استشهاد الامام الجواد ع ذبلانه العيون لا ناصر وعون مثل ا | قصائد حسينية مكتوبه
استشهاد الامام الجواد ع
ذبلانه العيون لا ناصر وعون
مثل الحسين بكربله .. لا ناصر وعون
****
ساكنه بروحك فجيعه وممتلي گلبك محن
دنيتك كلها غريبه ابد ما صحلك وطن
مصيبه .. والجزع حل يومه
مصيبه .. بدمعتك مرسومه
مصيبه .. چبدتك مسمومه .. وفكرك احتار
اشتتحمل الروح بالغربه مجروح
عنك بعيده العايله .. لا ناصر وعون
****
كربله انعادت شفتها والالم يمك يمر
بكل وكت عاشو تراهم حسين جدك والشمر
تِشوفه .. رد شمر بفعاله
تِشوفه .. يغدر اباقواله
تِشوفه .. بذبحتك حط باله .. والظلم عاد
يالتشبه حسين تنطي الوجه وين
انعادت تراها المسأله .. لا ناصر وعون
****
صح عيالك ما سبوها ولا اجو حرگو خيم
بس تره نفس الظليمه حاربوك ابلا سهم
بعيده .. يالجواد اديارك
بعيده .. وانچوت بافكارك
بعيده .. واختفت اخبارك .. عن الاعيال
مو إله بسيوف تنعاد الاطفوف
جرحك منو اليتحمله .. لا ناصر وعون
****
ابسهم الامثلث دليلك ما تصوب وانثلم
لاچن ابذاك عذابك گلبك أوصال انجسم
حقدهم .. نبله نص دلالك
حقدهم .. الغيراها احوالك
حقدهم .. نَفَس ما خلالك .. ضاگت الروح
ما ينسمع صوت والوحدك اتموت
موتك صرت تتوسله .. لا ناصر وعون
****
تشبه حسين ابمصابك يعني مو لازم ذبح
عالرمل نايم ثلاثه وانته نمت اعله السطح
جثثكم .. اثنينهن مدميه
جثثكم .. عالارض مرميه
جثثكم .. تنچوي يوميه .. والشمس نار
جدك حدر خيل وانته ابالف ويل
مدمع محب الكم حله .. لا ناصر وعون
****
سطحك ورمح ابو اليمه المستوى واحد تره
إلفرق موجود راسك وهوه حزو منحره
اختيارك .. عالسطح ميعادك
اختيارك .. ترتفع امجادك
اختيارك .. تنظرك أولادك .. مثل الحسين
ما شفت الارماح بس الجرح صاح
صحت انه هم شفت البله .. لا ناصر وعون
****
الشاعر اياد الديراوي
https://telegram.me/aabas78
