بدأت ليلة يوم عرفة! الأول خلينا نشوف هنعمل إيه في الساعتين | قفل

بدأت ليلة يوم عرفة!

الأول خلينا نشوف هنعمل إيه في الساعتين الجايين دول.

١- هتنوي صيام يوم عرفة وتدعي ربنا يعينك على العبادة فيه.

٢- هتجيب كذا ورقة وتقسمهم كالآتي:

- دعوات دنيوية لنفسك.
- دعوات أخروية لنفسك.
- دعوات لـ أهل بيتك كل فرد اكتب اسمه وتحته دعوات ليه.
- دعوات لـ عيلتك بالاسم.
- دعوات لأصحابك.
- دعوات للناس الغريبة اللي طلبت منك تدعيلها (متنسوش تحطوني في القائمة دي)
- دعوات لجميع المرضى وجميع الموتى..

٣- هتنام الساعة ١١ مثلًا وتصحى الساعة ٢.

٤- تتسحر وتصلى قيام وتقعد تستغفر وانت مستشعر إن ربنا بيغفرلك كل ذنوبك لحد آذان الفجر.

٥- هتصلي الفجر وتقعد تذكر الله وتكثر من الذكر خصوصا "لا إله إلا الله وحده لا شريك له، له الملك وله الحمد وهو على كل شئ قدير".

٦- ممكن تقرأ جزء من القرآن وتدعي لحد الشروق.

٧- تصلي ركعتين صلاة الضحى يُكتب له أجر عمرة وحجة تامة إن شاء الله.

كدا يوم عرفة بدأ بالفعل هتعمل إيه؟

١- هتقفل الموبيل والسوشيل ميديا تماما.

٢- هتصلي كل سُنن الرواتب للفروض.

٣- اليوم كله هتذكر الله وتكثر من التكبيرات وذكر "لا إله إلا الله وحدة لا شريك له، له الملك وله الحمد وهو على كل شئ قدير".

٤- لو مشغول في حاجة زي شغل البيت أعمله بس اوعى لسانك يقف عن ذكر الله في الوقت ده.

٥- ممكن تنام ساعتين أو ٣ قبل العصر عشان تقدر تكمل باقي اليوم بس قبل ما تنام خد نية إن ربنا يعينك على العبادات.

٦- طول اليوم هتدعي هتدعي بكل الدعوات اللي كتبتها النهاردة.

٧- ممكن تقرأ جزء من القرآن.

٨- حط مياة في الشباك للطيور ولو نزلت خرج صدقة على قد مقدرتك.

٩- العصر هيأذن يبقى ده وقت الإنذار كدا..

- اقعد في مكان لوحدك وافصل من كل حاجة ممكن تعطلك.

- وافضل ادعي بكل اللي بتتمناه ليك ولكل الناس حتى لو شايفه من وجهه نظرك مستحيل.

- دعاء يوم عرفة مستجاب إن شاء الله
- صيام يوم عرفة يكفر سنتين.

أوعى تضيع اليوم ده من إيدك في أي حاجة مؤقته..

ربنا يتقبل منا ومنكم صالح الأعمال ولا تنسوني من صالح دعائكم فضلا..

- حبيبة محمد.