2021-10-18 02:07:12
ح نحكيلكم قصة صارت معاي السنة هادي العبرة من ان نحكيهالكم ان كيف اراء الدفعات يلي قبلك ممكن توديك ف ستين داهيه و كيف برضو تستغل خوفك بشكل ايجابي و بين تخلي الخوف يغلبك ...
في سنة أولى في مادة خوفونا منها بشكل كبير يلي يقولك اني ف رابعه و الماده قاعده معاي و يلي يقولك يجيبو ف اسئلتها من برا المنهج و من بين السطور ....الخ
كلنا خفنا منها بجديات طبعا بحكم سنة اولى المواد قرامر محادثه كتابه ...الخ كلهم حاجات عندنا فكرة عليهم و يقولو المكتوب و اضح من عنوانه بس هي الماده صوتيات و حني تقريبا واخدين 1% بس علاها ف منهجنا ، ع المهم بجديات كانت اكثر ماده خفت منها شخصيا و الدفعه يلي معاي كلهم مرعوبين منها طبعا الدوة هادي قبل حتى ما ناخدو فيها محاضرات خوفونا من الماده و من الاستاذة يلي تعطي فيها بشكل كبير و بحكم ان عندي تجارب فاشلة هلبا مع اراء الدفعات يلي قبلي ديما ف كنت واخده قرار ان مش ح نخلي الخوف يغلبني و بالاحرى مش ح نحكم لين نجرب ، جي وقت اول محاضرة طبعا بدت الاستادة ف الشرح و للأمانه شرحها كان كويس كانت مشكلتي الوحيده ان هلبا فيها هلبا مصطلحات مانعرفهمش و هي للامانه ماده دسمه تعتبر ، استمر الخوف طبعا من الماده بس مافيش مفر منها و وراي وراي ف بديت نحضر في المحاضرة نترجم ف الكلام الجديد و نحفظ ف المصطلحات قبلها بش لما تشرح الاستاذه نكون مستوعبه هي شن نقول برضو كنت شبه كل محاضرة نتفرج عليها ف اليوتيوب كل مره مصدر بالرغم ان كنت مشغولة و مع الكوزات و المواد التانيه لكن الخوف كان مخليني نلقى وقت
طبعا في هلبا ناس قررو يسكرو روسهم و قالو لا مستحيل نصفاها و هي صعبه و ماحد يصفي و في منهم حرفيا يأسو حتى المحاضرات ما يحضروش فيهم خوفهم تغلب عليهم
لما جي النصفي بجديات النص ساعه يلي قبل الامتحان الاذكار كلهم قريتهم قريب 10مرات من الخوف
لما جيت نشوف ف الاسئلة كله واخدينه قصدي وين يلي يجي من برا الشيت اي تبي تركيز و فهم و حفظ للمصطلحات بس تنحل مش مستحيلة زي ما قالو نصدمت بجديات
و بفضل ربي جيت فيها درجة كويسة
ف من هديكا اللحظه خلاص قررت مستحيل نسمع كلامهم مره تانيه في هلبا طلبة في يلي ماباش يخش للامتحان ماباش حتى يحاول اساسا و في هلبا كانو خايفين و قاومو و صفوها
لذلك عمرك ما تخلي الخوف يهزمك و استغله في ان تضغط روحك و نشتغل بجد بش تنجح و عمرك ما تحكم بدون ما تجرب
شهد عبدالحميد
224 viewsShahd Abd Elhamied, edited 23:07