2023-01-31 16:51:24
يا دنيه اصيح بدمعتي بحالي عوفيني
يا دنيه حته بموتتي غربيتيني
عتب شايل الكلب اون والدمع يصب
***
انه زينب والعمر خلص بالاحزان بلايه عنوان
والحياة اتصير ظلمه بدون الاخوان بلايه عنوان
هوه التعود عالبجي عيون ايريد
كلشي خسرته والمشه صار بعيد
شيفيد المعاتب يكلبي شيفيد بلا يه عنوان
جبت العمر دمعه وحزن وفراك ومساهر
والجان ساكن بالجفن عن الجفن سافر
صعب ينسي صعب اون والدمع يصب
*
لا تسأليني يدنيه عن حياتي وذكرياتي
حته دخان الخيم بعده بعباتي وذكرياتي
ذاك الركض والصوط ما ناسيته
مذبوح اخوي بكربله خليته
كلبي تغار النوك من حنيته وذكرياتي
من عملتج يا كربله ليلي ما نمته
طايح جفيل العايله اعله النهر عفته
سهم نضرت الغرب اون والدمع يصب
***
انه زينب والمصايب شيبتني وغيرتني
جارت الايام وشكد تعبتني وغيرتني
كل يوم انوح وكلها ملت نوحي
وعكب اخوتي كل ساع تطلع روحي
يمه المصايب اكبر امن اجروحي وغيرتني
وامنين اجيبنه الصبر وانه مشتاكه
اهواي اعله حالي باليسر حنت الناكه
بقت عيني عالدرب اون والدمع يصب
****
ناضري الصوب الغري هليله درته علي ردته
حاضر الشداد يحضر دفن بنته علي ردته
حان الوادع وجنه كرب موتي
ومحد بعد ياروحي يسمع صوتي
ويه اخوتي ايضل يبجي يم تابوتي علي ردته
سلمان اجه الدفنه وانه ماحضر دفني
صايرلي اكثر من سنه ما طبك جفني
اشوكت اسكن الترب اون والدمع يصب
****
اليريد ايموت تلتم كلها يمه وينسه همه
وأنه محد بيده سد عيوني يمه. وينسه همه
بهداي اصيح بحفرتي نزلوني
امن الطف بعدهن يوجعني امتوني
ايطيب اشوكت جرح الكلب حاجوني ونسه همه
وحشه الجنازه بلا اهل كلها تدريها
وهاي الجنازه الكل سال وين اهاليها
دمع عمري منطلب اون والدمع يصب
*
آخر اللحضات جنت اتمنه الحسين ايغمض العين
ردته من بعد المآسي وضيم السنين ايغمض العين
يحضر اخوي الدفنتي اشمحلاته
وفوك الكبر تجري تضل دمعاته
الما شاف فرحه حكه من حسرته ايغمض العين
اتمنه اصلي اخر فرض وختم اجروحي
ويحسين اكول وتنقبض بالعجل روحي
اشبعد للكبر وطب اون والدمع يصب
**
تمت
تحسين الخفاجي
926 views13:51