لسادتي الانصار سلام الله عليهم كلما احير وتسرح افكاري يصيحو | الشاعر عباس الفرطوسي الكربلائي
لسادتي الانصار سلام الله عليهم
كلما احير وتسرح افكاري
يصيحون عد عيناك انصاري
لتحتار ... حملك احنه نشيله
،،،،،،،،،،،،،،،،،،،،،،،،،،
زينب تكلي يخويه ربعك انته شكد بقو
وكلت لتخلين بالج ضلو الماقصرو
وسمعو انصاري حجيها انهضمو بساع وبجو
وشاغو ولطمو كصصهم واعله الخيام انتجو
صاحو يزينب ليش محتاره
وحسين خوش انصار انصاره
لتحتار ... حملك احنه نشيله
،،،،،،،،،،،،،،،،،،،،،،،،،،،،،
اجو يتباجون ربعي وصاحو اكبالي سوه
احنه لا تحسبنه غربه احسبنه شيال اللوه
نحترك لو ضلمه صارت حته نصبحلك ضوه
والهوه لو ما تشمه يحرم اعلينه الهوه
كول وفعل يحسين لو كلنه
وحجاية التنكال موش النه
لتحتار ... حملك احنه نشيله
،،،،،،،،،،،،،،،،،،،،،،،
كعدو اكبالي وحجولي وكالو احنه مقصرين
سيدي منعوفك احنه اقطع الشك باليقين
وكل للعيال اطمأنو بسلام آمنين
احسبه خلصانه اعلدينه ياحبيبي ياحسين
لتفكر ولا تسرح افكارك
راسك يضل مرفوع بنصارك
لتحتار ... حملك احنه انشيله
،،،،،،،،،،،،،،،،،،،،،،
تشابكو كلهم اكبالي و صلّو اباب الخيم
تحزمو همه بغترهم ورفرفو مثل العلم
واحد يحشم الثاني كون ميفوتك سهم
وكالو احنه نموت كلنه فشله لو واحد سلم
كلش جبيره لون ردينه
كون بفكدنه نشيم اهالينه
لتحتار ... حملك احنه نشيله
،،،،،،،،،،،،،،،،،،،،،،،،،
مو هوايه ربعي لاكن ترسو اعيوني ترس
وصارو افياي الرفاكه اوكفو بعين الشمس
بوكت ما ضاكت الدنيه همه صارولي ونس
كالو وداعة اعيونك خيمتك ما تنلمس
كالولي فصل واحنه بس نلبس
ريتنه انته وبيك نتنفس
لتحتار … حملك احنه نشيله
،،،،،،،،،،،،،،،،،،،،،،،،،
للعبد عباس الفرطوسي الكربلائي
