( التعامل مع اليأس ) يائس ؟ أول شيء وقف كل الأمور اللي تسويه | عبدالله الهاشمي
( التعامل مع اليأس )
يائس ؟ أول شيء وقف كل الأمور اللي تسويها حاليا عشان تخرج من هذا اليأس، أنت وياه مثل اللي ماشي بطريق عارف تماما إنه مغلق لكن يبي يوهم حاله إنه يعمل شيء، التفت لهذا اليأس لأنك أكيد لاحظت إنه دائما هو نهاية كل طريق تسلكه،
كيف يعني التفت له ؟ بالبداية الموضوع محتاج شجاعة وجرأة لأن ليس الكل مستعد يعترف إنه حاط اليأس كدرع فولاذي عشان يحمي نفسه من التغيير، ومش قصدي احسسك بالتأنيب والقي عليك اللوم لاياحبيب قلبي ولكن القصد أنور لك أكبر بقعة مظلمة بداخلك لاتريد الالتفات لها اللي هي حماية هذا الشعور، في العمق أنت رابح بوجود هذا اليأس اللي يعطيك مبرر للتعاسة
وتعالو نبسط الموضوع والبداية بوضع هذا السؤال : ليش تمر حاليا بحالة يأس ؟ ممكن يطلع لك لأن كل اهدافي ماتحققت، السؤال الثاني : ايش سويت عشان تحقق أهدافك؟ اكتب كل شيء سويته، السؤال الاخير : كيف كانت مشاعرك أثناء تطبيق الخطوات؟ متحمس، متردد، متعلق، محتاج تحقيقه الخ ..
أبغاك الان تركز معي حول أجوبة السؤال الأخير، مشااااااااعرك وأنت تطبق، هي اللي تمشي معاك وتنوي معاك وهي اللي دائما بتشوفها قدامك، هذا اليأس اللي فيه أنت الان كان هو الظل الخفي لكل أهدافك، وكأنك طول هذي الفترة بلاوعي جالس تغذي هذا الشعور
أرجوك انتبه وركز معي :
إذا كنت تلاحظ إن حالة اليأس ملازمة لك بعد كل فترة تطبيق، اقولك حان الوقت للتعامل الحقيقي مع اليأس وتصفيته، انسى كل الاهداف اللي حطيتها على الأقل مؤقتاً خلها على جنب، مرة ثانية حديثي موجه للاشخاص اللي يعانون من متلازمة اليأس المتضخم
كيف أصفيه ؟
١- الوعي به، يعني إدراك وجوده والاعتراف به
٢- إدراك إنك بلاوعي تحمي هذا الشعور لأنه يعطيك غطاء شرعي للاستمرار بالتعاسة، كيف يعني؟ يعني لما أسأل شخص يعاني جدا ليش أنت تعاني؟ بيقول لأني يائس جدا، بالنسبة له استمرار اليأس مفيد جدا حتى يشعر إن معاناته حقيقية هههه
٣-اشتغل على اليأس، ترى كل اللي مطلوب منك الإحساس الكامل باليأس، ايأس بشكل كامل خليه يظهر بشكل كامل وعيششششه من أوله لآخره.. بتقول يخي كيف أعيشه وأنا أصلا فعلا يائس؟ لا أنت متدرع باليأس مو عايشه حاط حمايه بس، تعيشه يعني تفعل دور المراقب المحايد هنا يبان الصدق اذا فعلا تبي تحرر منه
كيف افعل دور المراقب المحايد؟
هو النظر لهذا اليأس بأنه عبارة عن طاقة مدعومة بقناعات تقودك يعني كأن بالضبط داخلك كيان آخر يمشيك وأنت معطيه زمام الأمور، ومراقبته هي اعلان الانفصال عن مجاراته والتبعية المطلقة له، نهاية هذي الشراكة الأليمة بينكما تراقبه يعني تسترخي، يعني توجه انتباهك لليأس بداخلك وتسمح لمشاعره تكون موجوده بدون إعاقة لها أو قمع أو اصدار أي احكام عليها، وتنبته من عقلك اللي يحاول يفركش العملية ويظهر سخافتها وعدم جدواها، وتعرف أنه كالعادة بالبدايات طبيعي تغلط وتتشتت وإنك تحتاج صبر وطولة بال على نفسك
أدركت الآن أسباب التمسك باليأس:
١-لأن حالة اليأس هي الغطاء اللي يحمي بها المعاناة اللي يمر بها،فلو حرر اليأس تلقائيا تتحرر المعاناة ولأنه بلاوعي يريد الاستمرار بالمعاناة سوف يحافظ على حالة اليأس، فاليأس هو عذره لبقائه تعيسا ٢-الاحساس بالهوية، الكثير يجد من اليأس هوية تعبر عن ذاته
وبعد فترة من تحرير اليأس ستكون حالة من الفراغ الجميل بداخلك، بعد نهاية تفتيت هذي الطاقة اللي كانت تتلاعب بك لن يكون اكبر همك اهدافك مع أهميتها، ستتعرف على عمق هذا الوجود وأنه أهم من كل الأحلام :)
