الصورة دي اللي اتلقطت اليومين دول بتوضح شكل النجم من ٢٠٠٠ سنة | ♡الملتقي الجنة♡
الصورة دي اللي اتلقطت اليومين دول بتوضح شكل النجم من ٢٠٠٠ سنة التقطها التليسكوب الجديد بتاع ناسا .. جيمس ويب طيب هو شكله إيه دلوقتي .. منعرفش ليه .. لإن ببساطة الضوء محتاج يسافر لمدة ٢٠٠٠ سنة عشان يقطع المسافة بينا وبينه يعني هنعرف وضعه دلوقتي إيه بالظبط بعد ٢٠٠٠ سنة (لو عشنا يعني :D)
يمكن الكلام لحد دلوقتي مفهوم فزيائيا بس خلينا نعكس الموضوع .. وخلينا نتخيل إن مش إحنا اللي بنتفرج على السما .. لا دي السما هي اللي بتتفرج علينا .. يعني ايه ؟!
تخيل لو انت واقف على القمر ومعاك تليسكوب وقادر تشوف اللي بيحصل على الأرض هتقدر تشوفه بعد ما يحصل بأجزاء من الثانية .. لإن المسافة قريبة طيب لو انت واقف على الشمس (بغض النظر عن الحر وهتلسع وكده .. ركز بس :D) هتشوف اللي حصل على الأرض بعد مدة أطول وكل ما تبعد هتشوف اللي بيحصل بعدها بمدة أطول .. بمعنى إن دلوقتي وإنت بتقرأ البوست ده في مكان بعيد جدا في السما لسه واصله حالا صورة قابيل وهو بيقتل هابيل !! ومكان أقرب منه فيه صور الأهرامات وهي بتتبني ومكان أقرب فيه صور ميلاد المسيح ومكان أقرب فيه صور سيدنا محمد وهو بيخطب خطبة الوداع ومكان أقرب في صورتك امبارح وانت بتعمل عمل صالح يرضى ربنا (أو ... )
كل ده مسافر في السما .. كل طبقة فيها صور من زمن فات وكإن السما سجل مفتوح مليان صفحات ويوم ما ينطوى السجل ده هتلاقي فيه تاريخ الكون كله من يوم ما بدأ .. وده وعد ربنا
بسم الله الرحمن الرحيم (يَوْمَ نَطْوِي السَّمَاء كَطَيِّ السِّجِلِّ لِلْكُتُبِ كَمَا بَدَأْنَا أَوَّلَ خَلْقٍ نُّعِيدُهُ وَعْدًا عَلَيْنَا إِنَّا كُنَّا فَاعِلِينَ) صدق الله العظيم
