2023-01-05 09:50:06
هاي السنه اشكد خدام ويانه ما شفناهم
والمهدي عالزهره ايريد يجري الدمع وياهم
نبجي اعله فركتهم يا محله عشرتهم
****احله خدام جنه كل عام بالمجالس نلتقي ونلطم سويه
والسنه اشلون ما يخدمون وين يحيون الليالي الفاطميه
احنه كل خادم نصير اخوانه
اشمحله لمتهم كبل ويانه
اليلطم اعله حسين خالي امجانه
نبجي ونشوف الصور حزنانه
اشما نبعد ايلمنه حسين هوه الابو والخيمه
من دونه يا ناس انضيع والدنيه تصبح هيمه
اليجروله دمعتهم يا محله عشرتهم
*********
ليش اليروح يترك جروح راحو وبالموكب انشاهد صورهم
واشكد احباب ضم التراب من نروح انزورهم نشم عطرهم
بله يا كلبي الجفوني اشلونهم
بالكبر يمكن تغير لونهم
اعزاز تدري وما اعيش بدونهم
اشلون تغفه بالتراب عيونهم
غالي يصير التابوت لو شال واحد غالي
بس يرخص وما ينشال يا ناس لو رد خالي
وعيوني رادتهم يا محله عشرتهم
*******
يا غلاهم مر هواهم الزهره تتباها بخدمها وترفع الراس
وفقتهم وميزتهم الحلو بيهم بالوفه اينكطون عباس
اسنينهم لم الحسن منذوره
اضلوعهم من اللطم مكسوره
شفنه كل خادم يحب عاشوره
للحسين بكلبه شايل صوره
جانو يلطمون العين لو طاري فاطم ينجاب
وبكل روايه ايصرخون عالاذت بسد الباب
ما تطفه جمرتهم يا محله عشرتهم
******
اخ الاكبور اليبجي معذور خذت وين البي محنه وتارس العين
الخدمو اهواي وزعو ماي ذوله هسه بخير كلهم يم الحسين
بالكبور ما واحد ايحاجيهم
ذوله ابو اليمه تكفل بيهم
تره اشتاك الهم اوده اعليهم
بالمجالس دوم ينضر ليهم
ما ينحسب عالاموات كلمن خدم لحسينه
اسمه بسجل الانصار كل خادم امسجلينه
معروفه نيتهم يا محله عشرتهم
********
كلمن ايموت يلكه تابوت بس ابو السجاد تابوته حصيره
صدره مسحوك وراسه مبيوك ضل غريب بلا جفن واخته اسيره
الخيل فوكه ضلت تروح وترد
ماكو ويه حسين ضل واحد يهد
سلبوها اعماته وزينب تصد
حكها من تنوح يمه وتنظهد
تتغسل بماي الناس بس الحسين بدمه
فوك الترايب عريان وسهام شابع جسمه
واهله بمصيبتهم يا محله عشرتهم
******
تمت
تحسين الخفاجي
949 views06:50