تفاصيلك مش هي تفاصيلي، ولا أنت أنا! بوقت ما كنت حب شب، كان يضل | 💫نِبِضّ أّلَحٌيِّأّةّ💫🥀
تفاصيلك مش هي تفاصيلي، ولا أنت أنا! بوقت ما كنت حب شب، كان يضل يقلي أنتي حدا مُتعب بشكل فوق الطبيعي! أكيد كنت اتأثر بكلامو وضل حاول غير بحالي بس مشان ارضيه، وكون رقم واحد عندو! بس بالنهاية كل محاولاتي كان مصيرها الفشل.. لأن مابقدر ع حب العاقلين، هيك حب بيأذيني من جوا! خالي من الدفا، كلو برود وإهمال، مافيه غيرة، مافيه جنان الشك، والولدنة، مافيه رعشة القلب! لما خطبني كانت فرحتي ناقصة.. كان يخجل يبين حبو إلي قدام أيّ حدا، كان يشوف الدلال يعني ضعف لشخصيتو! بعد بتذكر أول مرة فتت البيت يلي رح يكون بيتنا.. ماقدرت شم ريحتي فيه! ماقدرت كون أنا، بالمختصر ماقدرت كون ملكة جوا مملكتي، وقفت شوي صفنت للمستقل، ماقدرت شوف حالي صبارة بتقبل تعيش بالصحرا، شفت حالي ياسمينة يوم عن يوم مش عم يبقى منها غير العود المهتري! مشان هيك تركت أعظم حب التجئ قلبي الو! هو كان رجال، بس عندو جفاف بالمشاعر، وأنا قلبي مابيقدر بلا التميز! لما يصرخ بكلمة بحبك ويخجلني قدام ألف شخص، بالنسبة إلي رح تكون أعظم من كل كنوز الكون! مسكة الإيد قدام أهلو رح تحسسني بالقوة، مش رح تكسرو! إنو يمسحلي دمعتي لما نكون بالشارع، رح تخلي قلبي ياخد لفة بالسما... أخر شي الحب يعني طبطة وشراكة، يعني أنا زعلت لاقي تصرف يشيل الهم من قلبي! أنا عم ببكي لاقي إيد عم تمسحلي دموعي.. مش كلمة لما نكون سوا بعوضك، صدقني برود القلب ما إلو عوض! ما إلي حاجة فيك لما ازعل وخاف وتكون معي وتنطر بعد ساعتين لحتى تراضيني! هو كان رجال وبقلب رجال، يمكن لو كان بقلب ولد ماكان شافني حدا مُتعب! مشان هيك ماقدرنا نوصل لمرحلة نقول عن بعض "أنا" كنا دائماً أنا أنا وهو هو!
