .. بس اكو حتة الفطرة مالتهم يقتلعوها بتصرفاتهم وكثرة الذنوب ..!
- اخواني اخواتي انتبهوا ع نفسكم و ع تصرفاتكم ترة انتوا بهاي تصرفاتكم راح تنقلون صورة مو زينة ع القضية الحسينية والمذهب الشيعي بشكل خاص .. هذا الكلام بشكل عام بس حجيت اكثر شي وية البنات لان احتمال اكدر اوصل لعقلهن .. بس هو كلام عام للكل .
( مع احترامي لبعض الشباب الي يتخلون ع الراس والاخوان الرساليين الي ما اقصدهم بالكلام الفوك وكلت " بعض الشباب " وهم مع احترامي للبنات الي جاي يسون الي عليهن حتة ينقلن الرسالة الصحيحة للسيدة زينب عليها السلام وقضية الحُسين بشكل عام ) .
