دللول يعبدالله دللول يعبدالله .............................. | قصائد حسينيه للشاعر ابو اسد البزوني
دللول يعبدالله دللول يعبدالله
..............................
اهزن بالمهد كل ليله وارتاح
اشيهود المنگطع من عدها سباح
ابنبلة حرمله كل تعبي احس راح
وراك امك تكض ضلت بالاصفاح
دللول يعبدالله دللول يعبدالله
..............................
شلون اطاك كلبك يمه وتروح
ست اشهر بنبله شلون مذبوح
تعال ارجعلي خل تهيد الجروح
گلب امك خلافك عاشر النوح
دللول يعبدالله دللول يعبدالله
..............................
افز مذهوله كلما تغمض العين
ودورك وين يبني سافرت وين
احطن نشد حتى اعلى الحياطين
منو الشايف ذبيح اوليد لحسين
دللول يعبدالله دللول يعبدالله
..............................
من جابك حسين وللخيم راد
كلت شارب اميه وليدي من هاد
طلع سهم المثلث بالنحر حاد
ذبح ريع الي ساكن لب الفاد
دللول يعبدالله دللول يعبدالله
..............................
بحضن حسين شفتك ماد رجليك
اجيت اركض عليك وردت اناغيك
طلع دم البنحرك يمه غاطيك
ما حسبت بهالوضع يايمه الاگيك
دللول يعبدالله دللول يعبدالله
..............................
عاده التفگد اچم يوم تنساه
وانه العمر كله احاااه ب احاااه
مثل اوليدي ياهو السهم ذبحاه
ست اشهر منو المتحني بدماه
دللول يعبدالله دللول يعبدالله
..............................
ابو اسد البزوني
