2023-04-13 23:50:27
مذكرات طبيب مهاجر لأمريكا - الجزء الثاني:
بعد ما عرفت إن فيه حاجة اسمها
معادلة أمريكية عرفت إن امتحانها في
"أمديست" في ش. مصدق المهندسين، ما كذبتش الخبر وأخذت أجازة عارضة يوم وطلعت القاهرة علىٰ
"أمديست" أسألهم عن الامتحان، قالولي ذاكر ال
"first aid" وحدد ميعاد الامتحان وتعالىٰ امتحن، الكتاب كان عندهم غالي بحوالي
٢٠٠ ج أيامها فما اشتريتهوش منهم بس رجعت من عندهم وأنا الفكرة بتكبر في دماغي وعمال طول الطريق أفكر في المستقبل كأني خلاص امتحنت ونجحت ومسافر
أمريكا بكره!
بعد ما أخذت كتب
"بلوبرينتس" وكتاب الأسئلة من هشام بدأت أفتح
بلوبرينتس باطنة؛ لأنه كان أسهل عليّ أبدأ من اللي أنا عارفه، وقررت أني أبدأ ب
"step 2"؛ لأني بحب الكلينيكال وبكره الأكاديمي، لما فتحت كتاب
"بلوبرينتس" لقيته نظام جمل كبيرة مش نقط ١،٢،٣ فـلقيته ممل مش زي ما تعودت أذاكر من مذكرات ملخصه، فبدأت أكتبه علىٰ أيدي من ثاني علشان أعرف أذاكره بسهوله، ودا كان نظام مذاكرتي في بكالوريوس وماستر، إني ألخص الكتب وأعملها نقط وجداول تسهل عليا مراجعتها!
بعد شوية زهقت فقلت أفتح الأسئلة، كانوا كتابين كبار كل واحد كذا ألف سؤال مش فاكر اسمهم إي، بس حبيتهم جدًا، وأخذتهم معايا المستشفي وقَعَدت أتسلىٰ فيهم مع زمايلي في النبطشيه، كل ما نفضىٰ في السكن أو القسم أقعد أقرأ لهم كام سؤال ونقعد نتناقش فيهم ونحلهم سوا، لدرجه إن ٢ زمايلي سينيور عني اتشجعوا واشتروا كتب وبدأوا يذاكروا، واحد منهم أستاذ دلوقتي في
كنتاكي، والثاني خلص امتحانات بس كمل في
السعودية، وطبعا كنّا بنجاوب أكثر الاسئلة خطأ؛ لأن نظام التفكير الطبي الأمريكي مختلف تمامًا عن مصر! أهم حاجه في الأسئلة مش السؤال نفسه إنما شرح وتفسير الإجابة، دا مهم جدًا جدًا، وعلشان كدا كنت بذاكر الإجابات وأعمل لها ملخصات؛ لأن فيها معلومات أهم من اللي في الكتب نفسها، الإجابات دي بتكون من أحدث الأبحاث والجايد لاينز، وممكن يجي منها أسئلة مختلفة عن السؤال الأصلي تمامًا!
في الوقت دا حسّيت أني محتاج تفرغ تام لمذاكرة المعادلة وكنت ما خلصتش الماستر تمامًا علىٰ ما أتذكر، وكنت شغال في مستشفي له طابع خاص جدًا، الشغل فيه صعب مش زي أي مكان في مصر وكنت باخد نبطشيات كثير جدًا ممكن حوالي ٢٠ نبطشيه في الشهر لدرجه أني نادرًا ما كنت أشوف أولادي! وكانت دماغي خلاص سخنت في موضوع المعادلة والسفر دا، واللي زودني تشجيعًا إن ٢ من زمايلي اللي كنت بذاكر معاهم في بكالوريوس سافروا زيارة أمريكا ورجعوا يحكولي عن اللي شافوه وقرروا يذاكروا معادلة فاتفقنا نذاكر مع بعض، وكنت أخلص شغل الساعة ٥ أروح البيت ييجولي ونقفل علينا الباب ونذاكر لحد ١٠ م.
أصحابي دول: إسلام طافش وهو
نيورولوجيست حاليًا في فلوريدا، وهشام عبد اللّٰه ما كملش وفاتح حاليًا مركز جراحة تجميل في القاهرة!
كان نظام مذاكرتنا إن حد فينا يقرأ للثانيين ونسمع منه ونحل أسئلة مع بعض، أنا طول عمري بركز أكثر في المذاكرة الجماعية وبنجز بسرعة عن لما أذاكر لوحدي؛ لأني ممكن أسرح أو أمل بسرعة فكنت دائمًا أحب أذاكر مع حد!
المهم قررت أني أدخل الجيش!
آه
اه واللّٰه زي ما بقولكم كدا! كنت مأجل جيشي بعد التخرج؛ لأن والدي كان فوق ال ٦٠، واتعرفت علىٰ ضابط رتبة كبيرة في الجيش كنت بعالجه فحب يجاملني فقلت له عاوز أدخل الجيش علشان أذاكر بس محتاج أخدم في المنصورة علشان أكون جنب الأسرة والأولاد، وفِي مكان مرتاح علشان أعرف أذاكر!
وفعلًا قدمت في الجيش ونزلت عسكري علشان النظر والراجل -ﷲ يمسيه بالخير أو يرحمه- عمل الواجب، ما دخلتش مركز تدريب لحد ما اترحلت علىٰ وحدتي جنب البيت، وهناك كانت البداية صعبة، لكن مع الوقت اتصاحبت علىٰ القائد والضباط وعملت لهم خدمات طبية فـسابوني براحتي وركزت في مذاكراتي للمعادلة والماستر!
لما لاقيت المذاكرة ماشية كويس اتفقت مع إسلام نسجل ل ال
"ECFMG"، إسلام كان عنده خبرة؛ لأنه أخذ جزء أول قبلي، فـرحنا سايبر وقعدنا علىٰ الكمبيوتر وعملنا تسجيل لأول مرة ومليت الأبليكيشن وأخذت
"ECFMG ID" ودا فضل معايا لحد النهاردة!
أنا كنت مستبيع ومش خايف أنجح أو أسقط ومش مصدق أصلًا اللي أنا بعمله، كان الموضوع بالنسبالي وقتها مجرد تجربه ومغامرة لو نجحت هكمل، لو ما نجحت هرضىٰ بنصيبي وأقعد في مصر أكمل وآخذ دكتوراة وأطلع السعودية وأجيب بطيخة كل يوم وأنا مروح!
مراسلة ال
"ECFMG" زمان كانت بالبريد مش إلكتروني زي دلوقتي، يعني حتىٰ لو سجلت ودفعت للامتحان علىٰ النت، لازم يبعتوا لك رقم الجلوس بتاعك
"scheduling permit" بالبريد العادي، وكذلك نتيجة الامتحان، ودا كان بياخد له من أسبوعين لشهر وكانت بتيجي ورقة كرتون لونها برتقالي!
#AliSherif_مهاجر_أمريكا
#مذكرات_طبيب_مهاجر_أمريكا
➜ @home_of_all_medicals#فـرصـة_سـفـر
➜ @AhmedOmran111
2.2K views𝐀𝐇𝐌𝐄𝐃 𝐎𝐌𝐑𝐀𝐍, 20:50