قصائد حسينية مكتوبه

2023-12-24 10:26:54 قصيدة ( اعتذر منچ يزينب ) وكأن ام البنين تعتذر لأنها كانت تتمنى أن لها بنت ذهب اسيره بدل السيده زينب عليها السلام



اعتذر منــچ يزينــب يمه مــا عندي بنات
دونچ يشدون اديهن عالهزيله امسلبات
قدمت أربع ولد ظني ابو اليمه يرد
يمه مــا عندي بنات

*-----*-----*-----*-----*

دمعي أسيله يــالعقيــلـه بـأعتــذاري
حسره عمري ناري تسري أه ينــــاري

ريت كــل هاي المصيبه المرت بطف كربله
عندي كــون ابنيه دونــچ بالمصايب معوله
وتنظــر إخــوتهـا ضحــايا اربعتهــم بالفــلا
وســالم حسين وبنينه وكــل بناته وكل هله

ولدي كون الطـف ذبحهم عالرمــال امگطعــين
وسالم ابن الزهره يرجع والله يمه تگرلي عين
ابــد مـــا همنـــي البعـــد ظنـي ابو اليمه يـــرد

*-----*-----*-----*-----*


لا كفيلـچ وحشــه ليلـچ يمـــه زينب
والظلامه بس يتــامــه كلها تنحب

اخ مــن ليــل الفجيعــه مــن بعـد حــرگ الخيّـم
بنتي كــون بحيــره دونچ تجمــع أطفـال وحـرم
وكــون مــو أنتـي الصرختي وينــه شيال العلم
بنتي كــون الي تنادي وجــدها ريته ألي أنشتم

يعينج الله أعلى الفجيعه شطولـه ياليل اهدعش
حــرم مذهــوله ويتـامه وخوف وهموم وعطش
المــن ايتــامــچ تصـــد ظني ابو اليمــه يــرد

*-----*-----*-----*-----*

والله حيره يـالامــيــره بهل الرزيه
بلا عشيره أنتي أسيره من ال اميه

كون مــو أنتي السبيه بنتـي راحـت للسبي
وشمر ريته يشد أديها يگلها عالناگه اركبي
وسـوط البمتنچ عليها وسالمـه بنـت النـبي
وريت مو أنتـي أسيـره يا أبــه و قبلة عبي

كون مــو چفــچ يـزينب والله ينشـد بحبال
ريت عندي ابنيه دونچ والله يربات الدلال
وفاگــده إخــوان أولــد ظني ابو اليمه يرد

*-----*-----*-----*-----*

اه يوسفه والله كلـفــه والله بـلـــوه
يــا ألمها شكبره همها الفگدت أخوه

حيرت السوگ ومصابه كون مــو بيـچ اليمـر
والله يــا يمــه يزينــب الــچ ميلـوگ اليسـر
ريت عندي ابنيه دونـچ واگفــه بحــر الظهـر
وريت مــو أنتي الدخلتي بنتي دخلـت للقصر

والشماته تصد عليها والـچ مــا واحـد نظـر
فــدوه انه وكل بنيني وما يمــر عينـچ سهر
ومحــد لچفــچ يشــد ظني أبو اليمه يــرد

*-----*-----*-----*-----*

يا مصابه بالخرابه شكبره صبرچ
والرزيه من رقيه حسره عمرچ

والله صعبه بت محمد بالخـرايب مــن تبات
يساعــدچ الله يــزينب يــا عظمـها النايبات
كــون بنتي بحيره ظلت تجمـع أيتام وبنات
وتگعــد بدمعتها تنعه يســاعد الله الفاگدات

تصـبــر بدمعــه رقيـــه تگلها ما مات الحسين
بس ابو فاضل وإخوته عالــرمال مگــطعيــن
فــدوه طعنــات الچـــبد ظني أبو اليمه يــرد
*-----*-----*-----*-----*

الشاعر موسى البديري

https://telegram.me/aabas78
قصائد لكل ايام محرم اشترك بالقناة باز کردن / نظر دهید

2023-12-17 18:30:58 دفعو عالزچيه الباب والبـــــــسمار لاگــاها

ثگـيل الباب چــــــــــان ولاگته الزهره
وشهگت مــــــــن كثر ماتوجع العصره
عرش الله انكسر بس ياهي من كسره
الله يعين حــــــــــــــيدر مانفذ صبره

من گالو وآن بالبيت وام البـــيت سطروها

بيت ام الحــــــسن بيت الله واسراره
وحامي الجار بيته احتــرگ من جاره
حيدر عالمصيبه مــــــــــــاطفت ناره
من يمته علي مـــــــــــــايفزع الداره

حيف الشالع البـــــيبان وادم تدفع ابابه

صاحت فاطمه يافضــــــــه سنديني
بالگوه احچي مــــن كونچ تسمعيني
مابيه اعله شيل اجـــــدامي عينيني
بسمار وخشب وضـــــلوعي تاذيني

شاغت روحي بالدفعات والدخان عاميني

دلوني اعله گبره وانفــــــــض اترابه
اريد اشكي لبوي اشــسوت اصحابه
يدري ابفاطمه مهضــــــــومه بغيابه
بسمار بضلعهه ويلچـــــــــم اصوابه

ماغمض جفنهه الليل ام حسين موجوعه

بالباب الزلم والبــــــــــيت بيه حرمه
وهيه فاطمه بــــــــــت آشرف الآمه
من عصروها طاح المحسن امن امه
والمكسوره وين اولـــــيدهه اتضمه

مالحگ عله الكاروك محسن طلّعو روحه

خادم القصيده
شاكر الصيمري

https://telegram.me/aabas78
قصائد لكل ايام محرم اشترك بالقناة باز کردن / نظر دهید

2023-12-17 10:49:22 https://vm.tiktok.com/ZM6MEwdK9/ باز کردن / نظر دهید

2023-12-15 22:47:27 نزلة لمولاتي فاطمة الزهراء عليها السلام

بويه ما رحموني
ابچي دم خلوني
.....................
فاطمه آنه العفتهه بالظلع موجوعه
ما دريت اصّار بية ثاكله ومفجوعه
ما شفت راحه بغيابك لوعه تتبع لوعه
لا تظن يرتاح بويه الينجرح بظلوعه
من رحت هضموني
ابچي دم خلوني
.....................
تحوّلو عــدوان بويه من غبت اصحابك
نكشفو ونقضوا عهدهم ما رضوا بكتابك
بويه يومين عله دفنك من غبت بترابك
هجموا بنار السقيفه بويه حركوا بابك
فاطمه واذّوني
ابچي دم خلوني
.....................
بويه اعرفه اللي عصرني والسطرني ابعيني
فاطمه گالوله گلهم "وأن" ما تعنيني
حرگ بابي ومن دفعني قاصد يأذّيني
عن علي ابقه ادافع والله ما يثنيني
ما سألت شلوني
ابچي دم خلوني
.....................
الله لا ينطي العصرني الله ياخذ روحه
صابني وطيّح جنيني ما كمت مجروحه
بياذنب ظلعي يكسره ودمعتي مسفوحه
والله من يوم السقيفه عترتي مذبوحه
همهم يقتلوني
ابچي دم خلوني
.....................
من ألم ظلعي يبويه صعبه اجر نفاسي
ما عشت چم ليله بعدك يا اعز كل ناسي
بويه من كثر المصايب والله شيّب راسي
كل دقيقه تمر علية ينجرح احساسي
بياذنب ظلموني
ابچي دم خلوني
..........................
كلها عافتني يبويه بس علي اليرعاني
من يجي يرتاح ظلعي والألم ينساني
بويه وصّيته بوصيّة لو متت بحزاني
لا يشيّعني الظلمني بالأخصّ الثاني
انهظم يردوني
ابچي دم خلوني

الشاعر سيد زيد الفحام


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2023-12-11 22:35:36 وين رايح يا علي بجنازة أُمي
لا تخليها بگبر خليها يمي
مو بأي مكان
منبع الحنان
خليها يمي
...,...
بويه هاي الربّت وتعبت عليه
هاي أُمي والهوه الأشتمه هيّه
عگب ذيچ إسنينّه الخلصن سويه
شلون أعيش بدنيه ما بيها الزچيه
* بويه راحة بالي مشيوله على المتون
* تروح روحي وراحتي لمن تروحون
وافقد الامان
منبع الحنان
خليها يمي
...,...
أدري يا بويه اليموت إكرامه دفنه
بس يبويه اللحد مو لأهل المحنه
الِحنان إنريدهم يا بويه يمنه
وماكو حنّيه مثل حنّية أُمنه
* كون النحبها تعيش إبين الاحباب
* مو نوسّدها اللحد وندير التراب
ريحة الجِنان
منبع الحنان
خليها يمي
...,...
أخذوني أنامن يا علي وياها بلحدها
رايده اشبگها وأحط خدي على خدها
وحتى أسليها من إتحن إلوِلِدها
خاف تستاحش إمن إتظل إلوحَدها
* أمي راح إتظل عليك عيونها تصد
* يا علي يا بويه من تدفنها وترد
وياها موتي حان
منبع الحنان
خليها يمي
...,...
يا علي من شلت الجنازة وخذتها
ودّعِت أُمي وفرحتي ودّعِتها
راح أحن إلگعدة الأُم ويه بتها
ونظرة الزهرة الحنينة وسالفتها
* وراح أشتاگ لملامحها وحچيها
* والوقار العدها والسبحة البديها
وعِشرة من زمان
منبع الحنان
خليها يمي
...,...
بويه لسه عيوني ما شبعانه منها
وشينشفهن بعد لو فارگنها
مشت مكسورة ضلع وأزرگ جفنها
أُمي ماتت من ألمها ومن حزنها
* أُمي بالتابوت وعلى الخد دمعها
* بهيده شيلوها لان كسروا ضلعها
يصرخ اللسان
منبع الحنان
خليها يمي
...,...
الشاعر سماح الجنابي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2023-12-07 07:19:55 امشونه انشيع القاسم..يخدام
...
يم بابه نون وانهل دمعنه
غريب القاسم ويومه فجعنه
ال البيت ننصرهم طبعنه
صارلنه بمجالسهم الف عام
امشونه انشيع القاسم يخدام
...
ياغربه الخذت منه حياته
مات وهوه متغطي بعباته
ماحظرو إخوته ولاخواته
امشونه انشيل الاجنازه عله الهام
امشونه انشيع القاسم يخدام
...
امشونه الحظرته وذيج المناره
انفرح گلبه وانرد اعتباره
حان الان ميقات الزياره
يشيعه وللمجالس شدو الاحزام
امشونه انشيع القاسم يخدام
...
القاسم ينتظرنه ولاتقصرون
كون ابمرقده مجلس تسوون
وي الزهره فد لطمه تلطمون
اذكرو غربته وكل ذيج الايام
امشونه انشيع القاسم يخدام
...
يسقي الماي عشر اسنين ياناس
ماخذ هالطبع من عمه عباس
كاللهم عله اسمه بآخر انفاس
آنه ابن الرساله واصل الاسلام
امشونه انشيع القاسم يخدام
....
ابن الكاظم آنه القاسم اسمي
جدي احسين والعباس عمي
ابنيتي فاطمه اتذكرني بأمي
اخذوهه للمدينه الدار الاكرام
امشونه انشيع القاسم يخدام
...
كلمات محمد الجماسي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2023-12-07 07:04:06 (قصيده للقاسم ابن إلامام الكاظم عليه السلام )

للغريب ٠٠ اتعنّه واگصد داره
للغريب ٠٠  ينجه كلـمن زاره

☆☆☆☆
بالروايــــــه الوراده عن الرضه
نجل الاطهار وحليف الموعظه
الما گــــدر لزيارتي وبيها حِظه
زيارة القــــــاسم اكيد اتعوّضه

للغريب ٠٠ أخذ مـــن اسراره
للغريب  ٠٠ ينجه كلـمن زاره
☆☆☆☆
للغــــــريب اتعنه واذكـر غربته
الف هنيــــــاله الحظه بزيـارته
ابن موسى شكثر سالت دمعته
لون عن اسمه انسئــل يالوعته

للغريب ٠٠ تنشكــــــر زواره
للغريب ٠٠ ينجه كلـمن زاره
☆☆☆☆
خلص سنين العمــــر عايش غريب
جرحـه مايشفه بدوه ولا يد طبيب
ينتمي الأشرف نسب جده الحبيب
كاظم الغيظ الابـــــــو اصله نجيب

للغريب ٠٠ گلبي وجت ناره
للغريب ٠٠ ينجه كلـمن زاره
☆☆☆☆☆
كله تقوى ابن الامــــام الســابع
يکضي ليــــله بين ساجد راكع
بين ايد البــــاري يوگف خاشع
ويمشي مابين الخلگ متواضع

للغريب ٠٠ اتّبـــــــع آثـــــاره
للغريب ٠٠  ينجه كلـمن زاره
☆☆☆☆☆
گبره للــــــوادم صبح قبله ومزار
والطيـــور بصحنه ننظر كل نهار
ياضريحه الصار خيمه ومستجار
ورايه خفـــاگه تسر عين الي زار

للغريب ٠٠ اقطف امن ازهاره
للغريب ٠٠ ينجه كلـــمن زاره
☆☆☆☆

حيدر بشار الدراجي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2023-11-27 19:21:52 بالسمه الأملاك نصبت فاتحة
لرحمة الله الليلة فاطم رايحة
قطعة مكتوبة بدمه
اليوم ماتت فاطمة
لرحمة الله الليلة فاطم رايحة
.............

ماتت اليوم الوديعة هل شفيعه الما رحم بيها الدهر
يا محمد ما رعوها شتموها نسطرت وعالخد أثر
الزهرة محتارة بوضعها يهل دمعها والضلع منها انكسر
ونت السبعة أعلى وأنها يا حزنها ما جرى لكل البشر

ما تفارگ يوم دمعة عينها
ثمنطعش خلصن مرار سنينها
والضلوع مهشمه
اليوم ماتت فاطمة
لرحمة الله الليلة فاطم رايحة
..............

بالسمه جبريل ناده بهل شهادة لفاطمه نزل چفن
الشداد السبعة ناحت حين طاحت وره الباب أم الحسن
آسيا ومريم العذره على الزهرة للمصاب شگد بچن
بس الم خلص عمرها بگد صبرها ما رحم بيها الزمن

بالدمع تكتب حزن بعتابها
باب مئسات ومصايب بابها
كل عمرها مألمه
اليوم ماتت فاطمة
لرحمة الله الليلة فاطم رايحة
...............

يا علي بكل شده تحضر انته تگدر ما تقصر ادري بيك
چفك الي قلع خيبر ها يحيدر باب ما يصعب عليك
سيف ذو الفقار يمك زاد همك والوصية مچتفه اديك
عصى موسى سيفك انته لو شهرته يلتهم كلمن يجيك

سمعو شوصه النبي بغيابه
علي يصبر خلي نحرگ بابه
من السقيفة الظالمه
اليوم ماتت فاطمة
لرحمة الله الليلة فاطم رايحة
..............

ماكو گبه ولا منارة لا زيارة وين مدفونه البتول
گبر للزهره نتمنى ونتعنه المسافة شما تطول
مبني گبرچ يمته نسمع حتى نطلع مشي يا بنت الرسول
لو ظهر يوسف الزهرة احنه بأمر تحت أمره شما يگول

من يجي المهدي ويسل بتاره
الذابحه البسمار يأخذ ثاره
المهدي راعي الموزمه
اليوم ماتت فاطمة
لرحمة الله الليلة فاطم رايحة
..............

بگبتچ من نشيل أدينه لو دعينه الله ميرد الدعاء
انتي للمذنب شفيعه يالوديعه جاعلچ رب السماء
يالبتول اسمچ شكبره شعضم قدره بي تردد أنبياء
ياهي مثلچ أم أبوها ما رعوها البيچ خانو أدعياء

الله يلعن كلمن تعناها
تبت أيده لعل ضلع عصراها
وشغل ناره المضرمه
اليوم ماتت فاطمة
لرحمة الله الليلة فاطم رايحة
.............

حسين ألفيصلي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2023-11-23 16:49:38 يمته...راعي الأمر يعلن قراره
بينه...كسر الضلع ماتطفه ناره
يوم الزچيه...أعظم رزيه

كل لوعه صِحنه اتهون بس لوعة الباب
من نذكر الزهراء يلچمنه الاصواب
ياحسرة العمر..يالوعة الهجر
كسر الضلع جمر..بگلوب الاحباب

أبداً ...متمر مثل هاي الفجيعه
نصرخ...مضلومه يالزهره الوديعه
شافت أذيه...أعظم رزيه
كسر الضلع ماتطفه ناره

محسنهه يكبر عود چانت أملهه
مالحگ المظلوم يُمَّه يگلهه
وبعصرة النذل..ماطوَّل الحَمل
دمعتهه تنهمل...وي دم طفلهه

ويلي...صاحت يفظَّه سَنِّديني
ماضل...حيل انهض ابطيحة جنيني
اول ضحيه...أعظم رزيه
كسر الضلع ماتطفه ناره

عالمرتضى الزهراء تخفيهه الآلآم
وعالجانب المكسور ماتگدر اتنام
والصعبه تنجرع...كل لحظه تنوجع
والكسرو الضلع...اشگد كسرو ايتام

الزهره...هاگد رحيمه كلهه إحساس
چانت...اتجوِّع وُلدهه وتشبِع الناس
أم الحميه...أعظم رزيه
كسر الضلع ماتطفه ناره

ماتنحمل ياناس هاي المصيبه
الينخلق إلهه الكون صارت غريبه
بجروحه ابو الحِمَه..ضل ينعه فاطمه
وبليله مُضلمه...يدفن حبيبه

هذا...حيدر علي ايندبه التُّوازَه
تالي...مايگدر ايشيل الجنازه
لن القضيه...أعظم رزيه
كسر الضلع ماتطفه ناره

ناصب عَزه ابيا صوب يبن الحسن وين
يم الزچيه اتنوح لو يم الحسين
وعد تتأمله...المدينه وكربله
الجروحك هامله..يالمهدي كل حين

وينك...ياصاحب الدمعه الجِريَّه
بيدك..ثار السبي ودمعة رقيه
بالغاضريه...أعظم رزيه
كسر الضلع ماتطفه ناره

سيد علي الموسوي

https://telegram.me/aabas78
قصائد لكل ايام محرم اشترك بالقناة باز کردن / نظر دهید

2023-10-25 16:22:15 يمعوضني الحنان/بعدك ماظل أمان/يقسي وياي الزمان/يابوية
__
يالتارس عيوني ضوه… ويه الشمس متوارد
انته رسول الامتك…. بس انته اليه الوالد
من گال اعيش بغيبتك.. ما اگدر الله شاهد
هوه انت مو حي الله ابو.. ماخلق مثلك واحد

ياسيد الكون ول الله حبيبه
من بعدك اتعيش بنتك غريبه
ما اتحمل جروح/خليني وياك اروح/ماعيش بلايه روح/يابوية
___
يابوية اني ام الحسن… واتمنى لو تسمعني
ترحل وماترجع بعد… .واني الهجر يوجعني
الدنيا غابه بغيبتك… .چف القدر يصفعني
اعيوني ماتشبع بچي… من البچي يمنعني

تچويني الدموع وبگلبي نيران
مجبوره سويت بيت من الاحزان
بوية وبعد المصاب/ربعك طلعو ذئاب/شفت انواع العذاب/يابوية
__
بس غمضت عيونك ترى… انكشفو اعله الواقع
تحت السقيفه اجمعو… والتمو امن الشارع
اسم الخليفه وكنيته… صار اعله باب الجامع
يم الله من بعدك علي… ويم الجماعة الرابع

هوه الله وصاك بعدك خليفه
رابع يخلو اهل السقيفه
ماعدهم كل ضمير/هذا البعدك يصير/حيدر خلو اخير/يابوية
___
عادات عد كل العرب… والوادم ايعرفوها
بت الشيوخ وبت اصل… تستاهل يكرموها
ليش اني بت سيد الرسل… وياي ما سووها
سلبو فدك مني غصب…. ونار الحقد ضرموها

هجمو عله الدار الچانو اصحاب
محسن صگط ليش يم عتبت الباب
بعدك عاشو ظلام/سلبو حق الامام/تسمع هذا الكلام /يابوية
___
يابوية عينك غمضت… تدري اشجرى اعله الزهره
الليل يخلص بس اون ..كاتلني ظلعي وكسره
گنفذ سطرني بيمنته… منهو اليرد السطره
امدلله ابوكتك چنت… هسه اختنگ بالعبره

ياروحي شكواچ ل الله وحبيبه
من بعد الفراگ عشتي غريبه
عيني وكسر الظلوع/ابني وصب الدموع/ل الله وليك الرجوع/يابوية

الشاعر حيدر الخفاجي


https://telegram.me/aabas78
قصائد لكل ايام محرم اشترك بالقناة باز کردن / نظر دهید