2022-06-18 02:48:47
أستاذ عمرو عيد بيقول:
( مخاوفك )
هييجي يوم تستغرب إزاي كنت شايل هم كذا و ازاي كنت بتفكر ليل نهار في فلان .. وإزاي كنت قلقان من كذا و شاغل بالك. اهتماماتك هتتغير، مخاوفك هتختلف، طموحاتك مش هتبقي هي طموحاتك .. ربنا بيبدل حال من بعد حال .. علي سبيل المثال لو لسة بتاخد مصروفك فهيبقي غاية قلقك إنك تتدبس في حساب الكافيه قدام زمايلك أو البنت اللي بتحبها .. لما تشتغل و تمسك فلوس هيبقي خوفك إنك Assistant Manager و علي وش ترقية أحسن مديرك يفقعك ريبورت وحش فماتبقاش Manager و تضيع منك 3 إلاف جنيه فرق (ايه قيمة حساب الكافيه اللي كنت خايف تتدبس فيه دلوقت؟)
أشخاص جداد هيدخلوا حياتك و يزاحموا و ياخدوا مكان زي زوجتك و عيالك، و شلتك اللي ماتقدرش تعيش بدونهم يا دوبك هتتقابلوا في الرحلات و حفلات الزفاف.
شخص بتحبه هيسقط من نظرك .. و الشخص اللي كنت متخيله أخو إبليس في الرضاعة .. هيجمعك موقف بيه يثبتلك إنه مش بالسوء ده.
هتكتشف إن أكبر تحدي مش الثانوية العامة ولاالجامعة ولا الجيش ولا انك تلاقي وظيفة ولا بنت الحلال .. أكبر تحدي ده أمر عادي انت اللي بتخليه تحدي و انت اللي بتخليه كبير و بعبع و مبيبقاش قدامك غيره وقتها، ببساطة لإن ماحدش بيدي للمشكلة حجمها الطبيعي طول ماهو بداخلها.
عشان كدة مش لازم تعيش خايف من حاجة و بتهرب منها .. لكن لازم تعيش كإنسان بيقدم value حقيقية لنفسه و اللي حواليه.
هتلف الدنيا دي كلها و هتعمل صح كتير و غلط كتير .. هتجيلك أسئلة شك ملهاش آخر .. لكن في الآخر وقت الزنقة ماحدش هيسندك و يفتحلك بابه و يقبلك ببلاويك و يحميك و يحبك غير ربنا .. فلازم تكسب رضاه وقت الرخاء لانك هتحتاجه وقت الشدة.
{كل يوم هو في شأن }
يرد غائبا و يشفي مريضا و ينصر مظلوما.
متقلقش مفيش حاجة من الحاجات اللي مخوفاك هي نهاية العالم، ده حتي نهاية العالم بتبقي بداية لحياة جديدة. كدة كدة ربنا هيغير الحال .. بأفعالك و إيمانك ممكن تخليه للأحسن.
1.4K views23:48
م
