بهيدة يمشون . ضعن المهابه بهيده يمشون وبناكَة ام عون . العباس | الشاعر عبدالله الفريجي

بهيدة يمشون . ضعن المهابه بهيده يمشون
وبناكَة ام عون . العباس يحدي بناكة ام عون
ترف بالمتون . الرايه الحنينه ترف بالمتون
.
مشي الضعن محروس.
امن اثمنطعش خيال
و مرتاح كلب ام عون
يبرالها كفال
.
ترتاح بمشيها العدها اخو يباري مشيها
زينب من مشت عين الكمر ضلت عليها
على طول الدرب ما فاركت ايده اديها
......................................
ابظهر الحسين . عباس يمشي بضهر الحسين
الريشات الاثنين . ترف بالهوه الريشات الاثنين
كل هله امامنين . بشوف الكمر كله امامنين
.
العنده مثل عباس
مأمن يغمض العين
يرف راية الغيره
ويرتاح جان حسين
.
حسين مأمن بظهره اخو يعادل عشيره
شكو متغرب بضعنه الكمر صاراله ديره
شمحلاته اليسافر وي كلب متروس غيره
.......................................
المغرب يكعدون . كلهم سوه المغرب يكعدون
لبتهم يحنون . يحجون ولبتهم يحنون
دمعات العيون. تصب عالوجه دمعات العيون
.
من الزلم تبجي
معناها اكو غربه
وحسين دمعاته
طيحها من كَلبه
.
اليفارك بته يتغرب اذا واحد ذكرها
ورقيه تذكره كلساعه لان ونها كسرها
يحن وتسولف دموعها على ابنيته الهجرها
.........................................
وحدها بالبيت . متغربه الوحدها بالبيت
بثكَل التوابيت . ثكل الحجي بثكَل التوابيت
الكم اشتاكيت . يهل الرحم الكم اشتاكيت
.
شيصبر المشتاك
لمن يفز باليل
والذكرياته اهواي
بعيونه تبقى اتعيل
.
تِشم اهدوم ابوها وتنهضم لمن تريده
وتذكره كبل من جانت اتنام اعلى ايده
شيوديها لهلها وكربله عنها بعيده
............................
يا هلي متعوب . كلبي الترف يا هلي متعوب
انسركَ البوب . من ليمت احنه نسرك البوب
ميمره محبوب . البابه انطبك ميمره محبوب
.
لا اخت لا خوان
لا عم يدك الباب
كلهم مشو وياك
كلهم صفو غياب
.
وحيده وتعبتني الكعده وحدي بعتبة الباب
ومنو يمرني اسمعه يكول اهله هاي غياب
الموت اهون علي يا بويه من افراك الاحباب

عبدالله الفريجي