حد شاف بني إسرائيل يا جمااااااعة !!! = هما راحوا فين صحيح ب | ♡الملتقي الجنة♡

حد شاف بني إسرائيل يا جمااااااعة !!!

= هما راحوا فين صحيح

بقالهم كدة 80 سنه مختفيين !! لا حس ولا خبر ..

80 سنة !!! ازاي

سيدنا داود حكم كام سنة !؟
40 سنة ..!

حلو وسيدنا سليمان كام سنة !؟
= كام !؟
40 سنة برضو ،، وبرضو دة كان من ضمن ورث سيدنا داود لسيدنا سليمان ..

طيب كان فين بقي بني إسرائيل الوقت دة
= كانوا موجودين زي ما هما ،، لكن ال80 سنة دول هما احسن سنين عاشوا فيها في استقرار ..
من غير لماضة وسوء أدب مع الانبياء ومع الله ..

واشمعني يعني النبيين دول اللي عاشوا وقتهم في استقرار !!؟

لأن بني إسرائيل كانوا بيحبوا سيدنا داود جداااا وكان ملك عادل

وكان سيدنا سليمان ملك عادل وكمان كان ملك قوي
ربنا سخّر له كل حاجة ،، أنس وجن وطير وووو..
فمين مستغني عن عمره عشان يقف في وش ملك زي سيدنا سليمان

وإيه بقى إللي حصل بعد موت سيدنا سليمان !؟

بعد ما مات سيدنا سليمان ، الجن بدأت تدور تحت عرش سليمان عن الكتب التي كان بيكتبها كاتب سليمان،،

مين كاتب سيدنا سليمان دة !!!!؟
يُقال إن الكاتب ده كان اسمه "آصف"،
وكان بيكتب كل حاجه عن سيدنا سليمان ،،
بيكتب عن الملك وعن الشريعة والوقائع والأحداث.. كان بيكتب كل حاجه ..

فلما الشياطين خرجت الكتب دي،،
بدأوا يكتبوا ما بين السطور كلمات السحر والكفر ودعاء غير الله،،

وخرجوا بقي علي بني إسرائيل، وقالولهم إن دي كتب سليمان،،

وإن سيدنا سليمان كان مسخّر الجن والطير والريح بالسحر ده،،!!!!

بني إسرائيل مسكوا الكتب دي وقروها..!
فلقوا فيها فعلا كلمات السحر والكفر بالله ودعاء غير الله ، فصدقوا للأسف،،!!!

"وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ"

وطبعا بني إسرائيل بيموتوا في الفضايح
ففضلوا يقولوا إن سيدنا سليمان كان بيتعامل بالسحر وكان كافر بالله

فربنا بعت ملكين ..
الملكين دول كانوا في صورة رجلين صالحين

ربنا بعتهم فين
في مدينة بابل .. في العراق،،،

الملكين دول مهمتهم إنهم يدافعوا عن سيدنا سليمان من الكلام إللي بيتقال عنه إنه ساحر،،

ومين الملكين دول !؟
= هاروت وماروت ...!

هاروت وماروت !!!!!! أية دة يعني هما مش أنبياء
= لأ .. مش أنبياء ..
هاروت وماروت دول ملايكة

هاروت وماروت كانوا بيعلموا الناس السحر ،،
ويوضحولهم إن في فرق بين السحر وبين النبوة،،

وإن السحر ده ممكن أي حد يتعلمه،،
أما النبوة فهي اختيار من ربنا عز وجل ومش حاجة مُكتسبة،،

الملكين فضلوا يدافعوا علي سيدنا سليمان وقالوا لبني إسرائيل إن سيدنا سليمان ماكفرش !!،، وأنه مش ساحر ..
وإن الشياطين هم إللي كفروا وهما اللي بيعلموكم السحر،

"وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ"

وقالولهم إن السحر ممكن تتعلموه من أي حد وألاعيبه بتبقى كده و بنوريها لكم من باب إنكم تتعلموا الشر وتخافوا أن تقعوا فيه،،
وعشان تعرفوا الفرق بين النبوة وبين السحر،،

لكن لازم تكونوا فاهمين إن السحر ده كُفر بالله،،
و احنا فتنة واختبار وابتلاء من ربنا ليكم باللي بنعلمهولكم ده،،
فخدوا بالكم هتضيعوا نفسكم لو مسمعتوش تحذيرنا ليكم واستخدمتم السحر إللي احنا علمناهولكم ده

"وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ"

و بني إسرائيل عملوا إيه !؟

للأسف كالعادة !!!
مسمعوش الكلام وبقوا بيتلقوا العلم ده ويطبقوه، وبقوا يتعلموا من السحر الأمور إللي يفرقوا بيها بين الراجل ومراته ويخلوهم في كرب وشقاق وابتلاءات ،،

"فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ"

لكن ربنا ذكر حاجه مهمة جدا،

أية هي !؟

ربنا قالنا إن مفيش ضرر بيتم عن طريق السحر ومس الجن إلا بإذن الله،
يعني مش هيحصل أي أذى غير لما ربنا يأذن بكده..

"وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ ۚ وَيَتَعَلَّمُونَ مَا يَضُرُّهُمْ وَلَا يَنفَعُهُمْ"

#أنبياء_الله
المصادر:
تفسير ابن كثير
والطبري
والقرطبي
وابن إسحاق