من الأدوار اللي نتخذها في العلاقات دور المحقق او الشكاك في كل | Noufi 🦋
من الأدوار اللي نتخذها في العلاقات دور المحقق او الشكاك في كل شيء، هذي منبعها ممكن تكون قناعات تبرمجت عليها ان الناس مايقولون الصدق وان لازم ابحث عن الحقيقة، واغلب الادوار على فكرة هي تحمينا من شيء ما .. اتكلم عن اللي دافعها خوف
فمثلاً الشكاك أو المحقق يبي يثبت قناعه ان الناس مافيهم خير وانهم يكذبون علي فيبدا هو يخرب على نفسه زي اللي بيسبقهم يعني، هو خاااايف انه ينصدم فيهم فيقوم يصدم نفسه بنفسه، شعور بس انه ما انضحك عليه لان شعوره بانه انضحك عليه بيخليه يواجه مجموعة مشاعر هو خايف يواجهها، فيصير ينبش واكيد بيلقى شيء عشان بس يسوي تدمير ذاتي ويثبت قناعاته عن الناس او الاشخاص القريبين ويظل بقوقعته..
هنا الواحد يواجه اكثر شعور خايفه، انا لما انصدم بالناس وش راح احس فيه؟ بنصدم بتفاجأ بحس بالخذلان بحس اني غبي وانضحك علي بحس بالضعف بحس بالعار بحس بالوحدة بحس اني ولا شيء ... كل هذي مشاعر نابعه من تماهينا مع الايجو الايجو هو اللي خايف من الفناء مش روحنا روحنا تعرف انها أبدية
مجرد تسليط وعيك على جذر الشعور او السلوك، راح يبدأ يخف سيطرته عليك، حتى لو قررت توقف هالدور، ولقيت نفسك اتخذته مرة ثانية، عادي قدم لذاتك الغفران واشعر بالحب حتى يوم انك اخطأت، بعدين مرة ثانية راح تكون اكثر وعي ممكن تمارسه بوعي راح تلاقي انك ماتبي تكمل، وكأنه يتعارض مع شيء في داخلك، خلاص روحك صارت ساطعه وتأثيرها بدأ الخلاصة اجلب وعيك لأي شيء لا تريده وكل شيء لا يتناغم مع روحك راح تبدأ تعافه
استخدموا هالطريقة في الغوص بداخلكم والوصول لجذر الاشياء
