وجهت وجهي لغيرتك وسلمت أمري لرحمتك يل | الشاعر عباس الفرطوسي الكربلائي
وجهت وجهي لغيرتك
وسلمت أمري لرحمتك
يلشايلينك بالرمح
خليني شايل رايتك
...........
بابك عندي باب الله اعله بابك رايد اتوكل
متيه دنيتي وربعي وغيرك كلشي ما اندل
اجيك مبهذل ومكسور وارجع منك معدل
لو ميت انه من اسنين من اشمن حضرتك اعدل
يحييني مولاي الهضم
لو باقي بس جلد وعضم
مولاي كلبي لو يدك
دكاته الك تصبح لطم
..............
صح بعيني ما شفتك لجن ما فاركت بالي
المجان الماكو ذكرك بيه يضل طول العمر خالي
بحضرتك من أسد عيني اشوفك واكف اكبالي
واصد لطولك المهيوب واصد للبيرغ العالي
بحضرتك ياخذني الهوه
واصفن واعيش بنينوى
وانضر جفوفك سيدي
بجفوف شيال اللوه
............
أريدك تعذر ادموعي واريدك تعطف اعليه
انه المفروض اجيك زحوف عيب امشي اعله رجليه
اجيت وصدري ما مسحوك سالم كلشي ما بيه
اجيت وريجي شابع ماي وما جايبلك اميه
مدلل هلي وكاصد الك
وادري بسبي راحو هلك
ما يكفي جرحي مصيبتك
زيد جروحي اتوسلك
............
شيريد يحس بعد مولاي البلهفة غرامك حس
هوه الما يحب مثلك حرام عليه يتنفس
اليموت وحبك بكلبه واجب ذكره يتقدس
ويهنياله النذر عمره وحياته (للحسين) وبس
هنياله اليكضي العمر
بس بالبجي ودك الصدر
وهنياله كلمن يحترك
من تنذكر ام الخدر
.............
اجيتك كاشخ بنوحي اقلل بالكي من نوحك
وكايد دمعة اعيوني كون اجفيها وتلوحك
ويبرد كلبك الضامي واداوي بدمعتي جروحك
و أريدك تعذر اجروحي لأن ما وصلت لروحك
كاشخ اجيت بدمعتي
محزم وشايل رايتي
واكف اباب امروتك
منك اريدن حركتي
عباس الفرطوسي الكربلائي
