مليارم (القناة الثانية)

2022-08-29 16:36:32 حبايب هذا الي بالي هسة كتبتلكم أشياء بسيطة إن شاء الله تستفادون منها حتلو شوية ، أشياء غلط أتبعتها و ما أريد طالب يوگع بنفس الغلط ، و إن شاء الله مدوختكم
و ربي يوفقكم و ميضيع تعبكم و يحقق الي بالكم و لتتكاسلون هي أيام و تخلص و تصير سوالف .
و بالتوفيق إن شاء الله باز کردن / نظر دهید

2022-08-29 16:24:33 النت يروح و يجي باز کردن / نظر دهید

2022-08-29 16:24:33 الفيزياء : بيها مسائل و شرحيات هواية و تجارب ، بالنسبة للمسائل سهلة بس انتبهوا ع التحويلات لأن تغيرلكم الحل و تخربطكم فأنتبهوا عليها و أكتبوا المعلومات مال السؤال و شنو الشي المجهول اللازم اطلعة و يا قانون يرهم يعني صفوا السؤال و أبدوا حلوا ، أما التجارب فأفهموها و شوفوا شلون سهلة بالحفظ و الشرحيات كذلك أفهموها ع القوانين
وبس الفيزياء بس هذا الي بالي
ها و حلوا وزاريات مو تنسون باز کردن / نظر دهید

2022-08-29 16:20:19 الكيمياء : المادة الثانية الأحبها ويه الرياضيات لأن مبيها شرحيات هوايه فأحبها و أكو شرحيات قليلة بيها أحفظوها ع القوانين بسرعة تنحفظ عدكم و شنو بعد أريدكم تنتبهون أنو ملزمتكم ويه كُل موضوع ويه أمثلة الكتاب مخلين أسئلة الفصل الخاصة بكُل موضوع .. لأن إذا تقرون بالكتاب أو ع ملزمة نفس ترتيب الكتاب و تشوفون كاتبيلكم بس أمثلة بسيطة و توصلون لأسئلة الفصل و تشوفون الأفكار الغريبة ع مواضيع مختلفة و انتوا حالين بس كم مثال بسيط ع كُل موضوع حتنقهرون و عبالكم متعرفون تحلون بينما لو ويه كُل موضوع تقرون أمثلته و أسئلة الفصل الخاصة بي و تشوفون افكارها حيصير الموضوع عدكم بسيييط و هم بالوزاري يحبون أسئلة الفصل و هوايه يجبون منها ، و ركزوا ع الوزاريات هم أكو أسئلة وزارية مُكرره و بيها فكرة و لوفة شوية . باز کردن / نظر دهید

2022-08-29 16:20:02 الأحياء : برأيي أحياء السادس أسهل من أحياء الخامس الي مواضيعه مُعقدة و ممفهومة عكس أحياء السادس صح مادة هواية بس حلوو و ينفهم و ينحفظ .. ركزوا (ينفهم و ينحفظ)
خطأ من تقرون الأحياء تحفظون حفظ بس ، هيج المادة تقروها منا تنسوها منا ، فـ شتسوون ؟ ترحون اكو رسومات موجودة بالكتاب و خصوصًا الي مكتوب عليها للأطلاع أشرحوا لنفسكم عليها و أفهموا الموضوع عن شنو يحچي ورا متفتهمون من تجون تردون تحفظون المادة تلگون نفسكم حافظيها أو بسهولة تنحفظ عدكم و حتنطبع المعلومة عدكم و متنسوها أبد .. و أعيد و أگول الرسومات الي للأطلاع هذني مهمااات حتى تفهمون و تساعدكم بالحفظ ..

و هم مثل مگلت بالأدب لتنوعون بالمصادر أبد ، أقروا ع مصدر واحد و حلوا أسئلة وزارية
و الأحياء أسئلته أكثر شي وزاري مُكرر يعني ميجيبون بي لوفه فتريد تجيب درجة كاملة حل وزاري شگد متگدر
و هي أسئلتهم شنو ( عرف و علل و أذكر موقع و وظيفة و أرسم مع التأشير و أذكر عدد الكروموسومات في ما يأتي و بعد شنوو ها و اذكر نوع الانقسام و اذكر الطور .. )

و الي يقرون ع الكتاب ، بكُل صفحة دوروا ع نماذج السؤال الي كتبتها يعني شوفوا اكو بالصفحة تعريف او تعليل او وظيفة أشروها و هيج حتلخصون الكتاب الي بأيدكم ..

و أعيد ديروا بالكم ع الوزاريات .. لحيت مو ؟ يلا ميخالف حتى تبقون تذكرون و تحلون هواية وزاريات . باز کردن / نظر دهید

2022-08-29 12:55:54 بعدين نكمل الباقيات بس أروح أتريگ و أتغدى طبگ باز کردن / نظر دهید

2022-08-29 12:53:57 الرياضيات : أكثر مادة أحبها
سهلة و حلوة بس ركزوا و أنتوا تحلون .. شگد متگدروون حلوووا وزاريات و أثرائيات هاي الأسئلة الي بيها لوفة و خباثة .. و حلوا مثال مثال بأيدكم ورقة و قلم يعني مو بس تفهمون الموضوع و تحلون مثال أو مثالين علي بورقة و قلم و الباقي ها والله افتهمت هاهية الباقي بس هيج شفهي و أگلب بي لا ترا أكو أسئلة توحي إلك أنو هي عادية و مبيها فكرة بس جرب و حلها ورقة و قلم و شوف الأفكار البيها .. فحلوا سؤال سؤال و شوفوا وين تغلطون وركزوا ع غلطكم و أستفادوا منه قبل الوزاري . باز کردن / نظر دهید

2022-08-29 12:51:49 اللغة الأنگليزية : أسهل مادة بالسادس و حتى متحتاج أنو أنت لازم لغتك زينة و من هالسوالف لا هي المادة تقراها و تسيطر عليها تجيب بيها الـ 100 بسهولة
لأن مادتها حلوة و مو معقدة أبد ، حتى أسهل من مادة باقي المراحل ، هنَ 8 يونتات ، 2 منهن مُراجعة بس كُل واحد بيهن مخلين الكُم إنشاء أنتبهوا ، فيعني عدكم 6 يونتات بكُل يونت حتلگون ( قواعد و قطعة الكتاب و إنشاء و معاني و مُفردات )

القواعد .. أفهموا القاعدة و أحفظوها و الباقي كُله تطبيق مُباشر .. حلوا ع كُل قاعدة أمثلة هوايه
القطعة و الإنشاء .. القطعة أفهموا معناها بالعربي أول شي و عن شنو تحچي و بعدها أبدوا حلوا سؤال سؤال و أحفظوا ورقة و قلم ، و الإنشاء كذلك أفهموا المعنى بالعربي و عن شنو يحچي و أبدوا أحفظوا سطرين سطرين و شوفوا شلون سهل
المعاني و المُفردات هذني سهلات و ركزوا عليهن و أحفظوا مال كُل يونت بيونته حتى لتخربطون بين اليونتات بعدين

و لتنسون عدكُم الأدب بالأخير هم سهل مال خضير مدري شسمه نسيت
و مال الكناري
و القطعة الخارجية هم أعرفوا شلون تحلوها ترا مو مثل قبل تلزگون الجواب من بداية السطر لحد النُقطة مثل مچنت أسوي أني باز کردن / نظر دهید

2022-08-29 12:48:54 ( الأدب ) : ميحتاج أنصحكم بي لإن كُلكم تعرفون شلون ينقري
فسيطروا عليي و بس شغلة وحدة أنبهكم عليها ، أقروا ع مصدر واحد .. ديروا بالكم تنوعون بالمصادر ترا والله تصير دوخة عليكم بوقت الأمتحان
يعني أخذولكم ملزمة زينة من البداية و أدرسوا عليها و إذا مال أستاذكم هاهية بعد أحسن
حتى وقت المراجعة ديروا بالكم تقرون بغير ملزمتكم ، لا مرشحات و لا غيرها ، أوك مرشحات روحوا أشروا السؤال بملزمتكم الأصلية لتغيروها أبدد ، لإن بالأمتحان حتذكرون شكل الصفحة أو فد شي بيها بينما لو نوعتوا بالمصادر حتضيعون . باز کردن / نظر دهید

2022-08-29 12:47:42 اللغة العربية :
( القواعد ) : أكثر مادة أكرهها و چنت خايفة منها لإن هي صراحةً مُزعجة و شگد متدرسها تحس نفسك بعد تحتاج أكثر ..
فالقواعد أهم شي تحل أمثلة هواية بيكم و ما حليتوا شگد متگدرون قووا نفسكم بحل الأمثلة ، أمتحنوا هواية .. حلوا وزاريات أهم شي ..
الغلط الي سويته أني بأول موضوعين بي من أرجع من المُحاضرة ما أقرا الي أخذنا عود يعني أبقى ع شرح الأستاذ و فهمت خلص .. بس هذا أكبر غلط .. من ترجعون من المُحاضرة أفتحوا الموضوع الي شرحه الأستاذ و أرجعوا أقروا أنتوا و حلوا أمثلة وزارية حتفيدكم هواية .. حتى طلاب اليوتيوب هم من تخلصون الڤيديو لأي موضوع وراها أفتحوا الموضوع و شوفوا نفسكم شفهمتوا مفهمتوا شگد متگدرون حلوا أمثلة وزارية متتخيلون كثرة الحل شگد تفيدكم بالوزاري..
أنتوا من خلال السنة تكونون مقوين نفسكم و مدربيها بحل أمثلة وزارية .. وقت الأمتحان الوزاري حيجيكم نفس النمط قابل شحيجيبون و حتشوفون نفسكم شلون تعرفون تحلون إن شاء الله حتلو جابلكم سؤال بي لوفة هم حتعرفوا لكثرة تجربتكم و حلكم .

هذا الي أگدر أفيدكم بي للقواعد
ركزوا ع كُل المواضيع ترا يجيبوها مشكل ، ميخلون موضوع يعتب عليهم
خصوصًا النفي و الإستثناء فد يحبوهن فركزوا كُلش زين عليهن باز کردن / نظر دهید