2021-07-06 23:55:16
البارحة بعدما كملت شغلاتي مرّيت على ابو محمد الچايچي، عاتبني لأن صار فَترة ما رايحلَه، گتله والله مشغول هل إسبوعين إمتحانات ومشاوير واصدقاء وسَفَر، كعدنا جان يكلي سولّف يا عاصفة جابتك هنا، كتله والله هوايَ عواصِف قلبية وفكرية، گلي اربطهن سوة بكلمة وحدة مُختَصَرة كتله "حيرَه"
أشرلي بإيده ع راسه وقلبه، بما معناه حيره بين هذا وهذا، كتله اي اي، بين قلبي وعقلي.
إبتسم وگال، ذكرتني بموقف بحرب ايران بالتحديد بسنة 1983، جنت من ضمن سرية المُشاة ودنعبر لحدودهم مرتجلين، دخلنا لقرية مهجورة بيها درابين ضيقة وبيوت قديمة ودنمشي عادي ثنين ثنين، سمعنا صوت القائد ينادي بجهاز الإرسال اوكفووا لحد يمشي خطوة وحدة، لاتتحركون ابد اوكفوا، لمّا باوعنا شفناها منطقة ملغمة كلها، جانوا الإيرانيّين مسويها مثل الفَخ، صار موقفنا نفس الأفلام الهيلويدية، كتلة تقصد الهوليوودية گال اي اي هاي، كتله وبعدين شصار !! گال بقينا 3 ساعات على نَفس الوكفة محد تحرك شبر واحد، وقبل متصير المغرّب فاتت فوك الحايط بزونة عيونها صفر، وانتَ تعرفني شكد احب الحيوانات وعلاقتي قوية بيهن، كتله اي ؟؟
كال بقيت اباوع عليها وتباوع عليه لمدة عشر دقايق وصرنا اصدقاء وتحاورنا بلغة العين وارتاحتلي وحسيتها افتهمت وضعنا كتله اييي ؟؟؟؟؟؟؟
كال لا تقلق مو من المنطقي اتصرف أي تصرّف غبي واتحرَك خطوة، كتله عفيه حجي عبالي راح تتهور، گال دصبر
بقيت "حاير" بين أسمع لقلبي وامشي ورا الطريق الراح تودينه اله البزونه بأعتبرها ام المكان وتعرفه زين، لو اسمَع لعقلي وابقى واكف منا لباجر الصبح واحتمال واحد من عدنا يغمى عليه ويوكع على لغم ويفجرنا كلنا، كتله واني بكامل تركيزي اييي شسويت ؟
گلي إتبعت قلبي ومشينا ورا البزونه وعبرتنا المنطقة بكل سلام وأريحيّة، مع العلم بكل مكان اكو جثث سابقة وجان مُمكن يكون حالنه حالهم.
كتله متشوّق حتى اعرف الربط بالموضوع،
گلي يابني ماجنت متأكد اذا اتبعت قلبي ورحت ورا البزونة راح اموت، بنفس الوقت اكو احتمالية اموت
اما اذا اتبعت عقلي فمؤكَد راح اموت الفَجر من يتعب احد من جماعتي، فأتمسكت بالطَرف البي احتمالية أعيّش، وهذا الطرف - القلب - دائمًا بي إحتمالية النَجاة، لأن العقل والتفكير الزايد والمُعَقَد ما منهن بس المأساة والسوداوية والمَوت الحتمي.
وختمها بجملة
"إتبع قَلبك ابني، حتى تحدد مصير حياتَك، وحتى تحس انتَ إنسان وتستحق الأفضل دائمًا"
وگام صَبلنه استكانين چاي
وكلكم عيوني.
2.0K views20:55