فَكِّرْ

2021-07-21 16:54:47 اني من ضمن الاشخاص الي يستخدمون كلمة اطفال مو جهال على صِغار السّن، كلمة جهال تأثر بنفسية الطفل وتفقدة الثقة بنفسة، يمكن البعض يعتقد اني دا ابالغ ولكن هاي حقيقة علمية ومُثبَتة،

إستخدام مُفردَات تشجيعية مثل - عفيه يابطل، سباعية انتِ، شجاع انتَ، قوية انتِ ،وغيرها، راح تزرع طاقة عالية بنفسهم وتخليهم اكثر ثقة وحتى على مستوى الذكاء والأخلاق.

لتحاول تخفف من شأنهم، حتى ما تصنع طفل مشوه فكريًا ونفسيًا.

وكلكم عيوني باز کردن / نظر دهید

2021-07-21 16:10:15 التَطور والأنفتاح بكل مكان حلو بس بالعراق مو حلو
ماحصلنا من هذا الإنفتاح غير السيء والرديء من الأفكار والقيّم المُجتمعية، وتركنا التطور الحقيقي لأهلَه.

على سبيل المثال من تباوع على تاريخ الاغاني العراقية بالستينات والسبعينات والثمانينات الى بداية الالفينات وبالتحديد قبل صدور اغنية "يمة كرصتني العكربة"
راح تشوف فرق كبير جدًا، من ناحية مفردات الاغنية واللحن ومن ناحية الإحساس بالاغنية، نفس الفرق بين اللون الابيض والاسود، قَبل جان الفَنان شيء ثمين ومهم ورقم صعب بالوَسط الثقافي والفَني للمجتمع، إله مكانته واحترامه وتقديره لأن أغاني قَبل فعلًا جانت تستحق، وجانت اضافة لتأريخ عراقي مُشرِّف، بينما وين هسه ! لا كلمات ولا الحان ولا إحساس المُطرّب، كلها علمود المشاهدات وعلمود الفلوس، يجيبلي كم مودِل نازعة بالانستا ومتعاركة جم عركة بالسناب حتى يصعد الاغنية لان صوته يلعب النفس والكلمات بالحضيض

اباوع اليوم للوسَط الغنائي التعبان، للأغاني السخيفة الدتنزل، اباوع فقط ع التايتل مال اغنية تنقبض روحي ويصير بيه جالي

عَتبي كُلَ العَتب على ذوق الشَعب.
إصحى يا شَعب.

وكلكم عيوني. باز کردن / نظر دهید

2021-07-21 15:46:06 من انتَ رئيس وزراء بحجم دولة مثل العراق، وتعرف شعبك متبهذل وديعاني من كلشي، وتتجاهل دعوات ومناشدات اطفال صغار مُصابين بأمراض لإجراء عمليات تحتاج تكلفة مالية يعتبروها عاليه بس هيه بكد رُبع نهار تكضيه انتَ.
وتجي تلتقيلي بواحد اصلًا ما مناشدك، شكد طنطل لعد يلكاظمي
شكد غبي انتَ
طيحلا حظك وحظ الجابك علينه.
وحظ الشعب الراضي بيك. باز کردن / نظر دهید

2021-07-21 15:33:16 اول خطوة لتطوير العراق والنهوض بهِ فكريًا وثقافيًا وتصحيح اخلاقيات مُجتمع متعجرف هيّ اغلاق صفحة زهير العطواني على الفيسبوك.


ولتصورني يعطواني
ولا اريد اطلع وجه ثاني. باز کردن / نظر دهید

2021-07-21 15:11:47 الدراسة الالكترونية ديدفع ثمنها الطلاب حاليًا من خلال تردي وسوء بث المحاضرات او تأديتها بالشكل المطلوب بالوقت السابق، فاغلب المحاضرات الالكترونية جانت مجرد (قراءة سلايدات) من دون وجود محتوى علمي حقيقي ممكن يستفاد منه الطالب، وايضا الدوام المتذبذب من مدمج الى الكتروني والعكس خله هالعام الدراسي مشوش وغير جدي لاغلب الطلاب نتيجة عدم وجود آلية جيدة وثابتة بتلقي المحاضرات.
وبعد هذا كله يفرض عليك امتحان حضوري لمادة سنة كاملة المفروض تمتحنها عملي ونظري بذريعة كلام فارغ عن الرصانة العلمية.

وكأنما الرصانة تتعلق فقط بالامتحانات،
بس احنا ما لازم نهتم للخلل بالمنظومة التعليمية وقلة او سوء المختبرات بالجامعات الحكومية وكذلك التجمعات البشرية الي تفوق الطاقة الاستيعابية للجامعة باضعاف نتيجة عدم استحداث جامعات جديدة، هالامور المفروض ما نهتملها ونهتم بس للامتحانات ورصانتها.

محد يختلف ان جزء من الموضوع يتحمله الطالب في حال تقصيره بس حاليا اداء الامتحانات بهالطريقة خيار سيء وغير مدروس وبس الطالب رح يتحمل نتائجه، فالاصرار لهالدرجة على اداء الامتحانات حضوريًا ديخلي من الواضح او شبه المؤكد بوجود جهة مستفيدة من هالموضوع وصراع سياسي حِزبي حول شركات تعقيم او غيرها.

فالوزارة اللي بسبب تقصيرها وعدم اهتمامها ومتابعتها للجامعات العراقية الي صارت تتذيل سلم الترتيب مقارنة ببقية جامعات العالم هي اخر وزارة تحجي وتتمسك بأمور الرصانة.
يا افشَل دورة إنتخابية بالكوكب.

أعان الله الطلاب بهذا الظرف القاهر، وحماهم من الفيروس ومن وزارة التعليم اللعينة.

وكلكم عيوني. باز کردن / نظر دهید

2021-07-14 00:10:37 اذا قريت عن طبيعة حياة العراقيين بالسبعينات او الثمانينات رح تلاحظ نوع من التناقض بطبيعة المجتمع وعاداته، فتشوفه احيانا مجتمع منفتح (تأثرًا بطبيعة الحياة الغربية) وبنفس الوقت منغلق ومنصاع لقيمَهُ البدوية المحافظة، متدين وغير متدين بآنٍ واحد، متحضر من ناحية ومتخلف من ناحية اخرى.
وهلشي شخصيًا اشوفه نتيجة تداخل المفاهيم والقيم داخل عقل الفرد العراقي مما ادى الى عدم معرفته اذا يمشي على عاداته وتقاليده البدوية او ينساق للانفتاح اللي طرأ على المجتمع آنذاك.
فبوقتها رح يبدي يظهر سلوك متناقض !

اما بالوقت الحالي فبدت تنحسر قيم الحضارة بصورة واضحة وصارت قيم البداوة اكثر تأثيرًا وانتشارًا لعدة ظروف اثرت على المجتمع اخر 20 سنة.
لكن مع ذلك هالنوع من التناقض ما زال موجود، فممكن تشوف شخص حياته شرب وملاهي وعاهرات بس الوقت نفسه ميقبل تطلع زوجته من دون حجاب او ممكن يكون عدائي اتجاهك اذا جبت سيرة المذهب واحيانًا تشوفه الاكثر التزاما بالعادات والتقاليد.
وهالتناقض اني اشوفه نابع من نشأة الشخص هذا ببيئة تعتبر تقديس المذهب والعادات والتقاليد من اولوياتها فهالشخص وإن كان نمط حياته مختلف رح يظل يتعامل وي هالامور كثوابت واولويات مما يخلي طباعه وسلوكياته متناقضة.

حسب اعتقادي التغيير اما يجي من الانتخابات (تغيير بطيء وطفيف وتدريجي) واللي اشوفه الخيار الاكثر فعالية حاليًا، او من تغيير للنظام بشكل كامل والغاء الديمقراطية والحكم يظل يقتصر على شخص او عدة اشخاص يفرضون الذوق والنظام بالقوة، وهلشي حصوله مستبعد نوعًا ما.
الحكومات هي من رحم الشعب وجزء منه ونتيجة اله.
فحتى لو سقطت الحكومة بالكامل ما اعتقد راح يتغير شي كوّن الحكومة مجرد مرآة للشعب وتغيرها او تحسنها مقرون بتغيير سلوكيات وعادات واخلاقيات وتفكير الشعب نفسه،
فما من فائدة من بناء احلام على وهم زوال الحكومة.

ياعيني باز کردن / نظر دهید

2021-07-13 23:27:17 الله بالخير.

"احيانًا" المشاهد والاحداث اليومية الصارت واللي دتصير ضمن واقعنا بدت تخلينا نفقد التعاطف وي الاشخاص للأسف، وحتى واقع الاحداث المأساوية والمؤلمة بدا يصير اقل حدة وثأثير.
والموضوع صار مجرد scrolling، سواء النا كعراقيين او حتى لبقية الاشخاص من شعوب اخرى.

حريق مستشفى او سرقة مال عام او تردي الصحة والخدمات وغيرها في بلدنا صارت تعتبر مجرد نتائج لشعب امتلئ بالجهل والتخلف والصراعات، فقبل ما ترفع اصابع الاتهام على الحكومة وتحرض الشباب على الانتفاضة عليها بسذاجة وتهور حتى يكونون مجرد ضحايا اضافيين وتزيد مواجِعنا، تذكر بلدك بعشائره وصدرييه وعبيد رجال الدين والمراجع وأحزاب الميليشيات وبطريقة التفكير الصحراوية عند اغلب مواطنيه، وشلون هالامور بحد ذاتها تمثل عائق جبير اتجاه تطوره وتحسنَه،
فمن المستحيل يجتمع مصطلح حكومة جيدة مع شعب سيء.

جورج أورويل يگول "شعب يختار فاسدون، محتالون، لصوص وخونة، انه ليس ضحية بل شريك"

ياعيني. باز کردن / نظر دهید

2021-07-06 23:55:16 البارحة بعدما كملت شغلاتي مرّيت على ابو محمد الچايچي، عاتبني لأن صار فَترة ما رايحلَه، گتله والله مشغول هل إسبوعين إمتحانات ومشاوير واصدقاء وسَفَر، كعدنا جان يكلي سولّف يا عاصفة جابتك هنا، كتله والله هوايَ عواصِف قلبية وفكرية، گلي اربطهن سوة بكلمة وحدة مُختَصَرة كتله "حيرَه"
أشرلي بإيده ع راسه وقلبه، بما معناه حيره بين هذا وهذا، كتله اي اي، بين قلبي وعقلي.

إبتسم وگال، ذكرتني بموقف بحرب ايران بالتحديد بسنة 1983، جنت من ضمن سرية المُشاة ودنعبر لحدودهم مرتجلين، دخلنا لقرية مهجورة بيها درابين ضيقة وبيوت قديمة ودنمشي عادي ثنين ثنين، سمعنا صوت القائد ينادي بجهاز الإرسال اوكفووا لحد يمشي خطوة وحدة، لاتتحركون ابد اوكفوا، لمّا باوعنا شفناها منطقة ملغمة كلها، جانوا الإيرانيّين مسويها مثل الفَخ، صار موقفنا نفس الأفلام الهيلويدية، كتلة تقصد الهوليوودية گال اي اي هاي، كتله وبعدين شصار !! گال بقينا 3 ساعات على نَفس الوكفة محد تحرك شبر واحد، وقبل متصير المغرّب فاتت فوك الحايط بزونة عيونها صفر، وانتَ تعرفني شكد احب الحيوانات وعلاقتي قوية بيهن، كتله اي ؟؟
كال بقيت اباوع عليها وتباوع عليه لمدة عشر دقايق وصرنا اصدقاء وتحاورنا بلغة العين وارتاحتلي وحسيتها افتهمت وضعنا كتله اييي ؟؟؟؟؟؟؟
كال لا تقلق مو من المنطقي اتصرف أي تصرّف غبي واتحرَك خطوة، كتله عفيه حجي عبالي راح تتهور، گال دصبر
بقيت "حاير" بين أسمع لقلبي وامشي ورا الطريق الراح تودينه اله البزونه بأعتبرها ام المكان وتعرفه زين، لو اسمَع لعقلي وابقى واكف منا لباجر الصبح واحتمال واحد من عدنا يغمى عليه ويوكع على لغم ويفجرنا كلنا، كتله واني بكامل تركيزي اييي شسويت ؟
گلي إتبعت قلبي ومشينا ورا البزونه وعبرتنا المنطقة بكل سلام وأريحيّة، مع العلم بكل مكان اكو جثث سابقة وجان مُمكن يكون حالنه حالهم.
كتله متشوّق حتى اعرف الربط بالموضوع،

گلي يابني ماجنت متأكد اذا اتبعت قلبي ورحت ورا البزونة راح اموت، بنفس الوقت اكو احتمالية اموت
اما اذا اتبعت عقلي فمؤكَد راح اموت الفَجر من يتعب احد من جماعتي، فأتمسكت بالطَرف البي احتمالية أعيّش، وهذا الطرف - القلب - دائمًا بي إحتمالية النَجاة، لأن العقل والتفكير الزايد والمُعَقَد ما منهن بس المأساة والسوداوية والمَوت الحتمي.
وختمها بجملة
"إتبع قَلبك ابني، حتى تحدد مصير حياتَك، وحتى تحس انتَ إنسان وتستحق الأفضل دائمًا"

وگام صَبلنه استكانين چاي

وكلكم عيوني. باز کردن / نظر دهید

2021-07-03 15:25:15 مداكدر اتخطى الفيديو مال البنية الطفلة القتلوها عشيرتها بسوريا بسبب #غسل_العار.

مجرّد رفضت تتزوج ابن عمها وحاولت الهَرب ويا حبيبها الي اصلًا هو حاول يتقدم عليها ويخطبها لكن اهلها رفضوا،،

اتسائل اني وقلبي مليان حزن وألم، شلون مُمكن الإنسان يقتل بنته بكل دم بارد لأن حاولت تتخلص من جحيمهم!
الى أي درجة صارت روح الأنثى رخيصة بهذا المجتمع العربي القَذر؟؟
ماكدر انسى نظراتها الهم وهمه يضربون عليها رصاص حَي، حتى الكلاب ارحم من عدهم

باجر عكبة ذولة بأي وجه راح يقابلون الله!!؟ وشلون راح يعاقبهم !! هل النار تكفي؟
لا ومحمد ما تكفي .. بالله ما تكفي النار

الى جهنم كُل شخص يشجع على هيج افكار، وعلى كل شخص يقتل بنته ويعذبها بهل حجج البالية.
العشائر بصمة عار بتاريخ البشرية.

الله يرحمها يارب، ويسكنها جناته
اني متأكد هسه هيّ مرتاحه باز کردن / نظر دهید

2021-07-02 18:40:14 لازم نتفق على أنُ مُصطَلح "صوت المرأة عورَه" مُصطلح خاطئ وما لازم يكون بهاي العبارة
المَفروض نگول "الصوت العالي عورَه" حتى نگدر نطبق هاي المقولة بحكمَة وعدالة على الذكور والإناث
لازم كُل إنسان سواء ذكر او أنثَى يتكلم بهدوء مو بصوت عالي ومزعج ويحترُمْ المكان المتواجد بي
مَرة شخص كدامي بالمُستشفى دگوا عليه وجاوب "ها ابو فلانن شلونَكك" بصوت عالي وسخيف.
لِذلك اذا كان صوت المرأة عورَة فصوت الرجل العالي ازعاج جدًا وغير لائق إله،
لِذى المفروض على كل شخص يحترم صوتَه وما يعليه، ويحترم المكان وآداب الحوار.

ونتذكر دائمًا
"الصوت العالي عورَه"

وكلكم عيوني. باز کردن / نظر دهید