عارف لما تبدأ تاخد سكة تنفيذ اللي بتحلم بيه، زي طلب العلم مثلا | نُسيبة بنتُ كعب."
عارف لما تبدأ تاخد سكة تنفيذ اللي بتحلم بيه، زي طلب العلم مثلاً، تكتشف مع الوقت قد ايه الشيطان كان مخدرك! آه، الحلم سهل، بتبقى فيه البطل والشيخ والحافظ المتين.. تيجي في أرض الواقع، تلاقي نفسك بتبذل جهد كبير جداً علشان تحفظ متن، أو جزء قرآن، أو باب من أبواب الفقه..
الله الله الله، إيه دا، ايه الصعوبة دي؟
وليه الوقت دا كله؟ أنا كنت فاكر أني هنجز بسرعة وأبقى عالم بسرعة؟
ماهي مش صعوبة يا ريس، الوهم بس كان خفيف ولذيذ فأنساك ان دا الثمن الطبيعي للحصول على أي شيء، ولاكتساب أي شيء..
علشان كدا أرباب العمل والمجتهدين في العلم وطلبه، معندهمش رفاهية الاكتئاب والحزن اللي أنت فيه، هو وراه 10 أجزاء قرآن على 10 آلاف تسبيحة على 20 ركعة قيام ليل على شغله وبيته وعياله و و و
وربنا بيعينه يجيب كل دا على فكرة.. طب ازاي؟ صدق الله يا طيب، هو صدق ربه فصدقه ربه بالحول والقوة..
إنما اللي في الحلم، اللي عايش في مياة تسويف الشيطان له، هيجيله الحول والقوة الربانية ليه؟ هو يستحقها أصلا؟
دا نايم في الخط، وعجباه نومته وكسله..
والجنة غالية، والدين غالٍ، لا يبذل هكذا للي بيقدم نفسه وشهوته على رضا ربه!
لما تعرف الأصول وتمشي بيها، ساعتها هتلاقي الحول والقوة..
