2021-05-14 13:53:12
વજુભાઈ વાળા યાદ આવે છે. તેમની સેન્સ ઑફ હ્યુમર ભલભલા હાસ્ય કલાકારોને ઝાંખા પાડી દે એવી. પણ તેમની બોલી સાવ ગામઠી. કોઈ પણ નવી વાતની શરૂઆત ઇ કરીને... પ્રીફિક્સથી કરે. ઇ કરીને... તેમનો તકિયા કલામ બની ગયેલો. લોકો જાહેરમાં વજુભાઈની મજાક ઉડાવે, છાપાઓમાં વજુભાઈનું સ્ટેટમેન્ટ ઇ કરીને...થી શરૂ થાય, પણ વજુભાઈએ કોઈ સામે પોલીસ કેસ કર્યો હોવાનું મારા ધ્યાનમાં આવ્યું નથી. વજુભાઈ ખેલદિલ છે, પોતાના પર હસી શકે છે. હવે તે ગુજરાતના રાજકારણમાંથી દૂર છે એટલે હવે કદાચ એ ઉદાર પરંપરા અને ખિખિયાટા વિસ્મૃત થઈ ગયા છે.
હવે ગુજરાતમાં મીમ પણ સહન થતા નથી. લાગે છે કે ગુજરાતમાં પત્ની સિવાય કોઈ પર જોક્સ સહન થઈ શકતા નથી. હાસ્યપ્રેમી ગુજરાતીઓને તો આવા જોક્સ ગમે છે, પરંતુ શાસક પક્ષ અને તેના નેતાઓ, જેના પર જોક કરવામાં આવે છે તે સહન કરી શકતા નથી. ગઈ કાલે વડોદરામાં એક મીમરની ધરપકડ થઈ. હજી બીજા મીમર્સને ધમકી મળી રહી છે. આ દેશમાં મનમોહનસિંહ વડા પ્રધાન હતા ત્યારે તેમનો જેટલો ઉપહાસ થયો છે તેટલો સમસ્ત ભારતમાં આજ સુધી કોઈનો થયો નથી. રાહુલ ગાંધીને તો વર્ષોથી પપ્પુ કહેવામાં આવે છે અને 2014 સુધી તો તેમની પાસે સત્તા હતી. મનમોહનસિંહ અને રાહુલ ગાંધી પર જોક કરવા માટે, તેના પર મીમ બનાવવા માટે આ પ્રમાણે તો અડધા ભારતને જેલમાં નાખવું પડે. રાહુલ ગાંધી બ્લેક બેલ્ટ ચેમ્પિયન છે, ફોરેનમાં ભણેલો છે, વિપશ્યનાનો સાધક છે, તોય તેને પપ્પુ કહેવામાં આવે છે. ભલે કહે, જેવો જનતાનો મૂડ. આ જ લોકશાહી છે. તેની આટલી ગંદી મજાક થાય છે, દાદી અને પિતાનું પોલિટિકલ મર્ડર થયું છે તોય એ માણસ હારીને બેસી જતો નથી. લોકો હસે તો ભલે હસે, પણ લડતો રહે છે. આ બાબતે મને માન છે આ માણસ પર. આવી ખેલદિલી હોવી ઘટે.
આપણે ત્યાં મુખ્ય પ્રધાન પર મીમ્સ બને તો શું હસી ન કઢાય? TAKE IT Easy કેમ નહીં? કદાચ તમે ઉપેક્ષા કરી હોત તો બે દિવસ હસીને બધા ભૂલી જાત. આ તો તમે એવો તૂલ આપી દીધો કે હવે આ ક્યારેય નહીં ભૂલાય. યાદ રહેશે કે ગુજરાતમાં કવિતા, વ્યંગ, હાસ્ય, વોઇસ ઑફ ડિસેન્ટને દબાવવાની જબરદસ્ત કોશિશ થઈ. શું આ તારક મહેતા, અશોક દવે, શાહબુદ્દીન રાઠોડ અને જ્યોતિન્દ્ર દવેનું ગુજરાત છે? પારુલબહેન ખખ્ખરને તેમની કવિતા માટે જેહાદણ, વેશ્યા, પુતના જેવા શબ્દોથી નવાજવામાં આવ્યાં. આ દેખાડે છે કે કોઈ વ્યક્તિ આપણી પોલિટિકલ આઇડિયોલોજીથી વિરુદ્ધનું કંઈક લખે તો આપણે તેને ગંદામાં ગંદી ગાળો આપતા ખચકાતા નથી. ચાહે તે આપણી સગી બહેન કેમ ન હોય. હેને? ખરેખર તો આવી ગંદી ગાળો દેનારની ધરપકડ થવી જોઈએ. સીએમ પર બનેલા મીમમાં શું ગંદી ગાળો છે?
મેં એક કિસ્સો સાંભળેલો છે. શંકરસિંહ વાઘેલા ગુજરાતના મુખ્યમંત્રી હતા. ગુજરાત સમાચારના ફોટોગ્રાફર કાંકરિયા ઝૂના એક સિંહનો ફોટો લઈને આવેલા. ફોટો જે સિંહનો હતો તેનું નામ શંકર હતું અને તે રોજ 14 કિલો માંસ ખાતો હતો. શ્રેયાંસભાઈ શાહે એ ફોટાને કેપ્શન મારેલી, 'શંકર સિંહ રોજ 14 કિલો માંસ ખાય છે.' બીજે દિવસે આખા ગુજરાતે દાંત કાઢેલા. શંકરસિંહ પણ ખૂબ હસેલા. આ આપણું હસતું ગુજરાત છે.
પત્રકાર અક્ષય કુમારે વડા પ્રધાન નરેન્દ્ર મોદીનો એપોલિટિકલ ઇન્ટરવ્યૂ લીધો ત્યારે તેમણે પીએમને એક મીમ દેખાડીને તેમનું રીએક્શન પૂછેલું, પીએમે કહેલું કે હું આમાં ક્રિએટિવિટી જોવું છું અને ખૂબ હસું છું. અમારી નહીં તો કમસેકમ પીએમની તો વાત માનો.
મીમર પર કેસ કરનારને બીજું તો શું કહું... ગેટ વેલ સૂન...
હું પત્રકારો, કલાકારો, સાહિત્યકારો, કવિઓ અને મીમર્સની પડખે ઊભો છું.
- કુલદીપ કારિયા
#I_Support_GMC
#I_Support_Freedom
#I_Support_VoiceOfDissent
#I_Support_memers
#I_Support_Humour
740 viewsDr.JJ Jadeja, 10:53
T
