السؤال المتكرر..جدا.. : ما حدود العلاقة بيننا في فترة الخطوبة | محمد عطية - الآسك
السؤال المتكرر..جدا.. :
ما حدود العلاقة بيننا في فترة الخطوبة ؟!
بين (اللي محبكنها لدرجة التعقيد) و (اللي فاتحينها على البحري)..تبقى الخطوبة = وعد بالزواج..
يعني مجرد اثنين أجنبيين عن بعض..بينهما وعد بالزواج..ما ينفعش فيه خلوة كاملة..وغيره مما لا أحب تفصيله..
وفي نفس الوقت ما ينفعش نقول خلينا بعيد، ولما نتجوز نبقى نستكشف بعض..ونقرر نكمل ولا لأ !
الزواج عشان يتم لازم يكونوا وصلوا لدرجة (طبعا مش كاملة تماما؛ لأن قفل باب البيت على روحين لازم فيه مفاجآت سارة..وأخرى ليست كذلك..لكن ما دمنا مقتنعين ببعض فلازم بنوصل لنقاط التقاء) من التفاهم والاطمئنان إن ده الرفيق المناسب..ودي الرفيقة المناسبة لمشوار العمر..
طيب ده كله معروف ومفهوم..لكن نتعامل ازاي ؟!
خلينا واقعيين..
صاحبنا ما صدق طبعا إن صار له (تاء مربوطة) في حياته..مسموح له يتكلم معاها وتنتسب له ولو بمجرد (دبلة)..
وأختنا متحرجة جدا من جرأته واستعجاله (غالبا)، وحيرانة بين رغبتها في عدم التجاوز وحرصها على رضا ربنا، والفكرة السلبية اللي ممكن ياخدها عنها.. (وأحيانا الوضع ده بيكون معكوس) !!
شوف يا عريس: الحب تقدر توصله بألف طريقة ليس من ضمنها التصريح..مهمتك هي بناء معنى (الأمان) بداخلها في هذه الفترة.. نقاش ودود ومتحفظ..ورجولة بتغمرها في حفاظك عليها..وترك كل شيء لوقته.. بتكون أمور لا تُنسى لك بعد !
يا عروسة: الحب برضه هيحسه هو بدون تصريح ومخالفة، وبدون ما تلعبي دور (خفر السواحل) اللي بيجيب نتايج عكسية كتير..دورك هو بناء معنى (الاحتواء) في سماعك وردودك وعرضك حتى لآرائك التي قد تخالفينه فيها.. مش مطلوب منك تكوني نسخة منه..ولا مسموح لك تتنازلي عن حدود المرحلة..مطلوب تحيي بداخله فقط أمل التطلع للمرحلة القادمة !
ونصيحتي: لو وصلتِ معاه للأمان..ووصلت معاها للاحتواء الصادق = عجلوا بالعقد..وعجلوا بالبناء بعده.. طول الفترة دي سواء خطوبة أو عقد (رغم جمال ذكرياتها) مش كويس غالبا..لأن المشاكل فيها بتتشعب، وبيتدخلوا أطراف ممكن جدا يفسدوا كل حاجة..ويضيعوكم من بعض.. عافاكم الله !
