محتارة زينب بالضعن     والغربة حگها اتحير محتارة  ترجع  للوطن  | الشاعر احمد عباس الحساني

محتارة زينب بالضعن     والغربة حگها اتحير
محتارة  ترجع  للوطن     واحسينها    متوذر
وياهّا    أيتام
مسبية  للشام                 واحسينها   متوذر
~~
يلا زينب .. ودعي اخوتچ .. حان موتچ .. الناگة تابوت السبي ، تشييع گلبچ
يالعقيلة .. گرب ليلچ .. لمي حيلچ .. لمي كلشي اوياچ خاف ايطول دربچ
بعدة  ما خلص ترا الهم والبلاء
طبةت الديوان أشد من كربلاء

لحسين  نحره  منذبح      لو روحچ   المذبوحة
مو هسة گلبچ  ينجرح      وبكل وكت مجروحة
من نار الخيام
مسبية  للشام                 واحسينها    متوذر
~~
ياعذابچ .. يالغريبة .. بهالمصيبة ..   الناس    ملتمة    تشوف  اخيال   منچ
وبیدچ احبال .. والله صعبة .. ناس غربة .. وسفة مسبية وغرب يحدون ضعنچ
هاي زينب بت علي وبت فاطمة
اچفوفها  من  الحبل تجري  دمة

چفها انچوة بنار الخيم      نوب  بحبل  شدوها
نار   وحبل   زاد   الألم      وللشام گوة اخذوها
عالهزَّل  اتنام
مسبية للشام                 واحسينها    متوذر
~~
وحدچ انتي .. والله حيرة .. ابلا عشيرة .. صعبة هاي أم الخدر تصعد هزيلة
كلفة والله ... شتمّوّها ... سلبّوّها ...  ويلي    للشام انسبت  وإهية العقيلة
تصيح  حيهم وين  هاشم  عني  وين
انسلب خدري وانسلب ثوب الحُسين

صاحت علة اخوتها ابدمع     فزعولي   يا خوّاني
احسين  اللينحرة  منگطع     ومطفّية عين الثاني
مطفية بسهام
مسبية  للشام                 واحسينها    متوذر
~~
يخت الحسين .. شنهي صبرچ .. تالي عمرچ .. تشيّب ارموش الجفن من المصايب
رحتي للشام .. يأم الاحزان .. بلاية خوّان .. اگعدتي مچتوفة ابحبل ذيچ الخرايب
ابلا  كفيل  اميسّرّة   اخت  الكفيل
ابّطن  ناگة  ابسلسلة  انشّد  العليل

شاگفتي عن سوط الهضم      بچفوفچ الملچومة
ويلي   الحبل  لاح  العظم      يازينب  المهضومة
تبچي ومتنلام
مسبية   للشام                 واحسينها    متوذر
~~
أحمد عباس الحساني