( قصيدة بحق سيدتي أم البنين ع) ،،،،،،،،،،،،،،،، | الشاعر ابو اسحاق الفحام
( قصيدة بحق سيدتي أم البنين ع)
،،،،،،،،،،،،،،،،،،،،،،،
وگفت الدنيا علبابچ تطلب مراد
وانت بس حسين من الله طلبتي
شلتي ايدچ للسمه وبچفوف عباس
ودعوة المضطر دعيتي من وگفتي
أنت ام الاربعه الراحو بالضعون
ما تنيتي ولا لجيتهم نطرتي
ردتي بس حسين يرجع سالم يكون
فدوة كل الاربعه لحسين گلتي
عينچ عله حسين من صار الرحيل
نظرة الام لحظة وداعه نظرتي
غدت نظراتچ وصيه وعرف عباس
بيده هز الرايه من شافچ طلعتي
عشتي مشتاگه لضعنهم يرجع ردود
وي الصور بديارهم للجيه عشتي
صرتي جرفين النهر بچفوف عباس
بالضمه تحسين لكن ما شربتي
من وگع عباس مرمي بلايه چفين
أدري يَم عباس بالحسره حضرتي
روحچ بجود الوفه ردت للخيام
صوبچ سهم المنيه وما وصلتي
عينچ لزينب تصد وتقدم اعذار
واستحيتي من العذر بس اعتذرتي
شفتي نار خيامهم تلسع بالايتام
وردتي تطفين الخيم بس ما گدرتي وشفتي سوط بن الخنه بظهر اليتيمات
ونحنيتي ومصد عن السوط صرتي
وشفتي راس حسين مرفوع عله الرماح
صحتي يبني بصوت مملي بحزن صحتي
ورحتي وي ضعونهن مسبيه للشام
وبالخرابه هناك وي زينب گعدتي
وشفتي بعيونچ رقيه تموت عالراس
وانت يم الراس وياهه لطمتي
______
خادم أم البنين ابو اسحاق الفحام
