س: السلام عليكم إزاي أقنع أختي بالحكمة والموعظة الحسنة إنه ماي | محمد عطية - الآسك

س: السلام عليكم إزاي أقنع أختي بالحكمة والموعظة الحسنة إنه ماينفش تحط صورتها على الانستقرام حتى لو الحساب كان شخصي وتبطل تقلد صاحباتها تقليد أعمى حتى لو كن متفوقات دراسيا ؟ -بدل ماكسر موبايلها-! وشكرًا

ج/ غلط يا عمر .. طريقتك غلط وأسلوبك غلط !

أنت عليك تنصحها بلطف وبس.

وبعدين لو الحساب خاص وبتضيف صاحباتها بس والصور مش أوفر .. يعني نفس ما بتكون في الشارع يبقى مفيش مشكلة.

.....

س: غير السائل.. يعني خلاص الدنيا مش هاتنفع غير بالانستجرام والفيس وتقلد دي ودي . دول عندهم فراغ لو طلعته في المطبخ وخدمة ابوها وأمها وأخواتها أحسن ليها . ياشيخ الدين يا ابيض يا أسود والمواقع التواصل دي كلها فتن ونخوتنا متقبلش غير بتلفون بكشاف ومافيهوش رصيد يعني استقبال بس ويكون دايما في الصاله قدامنا

ج/ بالراحة على نفسك يا عم الحلو المعصوم اللي نازل علينا من السما أنت !

نخوة إيه يا أبو نخوة اللي تخليك تمارس هذا الأسلوب القذر من الشك والوصاية ..

آه فيه فتن .. وفيه غلط .. لكن مش الحل هو إخراج عقدك النفسية بحجة الرقابة والحرص ..

الحل هو تنمية الثقة المتبادلة وغرس الوعي في التربية .. وترك مساحة من الأمان تسمح بإنها تحكيلك وتاخد رأيك في كل حاجة .. ده لو عندك عقل يعني يسمح بإنك تفيدها !

اقفل عليها براحتك .. ما هي هتروح مدرسة وجامعة ولها صاحبات وهتعمل اللي هي عايزاه ..

يعني الدافع والرقابة لو مش من جواها أصلا فالقضية خسرانة !

قاتل الله بيوتا مريضة وقناعات مجتمعية منيلة بنيلة تخلي واحد بفكرك ده قيّما على امرأة ..

والغريبة الواحد منكم بعد كده بيعيش حياته ويعك الدنيا دون شعور بغضاضة أو ذنب ..

أنا لا أحترم أمثالك ولا أحبهم .. للأسف.

.....

س: اهو دول بالظبط اللى بيخلونى احمد ربنا انه معنديش اخوات ولاد

ج/ ياما فيه ولاد بيعرف يكون راجل بمعنى الكلمة !

راجل يبذل الأمان ويعطي الثقة .. ويكون هو الملاذ الأول حتى لو حصل غلط أو مشكلة ..

بيعرف يتابع بدون ما يشكك .. ويوجه بدون ما يجرح .. ويشد إن لزم الأمر بدون ما يدمر الجسور ..

هنيئا لمن كانت أخته .. ويا سعد من تكون زوجته ..

عشان كده اللي تلاقوا فيه المواصفات دي تعرفوا إن معاكم معدن نادر والله .. وهذا عين ما أقصده بالسلامة النفسية التي أكرر الحديث عنها كثيرا ..

للأسف السلامة دي لا علاقة لها بمستوى تعليمي أو مادي واجتماعي أو حتى تدين ومظهر وعلم شرعي ..

دي حاجة بتكون مستقرة في الفطرة السليمة كتراكمات حميدة لتربية صحيحة وقلب نقي وذكاء عاطفي واجتماعي.