هنه الطلعني لغربتي هواي طيحة خيمتي واخواني والماي ونضرات الزل | الشاعر عباس الفرطوسي الكربلائي
هنه الطلعني لغربتي هواي
طيحة خيمتي واخواني والماي
ونضرات الزلم والتل والاحبال
وعيالي وعثرتي وشدهت الراي
..............
يعينها الله التمشي غربه وتذكر أخوتها وتحن
تنطك ومحد يجيها ويفت جبدتها الحزن
المالها اخوان بسفرها تصير سالوفه لسن
ياخسارتها الجبيره مدنكه تبقه وتون
آنه الحرمه ذيج الفكدت اخوان
وآنه التنطك ومن دون عوان
وآنه من الجروح أصبحت سرداب
وعيالي وعثرتي وشدهت الراي
................
الصعبه من توكع الحرمه وهيه مجتوفه بحبل
الهضمه من يموت اخوها واعله اخوها تنسأل
الغربه من تذكر أهلها وصاعده النوك الهزل
الشوغه لو صاحو يحرمه من الهزل طايح طفل
الكلفه اسمع عدوي يصيح ياناس
حيهم فزعه فزعه اعله اخت عباس
وأنه كل حيلي راح بحرك الخيام
وعيالي وعثرتي وشدهت الراي
..................
هنه ذني الطلعني حركت اخيامي وجفاه
النار تحركني من أضلن وما اندل وامشي وراه
غاب عني وهوه يدري بخنكه اليفكد هواه
اليحلم يمر بيه اسمي شافني بدوره كفاه
افه خدر الله زينب تطلع باليل
وتركض حافيه ويه الزلم والخيل
الهدت حيلي جويه جدمي بالنار
وعيالي وعثرتي وشدهت الراي
................
من وجع روحي ندهته لجن ما ردالي ليش
ما نشد كلبه عليه خلاف طوله شلون اعيش
من اذكر اسمه ترد روحي هسه اردن روحي بيش
شلون ترهم تالي اضلن وحدي وعدواني جيش
شلون تصير أميرة حيدر تهون
شلون تشوف طولي كل العيون
شلون اخت الكمر تنضرب بحجار
وعيالي وعثرتي وشدهت الراي
..............
من اهد ما دار وجهه عيني ما غمضت حرام
جنت متعوده اخلي عيوني بعيونه وانام
منهد ما حركو خيمنه صحت عالدنيا السلام
وغاب عني وعكب نوره خيم اعلينه الضلام
يكضي العمر ضلمه اليفكد اضواه
وكون المات أخيها تموت وياه
موش بركبتي تضل تضل كل الاطفال
وعيالي وعثرتي وشدهت الراي
عباس الفرطوسي الكربلائي
