2023-05-09 08:22:22
أي كلمة عندها مدلول عاطفي ، ومدلولها العاطفي هو اللي بيسبب الثقل في نطقها ، وبيسبب المشاعر بشقيها " إيجابي/سلبي" ، والتفكير بشقيه " إيجابي/سلبي ".
نأخذ على سبيل المثال كلمة (حرب) :
• كلمة حرب عند البعض بتعني :أفلام الحرب/القتال، و ألعاب الأكشن مثل ( ببجي ، كول اوف ديوتي ، فري فاير .. الخ)
• كلمة حرب عند البعض الآخر بتعني : قتل ، تهجير ، فقدان أقارب ، نزوح/لجوء ، فقدان حياة/ثروة .. الخ.
( فبسبب التفاوت في المدلول العاطفي للطرفين ، بنلقى تفاوت وإختلاف لردات فعل الطرفين عند سماع كلمة الحرب)
فعلشان كده بنلقى في السودان ، جزء من الناس متأثر بالحرب لأن عايشها وشاف أثارها ، وجزء تاني مش متأثر لأن ما كان موجود في مناطق الضرب .
وده بيخلق تفاوت في رؤية الطرفين للحاصل ، الجزء اللي ما حضرب الضرب بيكون مش حاسس بحالة الرعب/الهلع اللي بيعاني منها الجزء اللي حضر الضرب .
حتى في الدعوة لإستمرار الحرب ، بنلقى إن الطرف البعيد عن الحرب ماعنده مشكلة في إستمرار الحرب وبالعكس ممكن يشجع عليها علشان يتم دحر العدو ( طبعا ما اي زول بعيد عن مناطق النزاع بيفكر بالطريقة دي ، البعض منهم ).
والطرف اللي حضر الضرب وإتأثر منو بشكل مباشر/غير مباشر ، بنلقاه رافض فكرة الحرب ( لأن جرب وعايش آثار الحرب )
في مثل عندنا بيختصر كل ده : " اليده جوة النار ، ما زي اليده برة النار"
فبما إن أي كلمة ليها مدلول معين ، وهذا المدلول بيسبب الأفكار/المشاعر اللي بنعايشها ( فحانحاول نغير مدلولات الكلمات اللي بتسبب لينا الهلع )
بمعنى تاني : ( حاول أنظر للحرب أو فكر فيها عن طريق إستخدام لغة غير لغتك الأصل ، تفكيرك أو رؤيتك لكلمة حرب بالطريقة دي حايحصر من مدلولاتها وبالتالي حايقلل شوية من تأثير الكلمة دي .
أيضا حاول أضيف مدلولات إيجابية/تطمينية للكلمة المرعبة بالنسبة ليك ، يعني مثلا بدل تشوف الحرب موت فقط ، حاول شوفها نقطة بداية جديدة ليك ، حاول شوفها فترة وبتعدي ، حاول شوف إن كل المرتبط بالكلمة دي وإنت خائف منو لسة ما حصل .. )
الأغلبية بتخاف من صوت الضرب ( رصاص، صواريخ) ، والسبب في الحاجة دي إنهم رابطين صوت الضرب بأذيتهم ( كل ما زادت شدة الصوت ، كل ما زاد خطر إن أتصاب/اللي بحبهم يتأذوا ).
بس أغلبية الناس الخايفة من صوت الضرب بسبب الحجة السابقة ( ما أتأذوا ولا اللي بحبوهم إتأذوا ) ، إذا صوت الضرب ما بيعني إنك حاتتأذى ، صوت الضرب بيعني إن العدو قريب ليك ليس الا ، وإن علو صوت الضرب ناتج من قوة الأساحة فقط فطبيعي تسمع الصوت قريب ليك حتى لو كان بعيد منك .
( وعلشان نقلل من التأثير النفسي لصوت الضرب ، لابد من إن نستخدم نفس الطريقة اللي إستخدمناها مع كلمة الحرب في المثال الفوق .
إن نحاول نوجد مدلولات تانية لصوت الضرب ، وإن نحاول نفكر بلغة غير لغتنا الأم ، وإن نحاول نأكد إن صوت الرصاص ما بيعني إننا حانتأذى)
1.0K views05:22