2023-04-06 20:15:26
إخسر كرشك واكسب صحتك
السمنة أو #زيادة_الوزن بصفة عامة لها أضرار ومشاكل ملهاش أول من آخر ، لكن أخطر أنواع السمنة على الإطلاق هي #سمنة_البطن، أو ما يعرف بالكرش
طيب انت عارف انك حتى لو وزنك طبيعي ، لأ دا حتى لو كنت شايف نفسك #نحيف ، وعندك #كرش بس فانت هتحصلك كل #مشاكل_السمنة على القلب والشرايين والسكر والضغط والكبد كأنك سمين بالظبط
وللأسف احنا ثقافتنا في الجزئية دي مغلوطة تمامًا ، لدرجة اننا مبنعتبرش ان #الكرش مشكلة ، واللي عنده كرش ولكن بقية جسمه طبيعي بيبقى شايف نفسه تمام وزي الفل
مع إن الكرش ده بيسبب المضاعفات التالية
ارتفاع خطر الإصابة بسكر النوع الثاني.
ارتفاع خطر الإصابة ب #ارتفاع_ضغط_الدم.
ارتفاع خطر الإصابة ب #تصلب_الشرايين.
ارتفاع خطر الإصابة ب #ضيق_شرايين_القلب وجلطات القلب.
ارتفاع خطر الإصابة بجلطات الدماغ.
ارتفاع خطر الوفاة ب #السكتة_القلبية والدماغية.
ارتفاع خطر الإصابة ب #تكيس_المبيضين.
ارتفاع خطر الإصابة ب #حصوات_المرارة.
ارتجاع المرىء.
قلة كفاءة الجهاز التنفسي.
اضطرابات النوم زي #شلل_النوم و #انقطاع_التنفس_النومي.
ولو فضلنا نعد في مشاكل و #مضاعفات_الكرش من هنا لآخر رمضان ممكن الوقت ميكفيش
وعلشان كده لازم أي حد عنده كرش ياخد قرار حاسم بإنه يفض #الشركة دي بقى
ويتخلص من الشريك اللدود اللي واكل عليه صحته وحياته ومش مهنيه حتى على النفس ولا النومة
ولأن #التخسيس والصحة لازم يكونوا #أسلوب_حياة، مش فترة وتعدي ، هنقول لحضراتكم ازاي تقدروا تتخلصوا من الكرش ، ومن خلال كلامنا هتفهموا ليه أصلا بقى عندكم كرش
امتنعوا عن السكر، قللوه بالتدريج لغاية ما تمنعوه خالص
قللوا #النشويات بصفة عامة.
كلوا العيش ابو ردة والبليلة و #الشوفان الكامل والرز البني وسيبكم من الفينو والمعجنات والبسكويت
كلوا الفاكهة الطبيعية وسيبكم من #العصاير_المعلبة اللي مفيهاش فاكهة أصلا، ولو هتعصروا فاكهة في البيت، متضيفوش سكر
امتنعوا عن #المشروبات_الغازية.
خدوا كميات من #البروتين في أكلكم، سواء حيواني أو نباتي أو منتجات ألبان، احنا كارثة #التغذية عندنا إن أغلب الوجبة إن لم يكن كلها بيكون نشويات ودهون
كلوا خضروات ورقية كتير وخضروات بصفة عامة.
اشربوا ميه بالقدر الكافي.
اتمشوا نص ساعة في اليوم بالخطوة السريعة ، يعني تكون نازل أصلا بهدف المشي، المشي للرياضة تمشي كأنك مستعجل ، وتخلي معاك زجاجة ميه تشرب منها وانت ماشي.
نظموا #مواعيد_النوم بحيث تناموا بالليل وتصحوا الصبح
طبعا اللي يقدر يجود ويزود #تمارين_رياضية أو نظام غذائي أو #مشروبات_أعشاب زي الشاي الأخضر والزنجبيل يبقى #خير_وبركة ، لكن احنا قلنا الأمور اللي أي حد ممكن يعملها لو عنده فعلا رغبة المحافظة على صحته.
لأنه للأسف #الوضع_الصحي العام أصبح كارثي ، والأطفال والمراهقين بقوا فسيولوجيًا مسنين ، والشباب بقوا بيمرضوا بالسكر والضغط والقلب أكتر من آبائهم
تمنياتنا للجميع بدوام الصحة والعافية ولجميع المرضى بالشفاء العاجل
#دكتور_كشكول
#روشتة_دكتور_كشكول
دكتور كشكول
توعية طبية لكافة فئات المجتمع
#رشاقة
469 viewsHala, edited 17:15