الشام هاي وهاي الجروح والهضم خيم عله الروح خويه.....الشام غرب | الشاعر عباس الفرطوسي الكربلائي
الشام هاي وهاي الجروح
والهضم خيم عله الروح
خويه.....الشام غربه بلايه ضل
بيها...... ينسبي الما عنده خل
ياهضيمه... ياهضيمه
.............
رجفت اجدامي وطحت.... ويبس كلبي من شفت
ديرة الشام
ومن نزلت أمن الهزل.... ماكل اجفوفي الحبل
وجف الأيتام
الشام هاي وماكو بيها حشمه للجاي
اليعطش يخلص حياته بحسرة الماي
ينطك وينكاد بيها الماله حماي
اسألج ياديرة الشام
شنهو ذنبي وذنب الايتام
ناسج...... تهضم الما عنده عم
وكاعج...... صوبت كلبي بسهم
ياهضيمه ياهضيمه
.................
ما رضو رأساً نطب.... ورادو اباب الغرب
نبقه ساعات
بكل فرع وبكل عكد .... حطو شموع أو ورد
كلها شمات
الشام غربه وناسها تذبل اليجيها
الشام مو ممشه زحف خطواتي بيها
الشام تأخذ حشمة اليجبل عليها
ودي اديرن وجهي وابعد
وركض وللشام ما رد
الحيره.... هوه مو بيدي الحجي
وشوفي.... راح من كثر البجي
ياهضيمه ياهضيمه
..............
وين جانت هاي الي.... بنص غرب حشمة علي
والخدر راح
التمت اعليه الغرب.... صياح وحجار وضرب
بجعب الارماح
وسفه تالي العمر تنطك الاميره
مدنكه من المستحه الحرمه الجبيره
وتمشي ويه الذبحو اخوتها اسيره
الشام مالك بيها كل راي
وجلمتك ما الها شراي
الحادي....... بكيفه امشي بكيفه ارد
اكبالي....... واكف محمل حقد
ياهضيمه ياهضيمه
...............
من صفه وشاله العمر.... السوك طبيته العصر
بلمة الناس
ذبل ارسومي البجي.... والله كمت اسمع حجي
يشيب الراس
خويه واهل الشام تستنكي اليأذيك
وين الحجايه التغثك تنحجي اعليك
وتنهضم بالسوك من ينجاب طاريك
وتنهضم لمن يكولون
شبيهم اهلك ما يفزعون
لزينب..... ما فزع واحد كلف
ماكو..... لا غريب ولا عرف
ياهضيمه ياهضيمه
.................
عكب كل هذا الهضم..... ابقه بس جلد وعضم
وحيلي ذايب
الشام هاي وغربتي...... وراح أضل بدمعتي
بنص خرايب
الشام هايه واليطبها يضيع كدره
وتخلص دموعه بواجي كطره كطره
العنده صبر أيوب يمها يكضي صبره
واليطب لديرة الشام
يشوف إخوته بس بالاحلام
ذكره...... يبقه بس الشيب اله
ينسه...... كلشي بيه ذكره لهله
ياهضيمه ياهضيمه
عباس الفرطوسي الكربلائي
