2021-10-19 18:29:46
اليوم الصبح من داروح للجامعة، وگفت تكسي شاب مبين مواليد ٩٢ نظيف ومرتب بس حسيت بي شي مو طبيعي، مشت السيارة وهو كل دقيقتين يتأفأف ومهموم، ومن يحجي بالكوه وخانگته العبره، يعني الحزن واضح على صوته ذكرني بمقولة لجيمس كليرك يگول بيها "الحزن لا يجيد الاختباء، قد يلمحه الأعمى في تضاريس صوتك" المهم اني ماحبيت اسأله خاف اسببله احراج او تَعدي على الخصوصية ولكن جنت منتظره يبادر ويسولفلي، عبرنا شارع المشاتل بالاعظمية ونزّل يم ابو اسواق ديشتري بطل مَي بحجة عطشان، بس بالحقيقة جان ديمسح دموعه.
ركَب السياره وتوه ديعبر جسر ١٤ رمضان بإتجاه المنصور، طلَع مبايله جان يگلي "خويه احسك من شكلك شاعر ما تكتبلي شعر شعبي عن الفراگ"
أني كتله خيرك منو مفارگ ؟ گلي من ٢٠١٨ اشتغل تكسي حتى اجمع فلوس الزواج، ليل نهار اني بالشارع حتى اشتغل على باب الله، جنت استغل كل الوقت حتى اجمّع فلوس، يوم واحد مارتاحيت صارلي ٤ سنين، اطلع من الصبح ارجع بنص الليل في سبيل بس اخطبها بالحلال، بس ارضي اخوتها.
وبالأخير البارحة خطبت واحد عنده رتبه بالجيش وعنده إمكانيه ودزتلي رساله كلتلي ماكدر انتظرك بعد وماكدر اكمل وياك ... اريد ادزلها شعر ممكن تكتبلي.
بالله العظيم نصًا هيج گلي.
اني نفطر گلبي عليه، والمشكلة بالشعبي ما كاتب هوايَ ومحاولاتي محدوده، مع ذلك كتبتله بيتين حافظهن قبل لأحد الشعراء، ودزيته للبنيه ،، گلي اقرالي شكتبت
قريتلهيا ووگف السياره وبقى يبچي ربع ساعه.
شكد صعبة من رجال يبچي بسبب الحُب ... غريب هذا الشعور شكد مؤلم وشگد يجرح بدون ما يرحَم وبدون ما يرفله جفن، الله يكون بعون هذا الشاب وبعون كل مُفارَق، تأثرت بي كلش لأن اعرف شنو شعوره، اعرف شلون ديحس.
كتبتله
وآنهَ شمضيعّني
غير عيونَك الماتدري عني ...
وآنه شمتعبني
غير اظنوني اذا بآچر عفتني
يمي أنت وماتهنيت بوجودك
خفت لآ تنبآگ مني
وبكل بساطة
نباگيت مني.
2.2K viewsاحمَد قاسِم., 15:29
ف
