حي الله عباس يحي الله عباس ........... راعي الكلافه والفخر | الشاعر عباس الفرطوسي الكربلائي
حي الله عباس يحي الله عباس
...........
راعي الكلافه والفخر صاح
طلعولي منكم وين الاثكال
كل ضنكم تهزون عباس
وهوه الهوه ما هز الاجبال
سكتو ولا منهم طلع صوت
ما الها حس جن السلف شال
السبعين الف شو صارت تراب
جن الخلك ضاربها زلزال
حي الله عباس يحي الله عباس
.......................
طباها ابن رداد الحكوك
ومن هيبته صار النهر كاع
ما صاحو دخيلك يعباس
صاحو دخيل اعيونه الوساع
رجفو مثل ما يرجف الماي
والرايه رفت مثل الشراع
مثل اليذب بنص نهر ماي
وبسرعه هالجيش اختفه وضاع
حي الله عباس يحي الله عباس
..................
طباها يتمشه اعله الاركاب
احيود الزلم راواهم الويل
غار وعصرها الكاع من غار
وخله الزلم تتعثر بخيل
حته الضوه كدامه هم غاب
وذاك النهار تبدل بليل
ساواهم ويه الكاع عباس
والحومه غصت بالمجاتيل
حي الله عباس يحي الله عباس
...............
مثل الهوه لو غار عباس
ما تدري يمته راسك يطير
عالمهره بس جدامه بالكاع
ومن يامجان يذبحك تحير
بس غمض وفتحها العيون
وراسك يطير بغير تفسير
مو موته وحده يموتك هناك
اول سبع موتات تحذير
حي الله عباس يحي الله عباس
...............
من طبها سيفه وياه وج نار
سيفه لركبهم حيل طماع
السبعين الف شو صارو بخور
وسوت جثثهم جبل بالكاع
بس هالجبل ما عجب عباس
وبس أشر بجفه الجبل ضاع
وصعدت جثثهم جنها دخان
ولبدت وره اغيوم السمه ابساع
حي الله عباس يحي الله عباس
...............
لمن وصل للنهر عباس
الكافل وكفله وكفة افياي
كلاله ليش تعطش الأطفال
من عدنه ياهو الغثك بهاي
وكام اعله حيله وصد للخيام
وصاحتله زينب ها يوفاي
لو ما ترد لطفالك بخير
باجر تموت بحسرة الماي
حي الله عباس يحي الله عباس
عباس الفرطوسي الكربلائي
