- خد حنان معاك يا أحمد. وقف وهو رافع حاجبه - آخدها فين يا عمي؟ | خواطِر،إقتباسات وقِصص🌷📖

- خد حنان معاك يا أحمد.
وقف وهو رافع حاجبه - آخدها فين يا عمي؟ أنا نازل شوية وجاي.
- خدها معاك بدل ما هي قاعدة كده.
- حاضر.
بص ليا وهو بيضغط على الحروف برخامة - يلا يا ستي.
- مش هنزل معاك.
- يلا يا زفتة.
بصيت الناحية التانية - قوله يا بابا إني مش هنزل معاه.
- ليه هو زعلك؟
أحمد وقف في النص - أزعلها ايه دي تزعل بلد.
رفعت صابعي وقربته من عينه - اسمع يا أحمد، أنا مش هسمحلك تتعامل معايا كده، ويعني يا سيدي لو أنا ضغط عليك علشان بتخرجني فبلاش منها خالص، وإن أنا معنديش أخوات دي مشكلتي أنا مش مشكلتك.

سيبتهم ودخلت الأوضة وقفلت على نفسي، مهتمتش بيهم وهما بينادوا، أحمد بيجرجرني وراه حرفيًا، مش بياخدني معاه لأ، بيجرني وراه كده، كأنه مغصوب ينزلني، هو فعلًا مغصوب، بابا خايف عليا علشان طول الوقت لوحدي وعلشان عارف إن معنديش صحاب وإني مش بخرج من البيت، فمفيش غير أحمد اللي يخرجني.

فتحت البلكونة ووقفت فيها، لاقيته واقف تحت في الشمس، أول ما شافني شاور علشان أنزل، اتصل بيا فرديت - عاوز ايه.
ابتسم - انزلي يلا.
- لأ.
- خلاص بقى أنا آسف.
- مش آخر مرة قولتلي إنك اتخنقت؟ خلاص اخرج بقى.
- متبقيش قفوشة كده، وبعدين يا عبيطة يعني ايه مش عندك أخوات دي، أومال أنا ايه.
- إنت واحد غبي.
- ولما أطلع أجيبك من شعرك دلوقت؟
- دا بابا يقتلك.
- طب خلاص أنا آسف.
- سامحتك، بس أنا فعلًا مش حابة أخرج، هسمع فيلم هنا وخلاص.
- فيلم ايه؟
- أي فيلم قديم.
- طب استني هشتري لب وشيبسي وأطلع.

رجعت خطوة لورا علشان ميشوفنيش وأنا ببتسم، هو فعلًا غبي، علشان زعلني.
حمّرت بطاطس وحطيت عليها كاتشب وعملت فشار واستنيته.
بابا خرج من أوضته - مخرجتيش ليه مع أحمد؟ أخرجك أنا؟
- لا يا بابا هو طالع.
- والله دا اللي مصبرني على الواد ده، حنيته.

بصيت للفشار بسرعة، معرفش ليه اتحرجت لما قال عليه كده، شوية وأحمد دخل، قال لبابا - يا عمي شوفلك حل في بنتك دي، دا لو بنعامل طفلة مش هتتعامل كده.
- تدلع براحتها، طول ما أنا عايش تدلع.
- وطول ما أنا عايش أنا كمان، ما هي قدري.
رمى الأكياس عليا - خدي يا رب يطمر بس.
- أحمد، إنت قليل الذوق.
- يعني أنا سايب صحابي ومخرجتش بسببك وبتشتمي!
- يا كذاب، بقى كنت هتخرج مع صحابك؟
- آه والله، ورايح أعمل خير كمان، هيفرقوا حاجات على الناس المحتاجة.
- بقى أنت تعمل خير!
- يا بنتي مش لسه شاري لب أهوه وعامل خير معاكِ؟ عاملة زي القطط.
- بخربش؟
- لأ بتنكري.
- ششش، اختار الفيلم واسكت.

عمر الشريف لما ظهر بصيت لأحمد، تقريبًا نفس طوله ونفس شكل شعره.
بص ليا فجأة فاتخضيت، سألني - طبعًا نفسك تلبسي فساتين زي دي.
بصيت لفستان فاتن حمامة وقولتله - عادي هلبسهم في الجنة.
- طب ما تلبسيهم لما تتجوزي، ايه الغباء ده.
- أتجوز؟
- إنتِ مستغربة كده ليه؟ ايه ناوية تطولي معانا هنا؟
- مش بابا قال تدلع براحتها؟
- يا ستي اتدلعي، يتيمة وتدلعي براحتك.
بصيتله بسرعة وأنا قلبي حرفيًا كان وقف من الكلمة اللي قالها، ساب اللب من إيده - والله آسف أنا مقصدش، أنا بس الكلمة دي على لساني لأي حد.
- ..
- والله ما أقصد متزعليش.
ابتسمت - مفيش حاجة.
قعدت دقيقة واحدة ومكنتش قادرة أكتم الدموع أكتر من كده، فدخلت الأوضة وسيبته، قعدت على السرير وأنا ببص لصورة ماما على المراية وبعيط.
- حنان افتحي أنا آسف.
-..
- والله العظيم ما أقصد، حقك عليا.

غيرت هدومي ونزلت تحت الغطا وداريت وشي علشان مسمعش صوت.
الصبح صحيت على صوته هو وبابا، كان بيقول لبابا - دي حنان أشطر طباخة في الدنيا.
كنت عارفة إنهم واقفين ورا الباب وبيعلوا صوتهم كده علشان أسمع ومبقاش زعلانة.
بابا قاله - أيوة طبعًا، دا أنا مبعرفش أفطر غير من إيدها.
- طب ما تصحيها يا عمي خليها تعملنا الفطار.
ابتسمت ولبست الإسدال وفتحت الباب فجأة، كانوا واقفين ورا الباب فعلًا.
أحمد قال بسرعة - ايه ده؟ كنا لسه هنخبط على الباب نصحيكِ.
- والله بجد؟
- بجد بجد.
- إنت نمت هنا؟
- أيوة، قولت يعني حنان العسولة بتعمل فطار جميل فستنى أفطر معاهم.
- تستنى من إمبارح للنهاردة علشان فطار!
- على أساس بتعرفي تعملي أوي؟ دا إحنا بنضحك عليكِ.

الحقيقة إن الحاجة الوحيدة اللي بعرف أعملها هي الطبخ، ماما علمتني، بابا دايمًا بيقول إني كل ما بعمل حاجة بيفتكرها علشان بتبقى نفس الطعم ونفس الريحة.

- كنت عاوز أقولكم على حاجة.
أنا وبابا انتبهنا، فكمّل - أنا قررت أخطب.
بصينا لبعض، يعني مش هنكر إني اتصدمت، أو حسيت إني اتضايقت شوية علشان ممكن أكون معجبة بيه، أو عقلي خلاني أكون معجبة بيه علشان مفيش غيره قدامي، بس برضو فرحت.
- مين دي يا لا؟
- دي لو سمعتك بتقوليلي كده هتموتك.
- والله!
- لا إنتِ تقولي اللي إنتِ عاوزاه عادي.
بصّ لبابا - وعاوزك تيجي معايا يا عمي، هنروح الأسبوع الجاي بإذن الله.
- الله يتمم لك على خير يا حبيبي، صلي استخارة بس الأول.