#علي_الاكبر ع من گرب الوداع . . گمت اشعر بضياع انه رقية يا | الشاعر عمار العيساوي الكربلائي

#علي_الاكبر ع


من گرب الوداع . . گمت اشعر بضياع
انه رقية يا علي الاكبر الى الوداع
. . . . . . . . . . . . . . . . . . . . . . .

يا خوية گرب خل ابوس اعيونك
يلي شلتني اسنين فوك امتونك
گلي يخويه شلون اعيش ابدونك
الله يعين اهلك واليحبونك

يالتوفي بالوعود . . ما ظن بعد تعود
وشينفع الما يرتوي من تذبل الورود
. . . . . . . . . . . . . . . . . . . . . . . .

يالواگف ابطول النجم يا هيبه
يالراضع العز والشرف و الطيبه
انة رقية اختك انة الحبيبه
لمن تروح وما ترد مصيبه

لحظات الانتظار . . اشعر بالانكسار
فوگ الصدر چفك حمامة وانة قلبي غار
. . . . . . . . . . . . . . . . . . . . . . . .

انشد واريد اجواب منك اسمع
ترجعلي لو رايح بعد ماترجع
منهو اليه بالسبي من اطلع
بهاللحظه عين الاكبر تهل مدمع

والاكبر الحنين . . قبّلها بالجبين
واتبسم الها وحسرته تتكسر بأنين
. . . . . . . . . . . . . . . . . . . . . . .

حب راس اخته و ابتسم طمنها
ومن تجري عينه ايدير وجهه عنها
ارهيفت گلب بس الزمن محنّها
سهام الوداع اويه الاخو جرحنها

واتشابگوا شموع . . وبلحظة الخشوع
ذابت مهج فوك الوجن وي نزلت الدموع
. . . . . . . . . . . . . . . . . . . . . . . . .

گالتله بسم الله وعلي حصنتك
سالم ترد لي يا بعد گلب اختك
ما احتمل لو يوم بي ما شفتك
وشلون بيه اعله الترب لو عفتك

من انضرب تصيح . . يا صوتي الجريح
تسمعني صح بس ما ترد فوگ الترب ذبيح
. . . . . . . . . . . . . . . . . . . . . . . . . . .

ما اريد كلشي ابدنيتي بغيابك
حتى التراچي التنسلب بثوابك
لو بيدي اهل دمعي وانگع اترابك
بلكت يرطب الگلب دمع احبابك

قربان كربلاء . . لخالق السماء
خويه لشبابك بالسمه وية الارض عزاء
. . . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي





#لك_الفداء_سيدي_اباعبدالله
#خدر_الفواطم_لنشر_القصائد_الحسينيه

____
لمن يجد صعوبة بالحن اطلبه من


@moatmed2