فَكِّرْ

2021-07-27 19:52:12 عجيبة هاي الدنيا، تطلع طلعة مزاجك تعبان تشوف واحد يغير حياتك، أو أتيه بطريق غلط تلكه نفسك بمكان جديد تحبه وتظل يوميه تروحله
وطول ماتمشي بطريقك علاقتك تقوه بناس وتضعف بناس، تشوف الباقي انت لأجله وهو ماكو والباقي هو لأجلك وانت مشغول. وتلكه كتاب انت شامره تقراه يغير تفكيرك
وكل شغلة بهالامور تعوف بداخلك أثر صغير أو جبير ، ومواقف تتذكرها جانت شر ويتضحلك بعد شهور طلعت خير . وتظل متعجب لو مصايرتلك جان شلون عشت، تسمع بيت شعر يذكرك بغايب ناسي، وتسمع آية تسندك وتصلحك . وتشوف صاحبك نزل بوست يواسيك وهو ميدري بيك متضايق أصلاً، يموت غالي عليك تصير وراها أقوى، وتشوف موقف يضحكك بعز حزنك يخفف عليك. تصيرلك امور تكول اكيد صارت صدفة بس لو ركزت شوية راح تعرف منو الواكف وياك

سبحان مدبر الأمور.

وكلكم عيوني. باز کردن / نظر دهید

2021-07-27 19:39:54 اذا مريت بسيارتك بشارع وشفت مشرد ملابسة تعبانة ومبينه على وجهه علامات البؤس والتعاسة ويمدلك ايده حتى تنطي وبعينه دمعة تريد تنزل، اتأثرت وطلعت فلوس من جيبك وانطيته
واتمنيت لو وياك لكمة لو ملابس زايده حتى تساعده اكثر
المرة الثانية فتت بنفس الشارع وشفته بنفس المكان ونفس الهيئة ونفس الرجاء من المحسنين، راح تنطي بس مو نفس حماس المرة الاولى، وبالثالثة نبهك بالك على شي حسيت مايستحق بعد كل هالعاطفة رغم الاخذه منك ماخلاه يودع حياة التشرد.

هذه حالنا بالعطاء احنه البشر، منقابل المحتاج بنفس القبول مرتين، عكس الله من يشوفنا على ناصية الذنب رافعين أيدينا للدعاء. ينطينا من رحمته وعطفه وكرَمَه ونتصور مانرجع بعد ونمد أيدينا اله و بكل مرة نرجعله مفلسين، عشرة وعشرين وميت مرة، ينطيك نفس اول مرة رفعت ايدك بيها.

معاملتك للبشر تعكس نظرة الله عليك، ارحم الناس حتى الله يرحم بحالك

قال تعالى (إِلَّا رَحْمَةً مِنْ رَبِّكَ إِنَّ فَضْلَهُ كَانَ عَلَيْكَ كَبِيرًا)

وكلكم عيوني. باز کردن / نظر دهید

2021-07-26 20:36:55 من الأمور المؤسفة التي لاحظتها وتوصلت لها بسبب عراقيتي، انه لايمكن تغيير مجتمع رث، منحط، متعجرف ومتنمر. إلا من خلال استخدام نفس الوسائل التي يمارسها.. كالتنمر عليه وأهانتهُ
فهي اللغة او الثقافة الوحيدة التي يفهمها.. إذ لايمكن ان تقنع دب الپاندا في تغيير أساليبه من خلال اقتباس لمارك توين او تتعامل معه بأداوت منطق آرسطو..
لهذا تلاحظ كيفية هبوط الفن على صعيد التمثيل او الغناء او الكتابة او البرامج المتنوعة حد الرثاثة والسخافة وينزل لمستوى الدهماء، ليلقى رواجًا وقبولاً من قبلهم..

خذ رحلة سريعة في مواقع التواصل واليوتيوب وقارن بين عدد مشاهدات التفاهة وبين مشاهدات برامج ذات قيمة فكرية وتنويرية..
ستجد ان (معظم او أغلب) المشاهير لديهم جوائز نوبل في التفاهة والإنحطاط..

قارن بين رجل دين تافه او رادود حسيني لطّام او مطرب فاشل وبين فيلسوف او مؤرخ يطرح برنامجا تاريخيا او فلسفيًا يصب في فائدة الناس وتنوير العقول لكنه يتحدث بطريقة رسمية وجدية..

طالما يوجد جمهور يشجع التفاهة والسخافة والإنحطاط الخُلقي والقيَمي، سيتكاثر (الطاشين) بأخس وأرذل الأنواع.

الى الله المُشتكى ...
وكلكم عيوني باز کردن / نظر دهید

2021-07-24 21:07:52 لتصدك انسان يكلك اني مااعرف اكره، الميعرف يكره ميعرف يحب والميعرف يشك ميوصل لليقين والماكافر بتفكيرة ماواصل للإيمان، محد يتأذى غيرك اذا تتبره من احساسك لأن سلبي
اقبلة للشر البداخلك حتى تعرف تروضه، اعترفلة انت اخوه الشرعي ، صديقه وصاحبه الابدي، وكتها راح يسمع كلامك واذا كتله كن راح يكن،
ولازم تعرف البشر مهما وصل من درجة بالعلم والثقافة هو معرض للخطأ اليومي بإستمرار ... لذلك اترك جَلد الذات على صفحة، وروح أسمعلي مقام عراقي أصيّل بصوت يوسف عمر.

وكلكم عيوني باز کردن / نظر دهید

2021-07-24 21:02:18 بعد كل انكسار وصدمة وخسارة وفشل بمعارك الحياة الكبرى لازم تطلع بره السياق وتوكف على صفحة شوية ترتاح وتاخذ نفس وتسترخي ومتحكم على وضعك بلحظة ضعف، من تشوف نفسك تعبان لتكول بعد ماعندي مقدرة للعطاء من تحس بنفسك مرهق ومالك واهس للشغل او للدراسة لتتصور هذا آخر المشوار، كل السالفة انت محتاج مساحة بيضة مابيها مسؤوليات، راحة جسدية ونفسية وفكرية، تكون عن طريق هدنة للنفس بدون تأنيب ضمير، وهذا الشي مو عيب، كل مرحلة تخلص حتى تبدي غير مرحلة، اركض واضحك ونام هواية واكل واتفرج برامج تافهة ومسلسلات، أشحن روحك من جديد بشغف وحياة ومن تشوف نفسك اتوازنت راح تهدأ وترتاح وتثكل بتفكيرك، لازم تعرف نهاية أي طريق هو بداية طريق ثاني ، وبالنهاية ماكو شي راح تخسره وانت بعدك ببداية حياتك وتأكد ماكو تجربة تمر اذا متنطيك درس تستفاد منه بالمراحل الجاية

خليك قنوع وخليك مؤمن بنفسك وگول اني راح اسعى وراح انجح بكل مجال راح ادخله بحياتي وبدراستي هم.
وعاشت ايدك كابين ..

وكلكم عيوني باز کردن / نظر دهید

2021-07-23 23:28:33 حسابي الشخصي على الأنستا.

https://instagram.com/s1954_?igshid=d9fzsmcyo08o باز کردن / نظر دهید

2021-07-22 16:47:16 الناس الي توزع البسمة على التعرفه والمتعرفه الي دائما تشوفه يضحك بوجهك ويكلك اني كلش زين ومرتاح، الي كل همه يسمعك وميريد يحجي كلمه، الي انت ماتعرف ليش هيج يسوي، الي تشوفه مقهور على امور بنظرك تشوفها تافهه بس بنظرة غالية، الي دائما يكلك باجر عكبة تفض لا تهتم، الي يكدر يفهمك ويستوعبك من نبرة صوتك وملامح وجهك، الي يحبك وماعنده وياك مصلحة ويساعدك بدون مايريد مقابل، الي اذا ضحكت يضحك من كل گلبه واذا حزنت يحزن وياك
هالناس اذا انكسروا منك، ينكسرون للأبد.

لذلك لا تكسروني .

وكلكم عيوني. باز کردن / نظر دهید

2021-07-22 16:33:04 اخي المغرور
اختي المغرورة

.أنتَ مولود بمستشفى أهلية، واني مولود مستشفى عادية وهسه ماكو فرق ثنينه عايشين، انتَ تدرس بمدرسة اهلية واني بحكومية وماكو فرق ثنينه خلصنا نفس المَرحلة، يمكن انتَ تكعد الصبح نايم على السرير واني بالكاع بس احنا الاثنين اخذنا راحتنا بالنوم، انتَ تاخذ ملابس ماركة من المول واني من السوك بس ثنينه مستورين، انتَ تاكل مشاوي ودلفري من المطاعم واني اكل من البيت بس ثنينه شبعانين، انتَ تصعد بسيارتك الخاصة وسيارة اهلك اني اصعد بعبرية وتكسي بس ثنينه نوصل للمكان الانريده، احتمال انتَ تقرا كلامي هذا من احدث المبايلات واني مبايلي شاشته مكسوره بس ثنينه جاي نقره نفس الرسالة


الحياة مو منافَسة، وأكو هوايَ طرق مختلفة حتى توصل للأهداف وتحقق السعادة منها، لكن تذكر دائمًا
السعادة الحقيقية هيّ أن تكون دائمًا راضي بالعندَك، ومؤمن بأن مغيّر الأحوال قادر أن يغير حالَك بلحظة وحدة "من الأسوء للأفضل (وبالعكَس ايضًا)"
لذلك خليك دائمًا شاكر الله.
وبطل سوالف التكبر والتفاخر والغرور

وكلكم عيوني. باز کردن / نظر دهید

2021-07-22 16:20:59 ما اكدر اتعامل ویه شخص بداخلة قسوة تجاه البشر سواء كان صدیق، گرایب، عمل، متأكد علاقتي وياه بطريقها للنهاية او اضعف الأيمان راح تصير علاقة سطحية على كد السلام وأحاول اتجنبه اذا المواقف جمعتنا، ما اعرف اتعامل ویه واحد عنده قلة ذوق وما يغفر ويتشمت بمصيبة غيره وبس يحجي على الناس ويتنمر ويكفر ويسب وعصبي دائما حتى لو ابن عمي يصير، الناس الما يرمشلهم جفن من يصير سبب بحزن وضيق غيره ما اكدر اتعامل وياهم مهما بلغت درجة قربهم مني. باز کردن / نظر دهید

2021-07-22 16:08:18 شکد ميصير عمره صيحله اخوية مو ابو الفحم عمرلي النركيلة، واسمها الفراشة مو خدامة، واسمه عامل نظافة مو زبال والمطعم من تصيح الويتر گله "من رخصتك" ومن يجيبلك الطلب كله "شُكرًا" واذا نزلت طبق اكلت منه لكمتين وشبعت اخذه سفري وانطي لأي فقير بالشارع، واذا کدامك محل جبير يبيع شغلة انت رايدها وشفتها يم بسطية اشتري من البسطية ولتوكف على الف والفين وياه ماراح يحلن ازمتك الاقتصادية، واليمد ايده ومتريد تنطي ابتسامة وكله الله ينطيك، احترم ضعفه وانكساره وخل يروح بأدب، واليطلب رأيك بفد شغلة إنطيه رأيك بكامل إحترام وتواضع، والعجبة يحجيكلك نكته حتى اذا سخيفة وسامعها، ابتسم عليها ولا تخليها بخاطره .

وتذكر دائمًا
الراحمون يرحمهم الله

وكلكم عيوني باز کردن / نظر دهید