كون حاضر من طلعنه لليسر تشوف ياعباس ضحكات الشمر ان | الشاعر ابو اسحاق الفحام
كون حاضر من طلعنه لليسر
تشوف ياعباس ضحكات الشمر
انه بتمن يبو فاضل وانسطر
والشمر يازينب يسميني
ــــــــــــــــــــــــــــــــــــ
ريتك تشوف الشمر لمن نظر
وشافني محتاره اگلب بالنظر
صاح طلعوهه سبيه اخت الگمر
هنا هظمني وجرت دمعة عيني
ـــــــــــــــــــــــــــــــ
جابو النوگ ونده حادي السبي
گومي يازينب عله الناگه اركبي
چنه يطلب ثار من جدي النبي
بحقد ثاره للسبي يمشيني
ـــــــــــــــــــــــــ
گمت خويه وركبت بيدي الحرم
لكن الحيرني ياراعي الشيم
شفت ابو الباقر يعباس انهضم
اطشرن أفكاره بينه وبيني
ـــــــــــــــــــــــــــ
تحير السجاد وانه تحيرت
للنهر شبحن عيوني ونظرت
صحت ياعباس ليش اتاخرت
شلون ترضه بشدتي تخليني
ـــــــــــــــــــــــــ
ترضه ياعباس اضل بشدتي
ومن نخيتك ما تهزتك نخوتي
يبو فاضل طلعوني وناگتي
هزله خويه والدرب ياذيني
ـــــــــــــــــــــ
خويه عالهزل شفت ليلى ورباب
تحيرن بين الحبل بين الحجاب
طفله تنشدني ويحيرني الجواب
ليش عمي بحالتي مخليني
ــــــــــــــــــــــــــــ
الربت بالعز صعبه تمشي ميسره
ومثل زينب ما تضل محيره
وانت كافلهه يسبع الگنطره
وفدوه الچ گتلهه يختي سنيني
ـــــــــــــــــــــــــــــ
غصبن عليَّ يبو فاضل مشيت
لون بيدي خويه چا يمكم بقيت
صاح گومن وانه ياخويه بچيت
كون يمكم ابقه ويخليني
ــــــــــــــــــــــــــــــ
كون يمكم خويه ابقه ولا اروح
ولو رحت عنكم اروح بلا روح
اضل يم حسين اداويه الجروح
لكن شبيدي العده سابيني
__
الشاعر ابو اسحاق الفحام
