ها يالغالي .. وراحة بالي .. گلي اشلونك بعدك ضامي.. ونحرك دامي. | الشاعر احمد عباس الحساني
ها يالغالي .. وراحة بالي .. گلي اشلونك
بعدك ضامي.. ونحرك دامي..ورايح لونك
من گد ما داسو صدرك
يحسين اتساوة بظهرك
~~~~~~~~~~
باطراف العين انباوع لحسين
قبل المذبح ونباوعلة ملتمين اعليه
طايح خلوه نزلو رفسوه
واحد شفته والله برجلة ظل يرفس بيه
غريب وباقي بس وحدة
الشمر شفتة گعد گعدة
اعلة صدرة يضرب ابخدة
وحيد وكلشي ما عندة
اخوي احسين
شفت اعضيدي .. وترجف إيدي .. وسط الخيمة
اليمشي ابدمي .. طايح مرمي .. ابذیچ الهيمة
يا گلبي إنزل گبرك
يحسين اتساوة بظهرك
~~~~~~~~~~
تتلوة اهناك مّحد وّياك
شفتك خوية ابلية اعمامة ويضربوك
ما عندك حيل ايضربونك حيل
ويطيحونك ردت اتگوم وما خلوك
الرمل متوسدة اتنازع
منو عنك إجة ايدافع
عليك الوادم اتباوع
من ظهرك سهم طالع
اخوي احسين
حيلك رايح .. بعدك طايح .. ويسحگونك
تنزف دمك .. رفسو جسمك .. ويدوسونك
متولّم يگطع نحرك
يحسين اتساوة بظهرك
~~~~~~~~~~
واحدهم صاح وين الذباح
بذيچ اللحظة اتمنيت الهم يطفي العين
لمّن ذبحوه رجعو شالوه
گطعو راسة اومن شيباتة ايكظ احسين
الشمر متربع ابصدرة
طبر نحرة اثنعش طبرة
اعلة كيفة يگطع ابنحرة
ولحيتة اتحولت حمرة
اخوي احسين
شفت المنحر .. أمشي وأعثر .. چي مرعوبة
واحد داسة .. وشايل راسة .. وبايگ ثوبة
امن اهدومك واحد جرّك
يحسين اتساوة بظهرك
~~~~~~~~~~
هاا يالعطشان وجهك ذبلان
وجهك ذابل منّ حرورةت رمل الگاع
لو يعمة الشوف صدرك مخسوف
الخيل اثگيلة اوتسحگ بيك وجسمك ضاع
اعلة گلبك حافر اتكسر
يخوية وجسمك اتطشر
صريع اوباقي بس منحر
نعوفك وحدك ابهالبر
اخوي احسين
يابو اسكينة .. گلبك وينة .. بصدرك حفرة
شگد دورتة .. بس ماشفتة .. وية العشرة
اوعطشان امخلص عمرك
يحسين اتساوة بظهرك
~~~~~~~~~~
أحمد عباس الحساني (العاشر)
