#كعدة_لعلي_الاكبر ع يا علي ياعلي .. هاك اخذ كلبي درع يا عل | الشاعر عمار العيساوي الكربلائي

#كعدة_لعلي_الاكبر ع




يا علي ياعلي .. هاك اخذ كلبي درع
يا علي ياعلي .. عيوني مو حمل الدمع
دلالي بالهم ذاب وتفسر .. آنه رقيه يا علي الاكبر
. . . . . . . . . . . . . . . . . .

من صدر مرسوم عاجل صادر بحكم الامامه
لازم الاكبر يضحي كبل خوانه وعمامه
طلعت ارقيه تودعه وتدعي يرجع بالسلامه
تنشده ترد لو ما ترد
ارهيفه ودليلي مو جَلد
بلا ماي ميعيش الورد .. وروحي تذبل بالملامه

يالاخو يالاخو .. وياك اخذني بروحتك
يالاخو يالاخو .. مالي حيل الفركتك
مابيه اظل ياخوي اتنطر .. آنه رقيه يا علي الاكبر
. . . . . . . . . . . . . . . . . .

يا علي وياك اخذني درع خليني اعله صدرك
اشكف سهام الأعادي لا سهم ظالم يغدرك
ومره فيّ اعليك اصيرن عن عطش كلبك اصبرك
بلسم اخذني الكل جرح
وحطني اعله نحرك للذبح
خذني يمن وجهك سمح .. عمري ابدّيه اعله عمرك

انهظم انهظم . . الروحه ما بيها سلم
انهظم انهظم . . لكن ارجع ابتسم
خافن اخويه بحزن يتكدر .. آنه رقيه يا علي الاكبر
. . . . . . . . . . . . . . . . . . . . . . .

نادته وترجل الها نزل من سرجه و مهرته
و وصل يم اخته رقية اتبسم و حب راس اخته
و بين اديه لمن حضنها استبشرت حيل بشبكته
مشهد ميتكرر بعد
لو عنها لحضات ابتعد
معناها بالحومة انفكد . . والعده وذرت جثته

يا شهم يا شهم . . تكله والمدمع يصب
يا شهم يا شهم . . جني اشوفك عالترب
جني اشوفك دامي وموذر .. آنه رقيه يا علي الاكبر
. . . . . . . . . . . . . . . . . . . .

جني يالاكبر اشوفك . . عالتراب اموذرينك
بآخر انفاسك يخوية . . و عالخيام اتدير عينك
واستمع ليلى تنادي . . يا ثمر دلالي وينك
وانه احس من الحزن
دلالي ذايب منسحن
اشتاك كل لحظه و احن .. يالاخو اللمست حنينك

شوك الك شوك الك . . أشعل عيوني شمع
شوك الك شوك الك . . بيهن ايهل بالدمع
من عيني لأجلك دمعي يتفجر .. آنه رقيه يا علي الاكبر
. . . . . . . . . . . . . . . . . . . . .

روح اخذ وياك روحي درع و مزرد سنيني
و حرز و تشده اعله زندك لو رحت وياك عيني
و نتقاسم نبض قلبي بالحرب بينك وبيني
لو طحت مرمي على الثره
اختك تروح ميسره
لو حشمك ادريبك تره . . من اللحد تنهض تجيني

غيرتك غيرتك . . لو احشم يا علي
غيرتك غيرتك . . من اللحد تنهض الي
ادريك لو حشمك تجي وتحضر .. آنه رقيه يا علي الاكبر
. . . . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي





#لك_الفداء_سيدي_اباعبدالله
#خدر_الفواطم_لنشر_القصائد_الحسينيه

____
لمن يجد صعوبة بالحن اطلبه من



@moatmed2