قصيدة بلسان حال العليلة فاطمة ع ـــــــــــــــــــــــــــــــــــــــــــــــــــــــــــــــ عليلة والله مشتاگة لهلي عليلة والله مشتاگة لهلي ــــــــــــــــــــــــــــــــــــــــ فاطمة آنه العليلة دمعي بالدّم ساچب بونة الفاگد أونّن گلبي بالهَم ذايب راحو أهلي وانه وحدي وَيّه ليلي معاتَب والنهار اگضي عليهم ويَ ٱنتظاري مناحَب سَهَر طال لَيلي ماظَن ينجلي عَليلة والله مشتاگة لهَلي ـــــــــــــــــــــــــــــــــ ليلي صاحب چَم مواقف آنه ما أنساهه ناس مَلّت مِن دموعي وليلي هو أخفاهه وبعِتِمتَه سَكتة أبچي روحي ظل رَجواهه ألتقي بأحباب گلبي لله ظل شكواهه هضيمة بزغري آنه أبتلي عَليلة والله مشتاگة لهَلي ــــــــــــــــــــــــــــــــــــــ لسه أذكر أهلي لَمّن أظعِنَوا جدّامي أيقنت آنه لمِنِيتي گرّبت أيامي روحي شاغت عَنّي بِعدَوا وِبتِدت آلامي وِنحُفر بالعين أثرهم والگلب ظل ظامي صِحِت آه يمتى رَجعتكُم إلي عَليلة والله مشتاگة لهَلي ــــــــــــــــــــــــــــــــــــــ رِدت أروح وياهم آنه وما خذوني ٱوياهم گلبي گلّي يا العليلة أيسي مِن ملگاهم هَم وحيدة وهَم عليلة وهَم ألَم فرگاهم ساعة أموت وساعة أعدل لو يِمُر طرواهم عگبهم خالي مظلم منزلي عَليلة والله مشتاگة لهَلي ـــــــــــــــــــــــــــــــــــــ آنه چانت أمنياتي بموتتي ٱيحضروني الفاتحة يقروها إليّة لَمّن ٱيدفنوني تالي مهضومة وعليلة بغربتي يخلوني بيه تذبح ذكرياتي وبالهجر ذبحوني خواتي وأمي والاكبر علي عَليلة والله مشتاگة لهَلي ـــــــــــــــــــــــــــــــــــــــ والله مشتاگة لأبويه وللگمر عباسي والأگله ما يصدگ شيبي تارس راسي والطّفِل تِذكارَه عايش يِسري وَي أنفاسي موتتي آخر محطة وَي زماني القاسي أتاني موتتي أرحم إلي عليلة والله مشتاگة لهلي ــــــــــــــــــــــــــــــــــــــــــــــــــــــــــــــ بقلم الأستاذ / ستار عذاب الحچامي . 1_رابط قناة الرادود احمد الزوار على اليوتيوب https://youtube.com/channel/UCEa2AIfPlXlAHgT7b8hxpvA 2_رابط قناة قصائد على لحن باسم على اليوتيوب https://youtube.com/channel/UCz03jT4unuka51X7foOyXcg 3_رابط قناة التلجرام https://t.me/ahmed_alziwar 4- حساب الانستا https://www.instagram.com/invites/contact/?i=r758t0jcoxxe&utm_content=11pvwp1 5- صفحة الفيس بوك https://www.facebook.com/ahmedbasra1w3 2.7K viewsالناشر احمد الزوار, edited 16:49
